ગુજરાતમાં નવી સરકારી મેડિકલ કોલેજો ખોલવા મુદ્દે સરકારની ચુપ્પી

• સરકારીમાં સ્નાતક માટે 25 હજાર, GMERSમાં 3.30 લાખ ફી
• રાજ્યમાં છેલ્લા 30 વર્ષથી એક પણ સરકારી મેડિકલ કોલેજ ખૂલી નથી
  
• GMERS હેઠળની મેડિકલ કોલેજમાં મેનેજમેન્ટ ક્વોટામાં 9.07 લાખ સ્નાતકની ફી
  

ગુજરાત વિધાનસભા ગૃહમાં પ્રશ્નોત્તરી વખતે મેડિકલ કોલેજો અંગેનો સવાલ પૂછાયો હતો, છેલ્લા 30 વર્ષથી ગુજરાતમાં એક પણ સરકારી મેડિકલ કોલેજ ખૂલી નથી, માત્ર છ સરકારી મેડિકલ કોલેજ સિવાય તમામ સોસાયટી અને ખાનગી સંસ્થાઓ સંચાલિત કોલેજો છે, 80 ટકા બેઠકો સોસાયટી અને ખાનગી સંચાલિત જ્યારે 19 ટકા બેઠકો સરકારી મેડિકલ કોલેજોમાં છે. સરકારી મેડિકલ કોલેજમાં સ્નાતક માટે વાર્ષિક 25 હજાર, અનુસ્નાતકમાં 30 હજાર, ડિપ્લોમામાં 20 હજાર, સુપર સ્પેશ્યાલિટી કોર્સમાં 40 હજાર ફી છે, GMERS હેઠળની મેડિકલ કોલેજમાં સરકારી ક્વોટામાં 3.30 લાખ, મેનેજમેન્ટ ક્વોટામાં 9.07 લાખ સ્નાતકની ફી છે. ગરીબ-મધ્યમ વર્ગના વિદ્યાર્થી ઊંચી ફીના કારણે ડોક્ટર બની શકતા નથી, ગુજરાત સરકાર તમામ જિલ્લામાં સરકારી મેડિકલ કોલેજો ઊભી કરશે ખરા? અલબત્ત, રાજ્ય સરકારે તમામ જિલ્લામાં સરકારી મેડિકલ કોલેજ ખોલવા મુદ્દે સ્પષ્ટ ફોડ પાડયો ન હતો. GMERSમાં સરકારી મેડિકલ કોલેજ જેટલું ફીનું ધોરણ રખાશે તેવા સવાલના જવાબમાં સરકારે ગૃહમાં જણાવ્યું હતું કે, GMERS કોલેજમાં 72 ટકા વિદ્યાર્થીઓને સ્કોલરશીપ યોજના હેઠળ સહાય અપાય છે. રાજ્યમાં અત્યારે 40 મેડિકલ કોલેજ અંતર્ગત સ્નાતકની 7050 અને પીજી- અનુસ્નાતકની 2761 બેઠક ઉપલબ્ધ છે, વર્ષ 2027 સુધીમાં સ્નાતકની 8500, પીજીની 3700 બેઠક ઉપલબ્ધ બનશે.

સરકારી ઈજનેરી કોલેજોમાં વર્ગ-1ની 60% જગ્યા ખાલી

ગુજરાતમાં 33 જિલ્લા અને 8 શહેરોમાંથી ફક્ત 16 જિલ્લામાં સરકારી એન્જિનિયરિંગ કોલેજો કાર્યરત છે, જેમાં વર્ગ-1માં 316 જગ્યા- 60 ટકા જગ્યાખાલી છે, એ જ રીતે વર્ગ-2ની 14 ટકા-193 જગા, વર્ગ-3ની 55 ટકા- 300 અને વર્ગ-4ની 77 ટકા એટલે કે 201 જગ્યા ખાલી છે. સરકારે કહ્યું કે, પ્રાધ્યાપકો સહિત 1700 જગ્યા ભરાયેલી છે અને બાકીની જગ્યા વહેલી તકે ભરાશે.