દિલ્હી કેપિટલ્સ ટીમે WPL 2025 ની પોતાની પહેલી મેચમાં મુંબઈ ઈન્ડિયન્સને 2 વિકેટથી હરાવ્યું. આ રોમાંચક મેચમાં દિલ્હીની ટીમ છેલ્લી ઓવરમાં જીતી ગઈ. દિલ્હી કેપિટલ્સની કેપ્ટન મેગ લેનિંગે ટોસ જીતીને પહેલા બોલિંગ કરવાનો નિર્ણય લીધો.
ત્યારબાદ મુંબઈએ 164 રન બનાવ્યા, જે દિલ્હીએ શેફાલી વર્મા અને નિક્કી પ્રસાદની મદદથી હાંસલ કર્યા.
દિલ્હી કેપિટલ્સ છેલ્લા બોલ પર જીત્યું મેચ
દિલ્હી કેપિટલ્સની ટીમને છેલ્લી ઓવરમાં જીત માટે 10 રનની જરૂર હતી. ત્યારે રાધા યાદવ અને નિક્કી પ્રસાદ ક્રીઝ પર હાજર હતા. મુંબઈ માટે બોલિંગની જવાબદારી એસ. સજનાએ સંભાળી. નિક્કીએ તેના પહેલા બોલ પર ચોગ્ગો ફટકાર્યો, પરંતુ તે પાંચમા બોલ પર આઉટ થઈ ગઈ.
આ પછી, દિલ્હીને છેલ્લા બોલ પર બે રનની જરૂર હતી, પરંતુ આ બોલ પર હાઈ વોલ્ટેજ ડ્રામા જોવા મળ્યો. જ્યારે અરુંધતી રેડ્ડીએ પોતાનો બીજો રન પૂર્ણ કર્યો, ત્યારે તે હરમનપ્રીતના થ્રો પર રન આઉટ થવાથી માંડ માંડ બચી ગઈ. રિપ્લે જોતાં એવું જોવા મળ્યું કે બોલ સ્ટમ્પ પર વાગે તે પહેલાં અરુંધતી રેડ્ડી ક્રીઝ પર પહોંચી ગઈ અને આ રીતે દિલ્હીની ટીમ મેચ જીતી ગઈ.
દિલ્હીએ સૌથી વધુ સફળ રન ચેઝનો કર્યો પીછો
દિલ્હી કેપિટલ્સ ટીમે 165 રનના લક્ષ્યાંકનો પીછો કરીને ઈતિહાસ રચ્યો છે. WPLમાં દિલ્હીની ટીમ દ્વારા આ સૌથી વધુ સફળ રન ચેઝ છે. આ પહેલા દિલ્હીની ટીમ WPLમાં આટલા મોટા લક્ષ્યનો પીછો કરી શકી ન હતી. દિલ્હી તરફથી મુંબઈ સામે શેફાલી વર્માએ સૌથી વધુ 43 રન અને નિક્કી પ્રસાદે 35 રન બનાવ્યા. આ ખેલાડીઓના કારણે જ દિલ્હીની ટીમ મેચ જીતવામાં સફળ રહી.
નેટ સીવર-બ્રન્ટ જોરદાર અડધી સદી ફટકારી
નેટ સીવર બ્રન્ટે 80 રનની અણનમ ઈનિંગમાં 13 ચોગ્ગા ફટકાર્યા. કેપ્ટન હરમનપ્રીત કૌરે પણ 22 બોલમાં 42 રન બનાવ્યા. બંનેએ ત્રીજી વિકેટની ભાગીદારીમાં 40 બોલમાં 73 રન કર્યા. દિલ્હીના બોલરોએ શાનદાર વાપસી કરી, 59 રનમાં 8 વિકેટ લીધી અને મુંબઈને 19.1 ઓવરમાં 164 રનમાં ઓલઆઉટ કરી દીધું. પાવરપ્લેના 6 ઓવર પછી, મુંબઈનો સ્કોર બે વિકેટે 42 રન હતો. એલિસ કેપ્સીએ એક ઓવરમાં 19 રન આપ્યા. રાધા યાદવની આઠમી ઓવરમાં નેટ સીવર બ્રન્ટ અને હરમનપ્રીતે 18 રન બનાવ્યા, જેમાં ત્રણ ચોગ્ગા અને એક છગ્ગાનો સમાવેશ થયો.
શિખા પાંડેએ લીધી બે વિકેટ
ઝડપી બોલર શિખા પાંડેએ 14 રન આપીને બે વિકેટ લીધી, જ્યારે મિન્નુ મણિએ આર્થિક બોલિંગ કરી અને 23 રન આપીને 1 વિકેટ લીધી. બાકીના બોલરોએ ઘણા રન આપ્યા. શિખાએ બંને ઓપનર હેલી મેથ્યુઝ (0 રન) અને યાસ્તિકા ભાટિયા (11 રન) ને પેવેલિયન મોકલી દીધા.
