આજકાલ વધુને વધુ પૈસા કમાવવા માટે, ક્રિકેટરોએ આંતરરાષ્ટ્રીય ક્રિકેટ રમવાની સાથે ખાનગી ટુર્નામેન્ટમાં ભાગ લેવાનું શરૂ કર્યું છે. આ સમય દરમિયાન, ઘણા ખેલાડીઓ રાષ્ટ્રીય ટીમ કરતાં તેમની ફ્રેન્ચાઈઝી ટીમને વધુ મહત્વ આપતા જોવા મળે છે.
આ દરમિયાન એક ચોંકાવનારો કિસ્સો સામે આવ્યો છે. શ્રીલંકાના સ્ટાર ઓલરાઉન્ડર દાસુન શનાકા મોટી મુશ્કેલીમાં હોય તેવું લાગે છે. તેના પર દુબઈમાં T20 લીગમાં ભાગ લેવા માટે શ્રીલંકામાં યોજાઈ રહેલી એક સ્થાનિક ટુર્નામેન્ટની મેચ અધવચ્ચે છોડી દેવાનો આરોપ છે. આ કારણોસર, હવે શ્રીલંકા ક્રિકેટ આ મામલાની તપાસ કરશે.
દાસુન શનાકા સામે તપાસ કરી રહી છે SLC
તમને જણાવી દઈએ કે આ આખો મામલો 2 ફેબ્રુઆરીનો છે. શનાકાએ અગાઉ શ્રીલંકામાં સિંહાલીઝ સ્પોર્ટ્સ ક્લબ માટે ફર્સ્ટ-ક્લાસ મેચ રમી હતી અને સદી ફટકારી હતી. તેની વિકેટ પડ્યાના થોડા સમય પછી, તેની ટીમ ઓલઆઉટ થઈ ગઈ. આ પછી રમત ચાલુ રહી અને બે સત્ર થયા. સિંહાલીઝ સ્પોર્ટ્સ ક્લબની બોલિંગ દરમિયાન શનાકા ફિલ્ડિંગમાં આવ્યો ન હતો કારણ કે તેને બેટિંગ કરતી વખતે માથામાં ઈજા થઈ હતી અને તેને આરામ કરવાનું કહેવામાં આવ્યું હતું. તેની જગ્યાએ બીજા કોઈ ખેલાડીએ ફિલ્ડિંગ કરી.
શનાકા સામે તપાસ કરશે બોર્ડ
પરંતુ થોડા કલાકો પછી, શનાકા દુબઈમાં એક આંતરરાષ્ટ્રીય T20 લીગ મેચમાં બેટિંગ કરતો જોવા મળ્યો. દુબઈ કેપિટલ્સ તરફથી રમતી વખતે તેને 12 બોલમાં 34 રન બનાવ્યા હતા. આ સમય દરમિયાન આશ્ચર્યજનક વાત એ હતી કે દુબઈ જતા પહેલા, શનાકાએ સિંહાલીઝ સ્પોર્ટ્સ ક્લબ અને શ્રીલંકા ક્રિકેટને મેચ અધવચ્ચે જ છોડી દેવાની જાણ કરી ન હતી. આ કારણે, હવે બોર્ડ શનાકા સામે તપાસ કરશે. હવે એ જોવું રસપ્રદ રહેશે કે જો તપાસમાં શનાકા દોષિત સાબિત થાય છે તો તેને શું સજા મળે છે.
ડેઝર્ટ વાઈપર્સને હરાવીને ટ્રોફી કરી કબજે
દુબઈ પરત ફર્યા બાદ, શનાકાએ ફાઈનલ સહિત કુલ ત્રણ મેચ રમી. શનાકાની ટીમ આ વખતે ટુર્નામેન્ટની ફાઈનલમાં જગ્યા બનાવવામાં સફળ રહી અને ડેઝર્ટ વાઈપર્સને હરાવીને ટ્રોફી કબજે કરવામાં સફળ રહી. ફાઈનલમાં શનાકાએ 10 બોલમાં 21 રન બનાવ્યા.
