- ગોકળગાયની ગતિએ ચાલી રહેલી હાઈવેના સિક્સ લેનની કામગીરી હજુ કેટલાના ભોગ લેશે ?
- ઇજાગ્રસ્તને લીંબડીની સિવિલ હોસ્પિટલમાં સારવાર અર્થે ખસેડવામાં આવ્યા
- સદનસીબે અકસ્માતના બનાવમાં કોઈ જાનહાનિ થઈ ન હતી
લીંબડી હાઈવે પર સર્કિટ હાઉસ પાસે ગુરુવારે બપોરે 12 કલાકની આસપાસના સુમારે એસટી બસની વોલ્વો અને ધ્રોલ ડેપોની બસ સામસામે અથડાતા બંને બસના તેમજ બાઈક ચાલક તેમજ બંને બસના મુસાફરો મળીને કુલ 11 વ્યક્તિઓને ઇજાઓ પહોંચતા લીંબડી સિવિલ હોસ્પિટલ ખાતે ખસેડવામાં આવ્યા હતા.
બનાવની વધુમાં પ્રાપ્ત વિગત મુજબ લીંબડી સર્કિટ હાઉસ સામે જ રાજકોટથી અમદાવાદ તરફ્ જવા નીકળેલી એસટીની વોલ્વો બસના ચાલકે આગળ પુરપાટ ઝડપે આવી રહેલા બાઈક સવારને બચાવવા અચાનક બ્રેક મારતા સ્ટિયરિંગ પરનો કાબૂ ગુમાવ્યો હતો. એથી બસ સામેથી આવી રહેલી ધ્રોલ ડેપોની દાહોદ-રાજકોટ-ધ્રોલ રૂટની બસ સાથે અથડાઇ હતી. અકસ્માત બાદ હાઇવે પર ટ્રાફ્કિ જામની સમસ્યા સર્જાઇ હતી. વાહનોની લાંબી લાઇનો લાગી ગઇ હતી. ઘટનાની જાણ થતાં લીંબડી પોલીસ સ્ટેશનના સ્ટાફે દોડી જઈને જેસીબી અને ક્રેઇનની મદદથી વોલ્વો બસના કાચ તોડી તમામ ઇજાગ્રસ્ત મુસાફરોને બહાર કાઢીને તુરત જ લીંબડીની સિવિલ હોસ્પિટલમાં સારવાર અર્થે ખસેડવામાં આવ્યા હતા.
સિક્સ લેનની કામગીરી ક્યારે પૂર્ણ થશે !
વર્ષ 2023માં સિક્સલેનની કામગીરી પુર્ણ કરવાની સમયમર્યાદા પૂરી થઈ ગઈ હોય તેમ છતાં હજુ સુધી આ રોડ પર સિક્સલેનની કામગીરી હેઠળ ગમે ત્યારે રોડને અધ્ધવચ્ચેથી વન વે કરી નાખવામાં આવે છે. બસ આવી જ રીતે લીંબડી સર્કિટ હાઉસ સામે કામગીરી ચાલુ હોય હાઇવે વન વે કરાવ્યો હતો. જેમાં અચાનક આડા ઉતરેલા બાઇક સવારને બચાવવા જતાં વોલ્વો બસના ચાલકે સ્ટિયરિંગ પરનો કાબૂ ગુમાવતા સામેથી આવતી એસટી બસ સાથે અથડાતા અકસ્માત સર્જાયો હતો.
અકસ્માતના ઈજાગ્રસ્તોની યાદી
અર્જુનભાઈ નટુભાઈ, જયપાલભાઈ રાયમલભાઈ(બાઈક ચાલક, રહે. નટવરગઢ), હિતેશભાઈ નાગરભાઈ(રહે.દાહોદ), ઈલાબેન નિલેશભાઈ, (રહે. દાહોદ હડાળા), જલ્લાઉદીનભાઈ બચુભાઈ( રહે. સુરેન્દ્રનગર), હારૂનભાઈ સલિમભાઈ( રહે.ધ્રોલ), રાજેન્દ્રભાઈ વાલજીભાઈ દુલેરા(રહે. ટુવા), વિજયભાઈ અમૃતભાઈ(રહે. રાજકોટ), પટેલ ધ્રુવ અશોકભાઈ (રહે. મહેસાણા), ઈન્દ્રજીતભાઈ ભરતભાઈ(રહે.રાજકોટ), સિકંદર રફીકભાઈ(રહે. રળોલ).
વોલ્વો બસની કેબિનનો ખૂડદો બોલ્યો : ચાલકના બંને પગ ફસાયા
લીંબડી પાસેના ગમખ્વાર અકસ્માતના બનાવમાં વોલ્વો બસની કેબિનમાં ચાલકના બંને પગ દબાઈ જતા રેસ્કયુ ટીમે પતરા કાપીને મહામહેનતે બહાર કાઢીને હોસ્પિટલ ખસેડયો હતો.
ભારે કરી.? : મારુતિ વાન સાથે ટકરાતા આઈસર ટ્રકનો જોટો જ નીકળી ગયો !
અમદાવાદ જિલ્લા ગ્રામ્યમાં અકસ્માતોની વણથંભી વણઝાર અટકવાનું નામ જ નથી લેતી. બુધવારે મોડી રાત્રીએ ધંધૂકા રાયકા માર્ગ પર મારુતિવાન કાર અને આઈસર ટ્રક વચ્ચે વિચિત્ર અકસ્માત સર્જાયો હતો અકસ્માત એટલો જોરદાર હતો કે મારુતિ વાન સાથે ટ્રકની ટક્કર થતા આઈસરના પાછળના બન્ને ટાયરો જોટા સાથે અલગ થઈ ગયા હતા. સદનસીબે અકસ્માતના બનાવમાં કોઈ જાનહાનિ થઈ ન હતી.
