ICC ચેમ્પિયન્સ ટ્રોફી 2025માં પાકિસ્તાની ટીમની સફર ખૂબ જ શરમજનક રીતે સમાપ્ત થઈ. ટીમ આ ટુર્નામેન્ટમાં એક પણ મેચ જીતી શકી નહીં અને પોઈન્ટ ટેબલમાં ચોથા નંબર પર રહી.
ચેમ્પિયન્સ ટ્રોફીમાં પાકિસ્તાન ટીમની સફર સમાપ્ત થયા પછી, ઓપનિંગ બેટ્સમેન ઈમામ ઉલ હકે તેના સાથી ખેલાડીઓ પર ગંભીર આરોપો લગાવીને વિવાદાસ્પદ નિવેદન આપ્યું છે.
ઈમામ ઉલ હકે ટીમ પર લગાવ્યો મોટો આરોપ
હાલમાં, ખરાબ તબક્કામાંથી પસાર થઈ રહેલી પાકિસ્તાની ટીમમાં સતત ફેરફારો થઈ રહ્યા છે. છેલ્લા 2 વર્ષમાં ટીમમાં 3 કેપ્ટન રહ્યા છે. જેમાં બાબર આઝમ, શાહીન શાહ આફ્રિદી અને મોહમ્મદ રિઝવાનના નામ સામેલ છે. હાલમાં, મોહમ્મદ રિઝવાન ODI અને T20 ફોર્મેટમાં કેપ્ટનશીપ કરી રહ્યા છે, જ્યારે ટેસ્ટમાં આ જવાબદારી શાન મસૂદને સોંપવામાં આવી છે.
ચેમ્પિયન્સ ટ્રોફીમાં શરમજનક પ્રદર્શન બાદ, ઓપનર ઈમામ ઉલ હકે એક ઈન્ટરવ્યુમાં ડ્રેસિંગ રૂમનું કાળું સત્ય જાહેર કર્યું છે. સોશિયલ મીડિયા પર વાયરલ થઈ રહેલા વીડિયોમાં, જ્યારે ઈમામ ઉલ હકને પૂછવામાં આવ્યું કે નેતા શબ્દ સાંભળ્યા પછી તેમના મનમાં કોનું નામ આવે છે, ત્યારે તેમનો જવાબ આશ્ચર્યજનક હતો. આ પ્રશ્નના જવાબમાં ઈમામે કહ્યું, ‘મારા મગજમાં કોઈ નેતાનું નામ નથી આવી રહ્યું, બધા એકબીજા સાથે લડી રહ્યા છે.’ વાયરલ વીડિયો ક્યા સમયનો છે તે અત્યારે કહી શકાય નહીં.
હોમ ગ્રાઉન્ડ પર પાકિસ્તાન ટીમનું શરમજનક પ્રદર્શન
પાકિસ્તાન ટીમે ICC ચેમ્પિયન્સ ટ્રોફી 2025માં 3 મેચ રમી હતી. જેમાં તેની ટીમને 2 મેચમાં હારનો સામનો કરવો પડ્યો હતો. જ્યારે એક મેચ વરસાદને કારણે રદ્દ થઈ હતી. પાકિસ્તાનની ટીમે 2017માં ચેમ્પિયન્સ ટ્રોફી જીતી હતી. આ પરિસ્થિતિમાં, ફેન્સને આશા હતી કે તેમની ટીમ ટાઈટલ બચાવવામાં સફળ થશે. ટાઈટલ બચાવવાની વાત તો ભૂલી જાઓ, મોહમ્મદ રિઝવાનની ટીમ એક પણ મેચમાં ટક્કર આપી શકી નહીં. મીડિયા રિપોર્ટ મુજબ પાકિસ્તાની ટીમમાં ટૂંક સમયમાં મોટા ફેરફારો થઈ શકે છે.
