રાજકોટ કબાગાંધીના ડેલા, આંબેડકરજીની પ્રતિમા તથા ધાર્મિક સ્થળોએ દર્શન કરી ઉમેદવારી કરતાં ધાનાણી
રાજકોટ લોકસભા બેઠક ઉપર આજે ફોર્મ ભરવાના છેલ્લા દિવસે શકિત પ્રદર્શન સાથે કોંગ્રેસના અને અમરેલીના વતની પરેશ ધીરજલાલ ધાનાણીએ રાજકોટ કલેકટર પ્રભવ જોશી સમક્ષ બપોરે ૧૨:૪૫ વાગ્યે પોતાનું ઉમેદવારી ફોર્મ રજૂ કર્યું હતું, આ સમયે રાજકોટ બેઠકના જનરલ ઓબ્ઝર્વર દેથા, એડી. કલેકટર ચેતન ગાંધી, ચૂંટણીના એડી. કલેકટર નારણ મૂછાર પણ ઉપસ્થિત રહ્યા હતા. પરેશ ધાનાણીના ટેકામાં આગેવાનો શહેર કોંગ્રેસ પ્રમુખ અતુલ રાજાણી, પ્રદેશ મહિલા કોંગ્રેસ અગ્રણી ગાયત્રીબા વાઘેલા, વશરામ સાગઠીયા, ભોળાભાઇ ગોહીલે ફોર્મ રજૂ કર્યા હતા. પરેશ ધાનાણીએ ફોર્મ રજૂ કર્યું ત્યારે પ્રદેશ કોંગ્રેસ પ્રમુખ શકિતસિંહજી ગોહીલ તથા અન્ય અગ્રણીઓ ખાસ ઉપસ્થિત રહ્યા હતા. પરેશ ધાનાણીએ લોકસભાની આ ચૂંટણી સ્વાભીમાન માટેની લડાઇ હોવાનું ગણાવ્યુ હતુ.
ઉમેદવારી ફોર્મ ભરતા પૂર્વે બહુમાળી ચોક ખાતે વિશાળ સ્વાભિમાન સભા યોજાઇ હતી, જેમાં પ્રદેશ કોંગ્રેસ પ્રમુખ શકિતસિંહ ગોહીલ, જગદીશ ઠાકોર, સિધ્ધાર્થ પટેલ, આમ આદમી પાર્ટીના ઇશુદાન ગઢવી, લલીત કગથરા, ગાયત્રીબા વાઘેલા, અશોકસિંહ વાઘેલા, ઇન્દ્રનીલ રાજયગુરૂ, ડો. હેમાંગ વસાવડા, અશોક ડાંગર, મહેશ રાજપૂત, હિતેશ વોરા, નિદત્ત બારોટ, ભાનુબેન સોરાણી, રણજીત મુંધવા વિગેરે સેંકડો આગેવાનો – કાર્યકરો હાજર રહ્યા હતા અને સભા બાદ શકિત પ્રદર્શન સાથે કલેકટર કચેરી ખાતે વાજતે- ગાજતે ફોર્મ રજૂ કર્યું હતું.
પરેશભાઇ ધાનાણીના ટેકામાં ડમી તરીકે ડો. હેમાંગ વસાવડાએ ફોર્મ રજૂ કર્યું હતું. તેમના ટેકેદારોમાં સંજય લાખાણી, ભાર્ગવ પઢીયાર, મહેશ રાજપૂત તથા રાજદિપસિંહ જાડેજાએ ફોર્મ રજૂ કર્યા હતા.
કિન્નરે ધાનાણીને જીતના આર્શિવાદ આપ્યા
ફોર્મ ભરતા પૂર્વે પરેશ ધાનાણીએ કબા ગાંધીના ડેલા ખાતે પૂ. ગાંધીજી તથા પૂ. કસ્તુરબાને સુતરની આંટી પહેરાવી આશીર્વાદ લીધા હતા. કબા ગાંધીના ડેલા ખાતે પરેશભાઇને એક કિન્નરે જીતના આશીર્વાદ આપ્યા હતા. બાદમાં હોસ્પિટલ ચોક ખાતે બાબાસાહેબ આંબેડકરજીની પ્રતિમાને ફુલહાર કર્યા હતા.
ક્ષત્રિય સમાજના બહેનોએ ધાનાણીને રાખડી બાંધી
ફોર્મ ભરતા પૂર્વે બહુમાળી ભવન ચોકમાં યોજાયેલી સભામાં ક્ષત્રિય સમાજના કેટલાક બહેનો ધાનાણીના સમર્થનમાં આવ્યા હતા. ક્ષત્રિયાણીઓએ જય ભવાનીના નારા સાથે પરેશ ધાનાણીને રાખડી બાંધીને વિજય માટે આર્શિવાદ આપ્યા હતા.
