માલદીવના વિદેશ મંત્રી ડો.અબ્દુલ્લા ખલીલ 3 દિવસ માટે ભારતની મુલાકાતે આવ્યા છે. તેમની ભારત મુલાકાત સમગ્ર હિંદ મહાસાગર ક્ષેત્રને એક મજબૂત સંદેશ પણ આપી રહી છે. આ મુલાકાત એ વાતની સાક્ષી છે કે કેવી રીતે માલદીવે ચીનની દખલગીરી છોડી અને ભારત સાથેના તેના ઐતિહાસિક સંબંધોને પ્રાધાન્ય આપ્યું.
ભારતની આર્થિક મદદના કારણે માલદીવ સંકટમાંથી બહાર આવી શક્યો
તાજેતરના વર્ષોમાં માલદીવ રાજકીય અને આર્થિક સંકટનો સામનો કરી રહ્યું હતું. વિદેશી દેવું અને અસ્થિર નીતિઓએ દેશને નબળો પાડ્યો હતો, પરંતુ રાષ્ટ્રપતિ ડો. મોહમ્મદ મુઈઝુની સરકારે ભારત સાથે ઊંડી ભાગીદારીનો માર્ગ અપનાવીને આ પડકારોનો ઉકેલ લાવ્યો હતો. ભારતે ‘પ્રથમ સાથી’ની ભૂમિકા ભજવતા માલદીવને સમયસર આર્થિક મદદ કરી, જેના કારણે દેશ આર્થિક સંકટમાંથી બહાર આવી શક્યો. એટલું જ નહીં, ભારત સાથે ઉચ્ચ સ્તરીય મંત્રણા અને વિકાસ પરિયોજના ફરી એકવાર માલદીવને સ્થિરતા અને વિકાસ તરફ લઈ જવા માટે મદદરૂપ સાબિત થઈ રહી છે.
કેમ ચીનની રણનીતિ નિષ્ફળ ગઈ?
માલદીવ પર પોતાનો પ્રભાવ વધારવાના ચીનના પ્રયાસો કોઈ નવા નથી. ચીને મોટા ઈન્ફ્રાસ્ટ્રક્ચર પ્રોજેક્ટ્સ અને દેવાની જાળ દ્વારા માલદીવને તેના પક્ષમાં જીતવા માટેના તમામ સંભવિત પ્રયત્નો કર્યા. પરંતુ, માલદીવના નવા નેતૃત્વએ સ્પષ્ટ કર્યું કે તે તેના પરંપરાગત અને વિશ્વાસુ સાથી ભારતને પ્રાથમિકતા આપશે. ભારતની નો-સ્ટ્રિંગ-એટેચ્ડ પોલિસી અને પારદર્શક સહકારે માલદીવને એવો વિશ્વાસ અપાવ્યો કે ચીનની ડેટ-ટ્રેપ વ્યૂહરચના ક્યારેય પૂરી પાડી શકે નહીં. આ મુલાકાત દરમિયાન થયેલા કરારો અને ભારત દ્વારા પ્રસ્તાવિત વિકાસ પ્રોજેક્ટોએ ફરી એકવાર સાબિત કર્યું કે ભારતનો સહકાર લાંબા ગાળાના વિકાસ અને સ્થિરતા પર કેન્દ્રિત છે, નફાખોરી પર નહીં.
બંને દેશોની પ્રાથમિકતા સ્થાનિક વિકાસ અને લોકોનું સશક્તિકરણ
માલદીવના વિદેશ મંત્રી અને ભારતના વિદેશ મંત્રી ડૉ. એસ. જયશંકર વચ્ચે આજે યોજાયેલી બેઠકમાં આ સંદેશ સ્પષ્ટ થયો હતો. હાઈ ઈમ્પેક્ટ કોમ્યુનિટી ડેવલપમેન્ટ પ્રોજેક્ટ્સના ત્રીજા તબક્કા માટે કરાર દર્શાવે છે કે બંને દેશોની પ્રાથમિકતા સ્થાનિક વિકાસ અને લોકોનું સશક્તિકરણ છે. ભારતને માલદીવના સૌથી ભરોસાપાત્ર ભાગીદાર ગણાવતા ડૉ. ખલીલે કહ્યું કે, ભારતે દરેક પડકારમાં માલદીવને ટેકો આપ્યો છે. આ અમારી ભાગીદારીનો સુવર્ણકાળ છે.
હિંદ મહાસાગરમાં સ્પષ્ટ સંદેશ
આ પ્રવાસ ન માત્ર ભારત અને માલદીવ વચ્ચેના સંબંધોને મજબૂત કરી રહ્યો છે, પરંતુ હિંદ મહાસાગર ક્ષેત્રમાં શાંતિ અને સ્થિરતાનો સંદેશ પણ આપી રહ્યો છે. ચીનના પ્રભાવને પાછળ છોડીને માલદીવ ભારતની સાથે ઊભું છે અને સ્પષ્ટ કર્યું છે કે હિંદ મહાસાગરમાં કોઈ ત્રીજા દેશની દખલગીરીની જરૂર નથી.
