કેજરીવાલે કોર્ટમાં હાજર થવુ જ પડશે, રાઉઝ એવન્યુ કોર્ટે ન આપી રાહત

દિલ્હીના મુખ્યમંત્રી અરવિંદ કેજરીવાલે 16 માર્ચ (શનિવાર)ના રોજ મેજિસ્ટ્રેટ કોર્ટમાં હાજર રહેવું પડશે. રાઉઝ એવન્યુ સ્થિત સેશન્સ કોર્ટે સમન્સ પર સ્ટે આપવાનો ઇનકાર કરી દીધો છે. દિલ્હીના મુખ્યમંત્રીએ સેશન્સ કોર્ટમાં વ્યક્તિગત હાજરીમાંથી મુક્તિ મેળવવા માટે અપીલ દાખલ કરી હતી. 

સ્પેશિયલ જજ રાકેશ સયાલે કહ્યું છે કે કાર્યવાહી પરનો સ્ટે ફગાવી દેવામાં આવે છે, પરંતુ જો તેઓ (કેજરીવાલ) હાજરીમાંથી મુક્તિ ઇચ્છતા હોય તો તેઓ ટ્રાયલ કોર્ટમાં અપીલ કરી શકે છે. એક પછી એક 8 સમન્સને અવગણવાને કારણે EDએ કેજરીવાલ વિરુદ્ધ ફરિયાદ દાખલ કરી હતી. સીએમ સામે આઈપીસીની કલમ 174 હેઠળ કેસ દાખલ કરવાની માંગ કરવામાં આવી હતી. મેજિસ્ટ્રેટ કોર્ટે તેમને બંને કેસમાં 16 માર્ચે હાજર થવા કહ્યું હતું.

કોર્ટે અરવિંદ કેજરીવાલને ED સમન્સની અવગણના કરવાના કેસમાં વ્યક્તિગત હાજરીમાંથી મુક્તિ મેળવવા માટે મેજિસ્ટ્રેટનો સંપર્ક કરવા જણાવ્યું છે. તમને જણાવી દઈએ કે, દિલ્હીના મુખ્યમંત્રી અરવિંદ કેજરીવાલે કથિત એક્સાઈઝ કૌભાંડ સંબંધિત મની લોન્ડરિંગ કેસમાં એન્ફોર્સમેન્ટ ડિરેક્ટોરેટ (ED) દ્વારા દાખલ કરવામાં આવેલી બે ફરિયાદો પર નીચલી અદાલત દ્વારા તેમને જાહેર કરાયેલા સમન્સને સેશન્સ કોર્ટમાં પડકાર્યો હતો. તેના સમન્સને અવગણવા બદલ EDએ નીચલી કોર્ટનો સંપર્ક કર્યો હતો.

EDએ જણાવ્યું હતું કે નવી ફરિયાદ આમ આદમી પાર્ટી (AAP) ના રાષ્ટ્રીય સંયોજક દ્વારા ફેડરલ તપાસ એજન્સી દ્વારા પ્રિવેન્શન ઓફ મની લોન્ડરિંગ એક્ટ (PMLA)ની કલમ 50 હેઠળ મોકલવામાં આવેલા સમન્સ નંબર ચારથી આઠનું સન્માન ન કરવા સંબંધિત છે. અગાઉ, EDએ મેજિસ્ટ્રેટ કોર્ટમાં અરજી દાખલ કરી હતી જેમાં હવે નિષ્ક્રિય દિલ્હી એક્સાઇઝ પોલિસી સંબંધિત મની લોન્ડરિંગ કેસમાં પ્રથમ ત્રણ સમન્સનું પાલન ન કરવા બદલ તેમની સામે કાર્યવાહીની માંગ કરવામાં આવી હતી.