ઓસ્ટ્રેલિયા-ઇંગ્લેન્ડના નહીં, આ ભારતીય બોલરને ગુરૂ માને છે જેમ્સ એન્ડરસન

• ભૂતપૂર્વ ભારતીય ફાસ્ટ બોલર ઝહીર ખાન પાસેથી બોલિંગમાં ઘણું શીખ્યું
  
• એન્ડરસન ભારત સામેની ટેસ્ટ સીરિઝમાં ઘણી સારી બોલિંગ કરી
  
• રાંચી ટેસ્ટમાં એન્ડરસને પોતાની બોલિંગની સાથે ફિલ્ડિંગથી પણ પ્રભાવિત કર્યા
  

ઈંગ્લેન્ડના ફાસ્ટ બોલર જેમ્સ એન્ડરસને હાલમાં જ ભારતના પૂર્વ દિગ્ગજ ફાસ્ટ બોલર ઝહીર ખાનને લઈને નિવેદન આપ્યું છે. એન્ડરસને કહ્યું કે તેણે ભૂતપૂર્વ ભારતીય ફાસ્ટ બોલર ઝહીર ખાન પાસેથી બોલિંગમાં ઘણું શીખ્યું છે. જ્યારે તેણે ભારતીય ઝડપી બોલર જસપ્રીત બુમરાહની બોલિંગની પણ પ્રશંસા કરી છે. તમને જણાવી દઈએ કે 41 વર્ષીય ફાસ્ટ બોલર જેમ્સ એન્ડરસન ભારત સામેની ટેસ્ટ સીરિઝમાં ઘણી સારી બોલિંગ કરી રહ્યો છે. હૈદરાબાદ ટેસ્ટમાંથી બહાર થયા બાદ એન્ડરસને વિશાખાપટ્ટનમ ટેસ્ટમાં શાનદાર વાપસી કરી હતી. આ પછી તે પ્લેઇંગ 11નો ભાગ બની રહ્યો છે. રાંચી ટેસ્ટમાં એન્ડરસને પોતાની બોલિંગની સાથે ફિલ્ડિંગથી પણ પ્રભાવિત કર્યા હતા.

ઝહીર ખાનની બોલિંગમાંથી ઘણું શીખવા મળ્યું

ઈંગ્લેન્ડનો દિગ્ગજ ઝડપી બોલર જેમ્સ એન્ડરસન લગભગ 21 વર્ષથી ટેસ્ટ ક્રિકેટ રમી રહ્યો છે. તેણે 2003માં ઝિમ્બાબ્વે સામે ટેસ્ટ ડેબ્યૂ કર્યું હતું. ત્યારથી તે ઈંગ્લેન્ડની ટેસ્ટ ટીમનો મહત્વનો ભાગ છે. આ દરમિયાન એન્ડરસને ઝહીર ખાનની બોલિંગ વિશે કહ્યું, ‘હું ઝહીર ખાનને તેની બોલિંગમાંથી શીખવા માટે ઘણી વખત જોતો હતો અને તે કેવી રીતે બોલને રિવર્સ સ્વિંગ કરતો હતો. દોડતી વખતે તે બોલને કેવી રીતે છુપાવતો હતો. આ જોયા પછી, હું મારી બોલિંગમાં પણ આ જ વસ્તુઓ અજમાવતો હતો.”

તમને જણાવી દઈએ કે ઝહીર ખાને ભારત માટે છેલ્લી ટેસ્ટ મેચ 2014માં રમી હતી. તે સમયે જેમ્સ એન્ડરસન તેની બોલિંગના પ્રાઈમ પર હતો. વિશ્વના દરેક બેટ્સમેન જેમ્સ એન્ડરસનને રમવાનું ટાળતા હતા. એન્ડરસનનો સ્વિંગ અને રિવર્સ સ્વિંગ તેની બોલિંગના મહત્વપૂર્ણ હથિયાર છે.

જસપ્રીત બુમરાહ ઘણો સારો બોલર

ભારતીય ટીમના સ્ટાર ફાસ્ટ બોલર જસપ્રીત બુમરાહની બોલિંગ પર જેમ્સ એન્ડરસને કહ્યું કે બુમરાહ ખૂબ જ ઝડપી બોલિંગ કરે છે. તેની સચોટ બોલિંગ રમવી કોઈપણ બેટ્સમેન માટે સરળ કામ નથી. તમને જણાવી દઈએ કે વિશાખાપટ્ટનમ ટેસ્ટની પ્રથમ ઈનિંગમાં ઓલી પોપને બુમરાહે શાનદાર યોર્કર કરીને ક્લીન બોલ્ડ કર્યો હતો. જેના પર જેમ્સ એન્ડરસને કહ્યું કે આ બોલ ફેંકવો બુમરાહ માટે ખૂબ જ સરળ કામ છે.

તેણે આ વાતને પોતાની બોલિંગમાં અપનાવી છે. તે હાલમાં વિશ્વનો નંબર વન ટેસ્ટ બોલર છે અને આ કોઈ સંયોગ નથી. તે એક શાનદાર ઝડપી બોલર છે. આ પછી એન્ડરસને કહ્યું કે ભારતમાં રિવર્સ સ્વિંગ ઘણી જોવા મળે છે અને તે મેચમાં ખૂબ મહત્વની ભૂમિકા ભજવે છે. ત્યારબાદ એન્ડરસને કહ્યું કે બુમરાહ, શમી અને સિરાજ વર્લ્ડ ક્લાસ ફાસ્ટ બોલર છે. અમે આમાં ઈશાંત શર્માને પણ સામેલ કરી શકીએ છીએ. જે બાદ આ બોલિંગ સિક્વન્સ વધુ ખતરનાક બની જાય છે.

જેમ્સ એન્ડરસન વર્લ્ડ રેકોર્ડથી 2 વિકેટ દુર

41 વર્ષના ફાસ્ટ બોલર જેમ્સ એન્ડરસને તેની ટેસ્ટ કરિયરમાં અત્યાર સુધીમાં 186 ટેસ્ટ મેચ રમી છે. તેણે ટેસ્ટમાં 698 ટેસ્ટ વિકેટ લીધી છે અને તે 700ના આંકડાને સ્પર્શવાથી માત્ર 2 વિકેટ દુર છે. જે બાદ તે ટેસ્ટમાં 700 વિકેટ લેનારો વિશ્વનો પ્રથમ ઝડપી બોલર બની જશે. જો કે, તેના પહેલા શ્રીલંકાના ભૂતપૂર્વ સ્પિનર અને દિવંગત ઓસ્ટ્રેલિયન લેગ સ્પિનર શેન વોર્ને ટેસ્ટમાં 700 વિકેટનો આંકડો સ્પર્શ કર્યો હતો.

હવે જો એન્ડરસન ધર્મશાલા ટેસ્ટમાં રમે છે અને 2 વિકેટ લે છે તો આ યાદીમાં એન્ડરસનનું નામ પણ સામેલ થઈ જશે. તમને જણાવી દઈએ કે એન્ડરસને તેની ઉંમર વિશે કહ્યું હતું કે તેનું શરીર હજુ પણ યુવા બોલર જેવું ફીલ કરે છે.