- સોમવારે કાળીપટ્ટી સાથે કામગીરી કરી, આજે આવેદનપત્ર આપશે
- પ્રશ્નોનો ઉકેલ નહીં આવે તો 4 માર્ચે સત્યાગ્રણ છાવણી ખાતે પ્રદર્શન કરશે
- કાળી પટ્ટી ધારણ કરીને કામગીરી કરવામાં આવી હતી
ગાંધીનગર સહિત રાજ્યભરની આરટીઓમાં ટેક્નિકલ ઓફિસરના પડતર પ્રશ્નો મુદ્દે હવે લડત શરુ થઈ છે. ગુજરાત મોટર વ્હિકલ ડિપાર્ટમેન્ટ ટેક્નિકલ ઓફિસર એસોસિએશન દ્વારા આ મુદ્દે અગાઉ વાહનવ્યવહાર મંત્રીને પત્ર લખીને પ્રશ્નોના નિવારણ માટે અપીલ કરી હતી. પ્રશ્નોનો ઉકેલ નહીં આવતા 26 ફેબ્રુઆરીથી લઈને 11 માર્ચ સુધી વિવિધ કાર્યક્રમો જાહેર કરાયા છે. જે અંતર્ગત સોમવારે આરટીઓના અધિકારીઓ દ્વારા કાળી પટ્ટી ધારણ કરીને કામગીરી કરવામાં આવી હતી.
એકબાજુ સરકારી કર્મચારીઓએ જૂની પેન્શન યોજના સહિતના પડત માંગણીઓ મુદ્દે આગામી 6ઠ્ઠી માર્ચે પેન ડાઉન સ્ટ્રીકની ચીમકી ઉચ્ચારી છે. તો બીજીબાજુ આરટીઓના કર્મચારીઓ પણ સરકાર સામે આંદોલનનું રણશીંગુ ફુંકી આંદોલનના મંડાણ શરૂ કર્યા છે. આમ લોકસભાની ચૂંટણીના માહોલની સાથે સાથે આંદોલનની પણ જાણે કે સીઝન શરૂ થઈ છે.
રાજ્યભરની આરટીઓમાં 38 જેટલા અધિકારીઓની અટકેલા પ્રોબેશન, ચેકપોઈન્ટ પર સુવિધાનો અભાવ, સરકારી વાહનની સગવડ, વધારાની સેવામાં ભથ્થા, ભરતી બદલી અને સિનિયોરિટી પ્રમાણે ચાર્જ સોંપવા સહિતના પડતર પ્રશ્નો છે. ત્યારે આ પડતર પ્રશ્નોને લઈને 26 ફેબ્રુઆરીથી આંદોલનની શરૂઆત કરવામાં આવી છે. સોમવારે ગાંધીનગર સહિતની આરટીઓમાં ટેક્નિકલ અધિકારીઓ દ્વારા કાળીપટ્ટી બાંધીને ફરજ બજાવી હતી. આજે કચેરીના વડાથી લઈને મુખ્યમંત્રી સુધી આવેદનપત્ર આપશે. 29 ફેબ્રુઆરીના રોજ કચેરીના સમય પહેલાં કે રિશેષ સમયે સૂત્રોચ્ચાર અને ઘંટનાદ કરીને પોતાનો વિરોધ પ્રદર્શિત કરશે. પહેલી માર્ચના રોજ તમામ ટેક્નિકલ અધિકારીઓ 1 દિવસની માસ સીએલ પર ઉતરીને કામગીરીનો બહિષ્કાર કરશે. જ્યારે 4 માર્ચના રોજ સેક્ટર-6 સત્યાગ્રણ છાવણી ખાતે એકઠા થઈને પોતાનો વિરોધ નોંધાવશે. આમ છતાં પ્રશ્નો ધ્યાને લેવામાં નહીં આવે તો 11 માર્ચથી ટેક્નિકલ અધિકારીઓ પ્રશ્નોનું નિરાકરણ ન આવે ત્યાં સુધી માસ સીએ. એલ. પર ઉતરશે જેવી જાહેરાત કરવામાં આવી છે. ટેક્નિકલ ઓફિસર્સના પ્રશ્નો અંગે અગાઉ પણ ઘણી રજૂઆતો કરવામાં આવેલી છે. જોકે આજદીન સુધી કોઈ ચોક્કસ નિરાકરણ ન આવતા હવે ગુજરાત મોટર વાહન વિભાગના ટેક્નિકલ અધિકારીઓમાં નારાજગી વ્યાપી ગઈ છે.
