ભારતીય ક્રિકેટ ટીમે રવિવારે દુબઈમાં ન્યુઝીલેન્ડને હરાવીને ચેમ્પિયન્સ ટ્રોફીનો ખિતાબ જીતી લીધો છે. આ જીત સાથે કેપ્ટન રોહિત શર્માએ છેલ્લા એક વર્ષમાં તેની બેટિંગ અને કેપ્ટનશીપ પર સવાલ ઉઠાવનારા ટીકાકારોને યોગ્ય જવાબ આપ્યો હતો. આ શાનદાર જીત પછી રોહિતે વનડેમાંથી નિવૃત્તિની અટકળોને પણ ફગાવી દીધી છે.
નિવૃત્તિને લઇને શું બોલ્યા રોહિત ?
ફાઇનલ પછી પ્રેસ કોન્ફરન્સમાં જ્યારે તેમને તેમની ભવિષ્યની યોજનાઓ વિશે પૂછવામાં આવ્યું ત્યારે તેમણે આ વાતની પુષ્ટિ કરી હતી. ઉલ્લેખનીય છે કે ઓસ્ટ્રેલિયા પ્રવાસના સમયથી જ રોહિતની કેપ્ટનશીપ અને ટીમમાં તેના સ્થાન અંગે અટકળો ચાલી રહી હતી. પરંતુ ન્યુઝીલેન્ડ સામેની ફાઇનલમાં તેની 76 રનની ઇનિંગ તેની કારકિર્દી માટે જીવનરક્ષક સાબિત થઈ. “હું ODI ફોર્મેટમાંથી નિવૃત્તિ લેવાનો નથી. કૃપા કરીને અફવાઓ ફેલાવશો નહીં,” તેમણે ફાઇનલમાં ન્યુઝીલેન્ડ સામે ચાર વિકેટથી જીત મેળવ્યા બાદ એક પ્રેસ કોન્ફરન્સમાં આ વાત સ્પષ્ટ કરી હતી.
ફાઇનલ મેચમાં, રોહિત શર્માએ ભારતને ધમાકેદાર શરૂઆત અપાવી અને પોતાની અડધી સદીની ઇનિંગથી ન્યૂઝીલેન્ડને શરૂઆતથી જ બેકફૂટ પર મૂકી દીધું હતું તે સદી ફટકારવા માટે તૈયાર દેખાતો હતો પરંતુ સ્પિનર સામે શોટ લેવાનો પ્રયાસ કરતી વખતે સ્ટમ્પ થઈ ગયો. આમ છતાં, તેમણે ટીમને મજબૂત સ્થિતિમાં મૂકી હતી.
રોહિતે નિવૃત્તિની અફવાઓનો અંત લાવ્યો
ફાઇનલ પહેલા એવી ચર્ચા હતી કે રોહિત વનડેમાંથી નિવૃત્તિની જાહેરાત કરી શકે છે, પરંતુ તેણે મેચ પછી પ્રેસ કોન્ફરન્સમાં આ અંગે સ્પષ્ટતા કરી હતી. રોહિતે કહ્યું, ‘હું વનડેમાંથી નિવૃત્તિ નથી લઈ રહ્યો.’ હું આ સ્પષ્ટ કરવા માંગુ છું જેથી કોઈ અફવાઓ ન ફેલાય. હાલ કોઈ ભવિષ્યની યોજના નથી, જે કંઈ થઈ રહ્યું છે તે ચાલુ રહેશે.
સ્પિનરો ભારતની જીતના સૌથી મોટા હીરો
રોહિતે વધુમાં કહ્યું કે અમારા સ્પિનરોએ શાનદાર પ્રદર્શન કર્યું. તે અમારી બોલિંગનો આધારસ્તંભ હતો અને ક્યારેય નિરાશ નહોતો કરતો. ચક્રવર્તી જેવા બોલરની ખાસિયત એ છે કે તે પિચ દ્વારા મળતી મદદનો સંપૂર્ણ લાભ લે છે.
