Bangladeshની સ્થિતિને લઈ અમેરિકાએ આપ્યુ મોટુ નિવેદન, જાણો શું કહ્યું

• બાંગ્લાદેશમાં આરક્ષણના વિરોધમાં મોટાપાયે વિરોધ પ્રદર્શન થયા
  
• શેખ હસીનાને વડાપ્રધાન પદેથી રાજીનામું આપી દેશ છોડીને ભારત આવવાની ફરજ પડી હતી
  
• શેખ હસીનાને સત્તા પરથી હટાવવામાં અમેરિકાની કોઈ ભૂમિકા નથી
  

અમેરિકાએ ગયા અઠવાડિયે બાંગ્લાદેશમાં તખ્તાપલટ થવા પાછળ તેનો હાથ હોવાના આરોપોને નકારી કાઢ્યા છે. છેલ્લા ઘણા દિવસોથી બાંગ્લાદેશમાં આરક્ષણના વિરોધમાં મોટાપાયે વિરોધ પ્રદર્શન ચાલી રહ્યા હતા, પરંતુ 5 ઓગસ્ટના રોજ આ વિરોધ હિંસક બની ગયો હતો.

આ પછી શેખ હસીનાને વડાપ્રધાન પદેથી રાજીનામું આપી દેશ છોડીને ભારત આવવાની ફરજ પડી હતી. અમેરિકાએ એમ પણ કહ્યું કે અમેરિકા બાંગ્લાદેશની સ્થિતિ પર સતત નજર રાખશે. બાંગ્લાદેશમાં વિદ્યાર્થીઓના પ્રદર્શનને લઈને અમેરિકી રાષ્ટ્રપતિ કાર્યાલય વ્હાઈટ હાઉસે તેને બાંગ્લાદેશનો આંતરિક મામલો ગણાવ્યો અને અમેરિકન દખલગીરીના આરોપોને નકારી કાઢ્યા. વ્હાઈટ હાઉસના પ્રેસ સેક્રેટરી કરીન જીન પિયરે કહ્યું, “શેખ હસીનાને સત્તા પરથી હટાવવામાં અમેરિકાની કોઈ ભૂમિકા નથી. અમારી કોઈ સંડોવણી નથી. આ ઘટનાઓમાં અમેરિકન વહીવટીતંત્રની સંડોવણી અંગેના સમાચાર કે અફવા સંપૂર્ણપણે પાયાવિહોણા છે. આ સાચું નથી.”

અમેરિકા પહેલા દીકરાએ કહ્યું- આ ખોટું છે

જીન પિયરનું આ નિવેદન ત્યારે આવ્યું છે જ્યારે શેખ હસીનાના કથિત દાવાને મીડિયામાં ટાંકવામાં આવ્યો હતો કે જો તેમણે (હસીના) સેન્ટ માર્ટિન ટાપુ પરથી સંપ્રભુતા છોડી દીધી હોત અને બંગાળની ખાડી પર અમેરિકાને પોતાનું બેઝ બનાવવાની મંજૂરી આપી હોત તો તે સત્તામાં રહેતી. જોકે, બાદમાં શેખ હસીનાના પુત્ર સજીબ વાજેદે આ દાવાને સંપૂર્ણપણે નકારી કાઢ્યો હતો કે તેની માતાએ આવું કોઈ નિવેદન આપ્યું છે.

વાજેદે સોશિયલ મીડિયા પ્લેટફોર્મ પર પોતાની એક પોસ્ટમાં જણાવ્યું હતું “તેણે મને પુષ્ટિ આપી છે કે તેણે ઢાકા છોડ્યા પહેલા કે પછી કોઈ નિવેદન આપ્યું નથી.”

આ બાંગ્લાદેશના લોકોનો અધિકાર: અમેરિકા

બીજી તરફ વ્હાઈટ હાઉસે આ મામલે વધુમાં કહ્યું કે બાંગ્લાદેશના લોકોને તેમના ભવિષ્યનો નિર્ણય કરવાનો અધિકાર અને વિશેષાધિકાર છે. જીન પિયરે કહ્યું, “આ બાંગ્લાદેશી લોકો દ્વારા અને તેમના માટે લેવામાં આવેલ એક મહત્વપૂર્ણ નિર્ણય છે. અમે એમ પણ માનીએ છીએ કે બાંગ્લાદેશની જનતાએ તેમની સરકારનું ભવિષ્ય નક્કી કરવું જોઈએ. અમારા પર જે આરોપો લગાવવામાં આવી રહ્યા છે તે સાચા નથી.

બાંગ્લાદેશની સ્થિતિ પર વ્હાઈટ હાઉસે કહ્યું કે અમેરિકા બાંગ્લાદેશની સ્થિતિ પર સતત નજર રાખશે. એ પણ કહ્યું કે રાષ્ટ્રપતિ જો બાઈડેન માનવાધિકારના મુદ્દાઓ પર સ્પષ્ટ અને ખુલ્લેઆમ બોલવાનું ચાલુ રાખશે.