ઇન્ડિયન પ્રીમિયર લીગના ફેન્ચાઇઝી માલિકોએ વિદેશી ક્રિકેટ લીગમાં ઘણી મોટી ટીમ ખરીદી છે. હાલમાં જ મુંબઈ ઈન્ડિયન્સના માલિક મુકેશ અંબાણીની કંપની રિલાયન્સ ઇન્ડસ્ટ્રીઝ અને લખનૌ સુપર જાયન્ટ્સના માલિક સંજીવ ગોયન્કાએ ઈંગ્લેન્ડની ટુર્નામેન્ટ ધ હંડ્રેડમાં પોતાનો દાવ લગાવ્યો છે. હવે કાવ્યા મારનના પિતા કલાનિધિ મારનની કંપની સન નેટવર્ક પણ આ લીગમાં પ્રવેશી છે. IPLમાં રમી રહેલી સનરાઇઝર્સ હૈદરાબાદ ટીમ આ જૂથની છે. હવે તેનો જાદુ ધ હન્ડ્રેડમાં પણ જોવા મળશે.
કાવ્યા મારને નવી ટીમ ખરીદી
સન ગ્રુપે નોર્ધન સુપરચાર્જર્સમાં હિસ્સો ખરીદવા માટે સૌથી વધુ બોલી લગાવી છે, જેની યજમાન કાઉન્ટી યોર્કશાયર છે. સન ગ્રુપે સુપરચાર્જર્સનું 100% ફ્રેન્ચાઇઝી માટે મૂલ્ય 100 મિલિયન પાઉન્ડ (આશરે રૂ. 1000 કરોડ) આંક્યું, જે બે અન્ય રસ ધરાવતા પક્ષોને પાછળ છોડી દે છે.
મળતા અહેવાલો અનુસાર સન ગ્રુપ 100% ફ્રેન્ચાઇઝી ખરીદવા માટે સંમત થયું છે. તેનો અર્થ એ કે તેઓએ યોર્કશાયરના 51% હિસ્સા સાથે ECBનો 49% હિસ્સો ખરીદ્યો છે. સુપરચાર્જર્સ પહેલી ટીમ છે જે સંપૂર્ણપણે વેચાઈ ગઈ છે. યોર્કશાયર અને સન ગ્રુપ બંનેએ હવે હંડ્રેડના વેચાણના આઠ અઠવાડિયાની અંદર સોદો અંતિમ સ્વરૂપ આપવો પડશે.
સન ગ્રુપ પોર્ટફોલિયોમાં ત્રીજી ટીમ
તમને જણાવી દઈએ કે કાવ્યા મારન અત્યાર સુધી બે ટીમો સંભાળી રહી હતી. પરંતુ હવે સન ગ્રુપના પોર્ટફોલિયોમાં ત્રીજી ટીમ ઉમેરવામાં આવી છે. આ પહેલા સન ગ્રુપે 2012માં સનરાઇઝર્સ હૈદરાબાદને ખરીદ્યું હતું. આ ટીમે અત્યાર સુધીમાં એક વખત IPLનો ખિતાબ જીત્યો છે. જ્યારે 2023 માં તેણે દક્ષિણ આફ્રિકાની T20 લીગમાં સનરાઇઝર્સ ઇસ્ટર્ન કેપ ખરીદ્યું. આ ટીમે SA20 ની પહેલી બે સીઝનના ટાઇટલ જીત્યા છે. બીજી તરફ, નોર્ધન સુપરચાર્જર્સે હજુ સુધી ધ હન્ડ્રેડમાં એક પણ ટાઇટલ જીત્યું નથી. ગયા સિઝનમાં બંને ટીમો પુરુષો કે મહિલા સ્પર્ધામાં ચોથા સ્થાને રહી હતી.
