આગામી ચેમ્પિયન્સ ટ્રોફી 19 ફેબ્રુઆરીથી શરૂ થવા જઈ રહી છે. પહેલી મેચ પાકિસ્તાન અને ન્યુઝીલેન્ડ વચ્ચે રમાશે. આ મેગા ઈવેન્ટમાં કુલ 8 ટીમો ભાગ લેવા માટે તૈયાર છે. ચેમ્પિયન્સ ટ્રોફી માટે હિન્દી કોમેન્ટ્રી પેનલની જાહેરાત કરવામાં આવી છે, જેમાં સુરેશ રૈના સિવાય હરભજન સિંહ જેવા અનુભવી ખેલાડીઓને તક મળી છે.
આ દિગ્ગજોને આપવામાં આવી તક
ચેમ્પિયન્સ ટ્રોફી માટે હિન્દી કોમેન્ટ્રી પેનલમાં સુરેશ રૈના, હરભજન સિંહ, વકાર યુનિસ, રોબિન ઉથપ્પા, મોહમ્મદ કૈફ, અંબાતી રાયડુ, વહાબ રિયાઝ, પીયૂષ ચાવલા, વરુણ એરોન, જતીન સપ્રુ, આકાશ ચોપરા, સંજય માંજરેકર, સંજય બાંગર, દીપ દાસગુપ્તાને તક મળી છે.
દર્શકો માટે, નેટવર્કે હિન્દી કોમેન્ટ્રી પેનલમાં ઘણા દિગ્ગજોને સ્થાન આપ્યું છે. સ્વાભાવિક છે કે આ ભૂતપૂર્વ ખેલાડીઓ ચેમ્પિયન્સ ટ્રોફીમાં પોતાની ઉત્તમ કોમેન્ટ્રીથી દર્શકોના દિલ જીતી લેશે. ભૂતપૂર્વ ભારતીય ખેલાડીઓ સિવાય બે ભૂતપૂર્વ પાકિસ્તાની દિગ્ગજ વકાર યુનિસ અને વહાબ રિયાઝને પણ તક મળી છે.
તમે ચેમ્પિયન્સ ટ્રોફી ક્યાં જોઈ શકો છો?
ચેમ્પિયન્સ ટ્રોફીનું સ્ટાર સ્પોર્ટ્સ નેટવર્ક પર લાઈવ ટેલિકાસ્ટ કરવામાં આવશે. આ સિવાય દૂરદર્શન પર ભારતની મેચો પણ મફતમાં જોઈ શકાશે. મેચનું લાઈવ સ્ટ્રીમિંગ જિયો સ્ટાર પર કરવામાં આવશે. ક્રિકેટપ્રેમી આ મેગા ઈવેન્ટની આતુરતાથી રાહ જોઈ રહ્યા છે.
ચેમ્પિયન્સ ટ્રોફી માટે ટીમ ઈન્ડિયાનું શેડ્યુલ
ચેમ્પિયન્સ ટ્રોફી 2025માં, ભારતીય ટીમ 20 ફેબ્રુઆરીએ બાંગ્લાદેશ સામે પોતાની પહેલી મેચ રમશે. બીજી મેચ 23 ફેબ્રુઆરીએ પાકિસ્તાન સામે રમાશે. ભારતીય ટીમે લીગ સ્ટેજની છેલ્લી મેચ 2 માર્ચે ન્યુઝીલેન્ડ સામે રમવાની છે. આ બધી મેચ દુબઈ ઈન્ટરનેશનલ સ્ટેડિયમમાં રમાશે. ખાસ વાત એ છે કે ભારતીય ટીમ આ મેદાન પર એક પણ ODI મેચ હાર્યું નથી. આ મેદાન પર ભારતનો રેકોર્ડ ખૂબ પ્રભાવશાળી છે.
