- ઇઝરાયલના હુમલાથી વિફર્યા UN પ્રમુખ
- રાફામાં હુમલો કરતા 45 લોકોના મોત
- UN પ્રમુખે ઇઝરાયલી સખત શબ્દોમાં કરી નિંદા
ઇઝરાયલ હમાસ વચ્ચે ચાલી રહેલા યુદ્ધથી હવે યુએન બરાબરનું અકળાયુ છે. તાજેતરમાં ઇઝરાયલે રાફામાં હુમલો કરતા 45 લોકોના મોત થયા હતા. જે ઘટનાની યુએન દ્વારા સખત શબ્દોમાં નિંદા કરવામાં આવી છે.
UN વિફર્યુ
UN મહાસચિવ એન્ટોનિયો ગુટરેસે ઇઝરાયલી સેનાએ રાફા શહેરમાં કરેલા હુમલાની આકરી નિંદા કરી છે. તેમણે કહ્યું કે હુમલામાં નિર્દોષ લોકો માર્યા ગયા છે. જેઓ માત્ર યુદ્ધથી બચવા માટે જ આશ્રય લીધો હતો. તેમણે કહ્યું કે આ આતંક હવે ખતમ થવો જોઈએ. તાજેતરમાં જ ઈઝરાયેલમાં રાફામાં થયેલા હુમલામાં 45 લોકોના મોત થયા છે અને 200 લોકો ઘાયલ થયા છે.
ઈઝરાયેલ હુમલાની આકરી નિંદા કરી
સોશિયલ મીડિયા પર શેર કરેલી પોસ્ટમાં યુએન સેક્રેટરી-જનરલ એન્ટોનિયો ગુટેરેસે લખ્યું, ‘હું ઇઝરાયલની કાર્યવાહીની સખત નિંદા કરું છું, જેણે યુદ્ધની પરિસ્થિતિમાંથી આશરો મેળવી રહેલા ઘણા નિર્દોષ નાગરિકોની હત્યા કરી છે. ગાઝામાં હવે કોઈ સુરક્ષિત જગ્યા નથી અને આ આતંક બંધ થવો જોઈએ. યુએન માનવાધિકાર પરિષદના વડા વોલ્કર તુર્કે પણ ઈઝરાયેલના હુમલાની નિંદા કરી હતી. તેમણે એક નિવેદનમાં કહ્યું કે શરણાર્થી શિબિરોમાંથી જે તસવીરો આવી રહી છે તે ભયાનક છે અને ઈઝરાયેલની લડાઈની પદ્ધતિઓમાં કોઈ ફેરફાર થયો નથી. ઈઝરાયેલ-હમાસ યુદ્ધમાં અત્યાર સુધી મોટી સંખ્યામાં નાગરિકોના મોત થયા છે.
હમાસના બે ટોચના કમાન્ડર માર્યા ગયા
ઈઝરાયેલી સેનાએ એક નિવેદન જાહેર કરીને દાવો કર્યો છે કે આ હુમલામાં હમાસના બે ટોચના અધિકારીઓ માર્યા ગયા છે. ઈઝરાયેલની સેનાએ બંનેની ઓળખ પણ જાહેર કરી છે. ઈઝરાયેલે કહ્યું છે કે તેના હુમલામાં માર્યા ગયેલા ટોચના હમાસ નેતાઓની ઓળખ યાસિન રાબિયા અને ખાલેદ નજ્જર તરીકે થઈ છે. યાસીન રાબિયા જુડેયા અને સામારીમાં હમાસની આતંકી ગતિવિધિઓની જવાબદારી સંભાળતો હતો. જ્યારે નજ્જર જુડેયા અને સામારીમાં આતંકવાદી ગતિવિધિઓથી જોડાયેલો પ્રમુખ નેતા હતો. ઇઝરાયેલનો આ હુમલો તેલ અવીવ પર હમાસના રોકેટ હુમલા બાદ થયો છે, જેમાં હમાસે તેલ અવીવ પર આઠ રોકેટ છોડ્યા હતા.
ઈઝરાયેલના PMએ પોતાની ભૂલ સ્વીકારી
ઈઝરાયેલના વડાપ્રધાન બેન્જામિન નેતન્યાહુએ રાફા પર હુમલાને ભૂલ ગણાવીને તપાસની માંગ કરી છે. સોમવારે ઇઝરાયેલની સંસદ નેસેટને સંબોધતા પીએમ બેન્જામિન નેતન્યાહુએ કહ્યું કે અમે એ સુનિશ્ચિત કરવાનો પ્રયાસ કરીએ છીએ કે નિર્દોષ લોકોને નુકસાન ન થાય, પરંતુ દુર્ભાગ્યવશ આ પીડાદાયક ભૂલ ગઈકાલે રાત્રે થઈ અને અમે આ મામલે તપાસ કરી રહ્યા છીએ.
