ચેમ્પિયન્સ ટ્રોફી 2025ની બીજી મેચ ટીમ ઈન્ડિયા અને બાંગ્લાદેશ વચ્ચે દુબઈમાં રમાશે. સામાન્ય રીતે બાંગ્લાદેશની ટીમ તેના સ્પિન અટેક માટે જાણીતી છે. પરંતુ 20 ફેબ્રુઆરીના રોજ મેચમાં પ્રવેશતા પહેલા બાંગ્લાદેશના કેપ્ટન નઝમુલ હસન શાંતોએ ભારત સામે જીત મેળવવા માટે પોતાના પેસ અટેક પર વિશ્વાસ વ્યક્ત કર્યો. જેનું સૌથી મોટું કારણ 22 વર્ષનો યુવાન બોલર છે. અહીં વાત કરી રહ્યા છીએ નાહિદ રાણા વિશે. જે સતત 150 માઇલ પ્રતિ કલાકથી વધુની ઝડપે બોલિંગ કરવામાં નિષ્ણાંત છે. તે દુબઈમાં ભારતીય ટીમ માટે સૌથી મોટો ખતરો સાબિત થઈ શકે છે.
શું નાહિદ રાણા બદલાવ લાવી શકશે?
બાંગ્લાદેશની ટીમ ભારત કરતાં નબળી હોઈ શકે છે. પરંતુ નાહિદ રાણાના રૂપમાં, તેમની પાસે એક એવું બ્રહ્માસ્ત્ર છે જે દુબઈમાં ઉથલપાથલ મચાવી શકે છે. 6 ફૂટ 5 ઇંચ ઊંચા રાણાએ ગયા વર્ષે જ ડેબ્યૂ કર્યું હતું, પરંતુ પોતાની સ્પીડને કારણે તેણે ઝડપથી પોતાનું નામ બનાવ્યું છે. બાંગ્લાદેશ માટે સૌથી ઝડપી બોલ ફેંકવાનો રેકોર્ડ પણ તેમના નામે છે. 152 ની ઝડપે બોલિંગ કરીને આ સિદ્ધિ હાંસલ કરવામાં આવી હતી. ગયા વર્ષે પાકિસ્તાન સામેની ટેસ્ટ શ્રેણી દરમિયાન, રાણાએ તેની ગતિથી તેના બેટ્સમેનોને ખૂબ જ પરેશાન કર્યા હતા.
દુબઇમાં કેવુ રહેશે પર્ફોમન્સ તેની પર નજર
દુબઈની પીચ પર નાહિદ રાણાની ઊંચાઈ અને તેની ગતિ તેના માટે ફાયદાકારક સાબિત થઈ શકે છે. આનાથી તેને વધુ ઉછાળો મળી શકે છે, જે તેને દુબઈમાં ખતરનાક બનાવી શકે છે. જોકે, ગયા વર્ષે ટેસ્ટ શ્રેણી દરમિયાન ભારતના પ્રવાસ દરમિયાન તે બહુ સફળ રહ્યો ન હતો. ચેન્નાઈ ટેસ્ટની પહેલી ઇનિંગમાં તેણે 82 રન આપીને 1 વિકેટ લીધી હતી અને બીજી ઇનિંગમાં તેણે 21 આપીને 1 વિકેટ લીધી હતી. પરંતુ તેનાથી ભારતીય બેટ્સમેનોને મુશ્કેલી પડી. હવે દુબઈમાં પણ તે રોહિત શર્મા અને વિરાટ કોહલી સહિત ટીમ ઈન્ડિયાના અન્ય બેટ્સમેન માટે મુશ્કેલીનું કારણ બની શકે છે. બાંગ્લાદેશી કેપ્ટન શાંતોએ પણ ભારતીય ટીમ સામે સફળતા મેળવવા માટે રાણાની બોલિંગને મહત્વપૂર્ણ ગણાવી છે.
રાણાનો રેકોર્ડ
નાહિદ રાણાને આંતરરાષ્ટ્રીય ક્રિકેટનો બહુ અનુભવ નથી. પરંતુ તે એક યુવા પેસ સેન્સેશન તરીકે ઉભરી આવ્યો છે. અત્યાર સુધીમાં તેણે 6 ટેસ્ટ મેચમાં 20 વિકેટ લીધી છે. જ્યારે રાણાએ 3 ODI મેચોમાં 4 વિકેટ લીધી છે. પરંતુ લિસ્ટ A માં તેનો રેકોર્ડ ઉત્તમ છે. તેણે 13 મેચોમાં માત્ર 18.46 ની સરેરાશથી 30 વિકેટ લીધી છે.
ટીમ ઇન્ડિયા શોધી રહી છે ઉકેલ
ભારતીય ટીમ પહેલાથી જ આ ખતરાની જાણકાર છે. એટલા માટે જ ટીમએ તૈયારી શરૂ કરી દીધી છે. રિપોર્ટ અનુસાર બોલિંગ મશીન પર 150 થી વધુની ગતિ સેટ કરીને પ્રેક્ટિસ હાથ ધરવામાં આવી રહી છે. એટલું જ નહીં, સ્થાનિક બોલરોને પણ ટૂંકા રન અપ સાથે બોલિંગ કરવાનું કહેવામાં આવ્યું છે.
