મુંબઈ ઈન્ડિયન્સે ગુજરાત જાયન્ટ્સને 9 રને હરાવ્યું છે. મુંબઈના બ્રેબોર્ન સ્ટેડિયમ ખાતે રમાયેલી આ મેચમાં, મુંબઈએ પ્રથમ બેટિંગ કરતા 179 રનનો વિશાળ સ્કોર બનાવ્યો હતો. જેના જવાબમાં, ગુજરાતની ટીમ 20 ઓવરમાં માત્ર 170 રન જ બનાવી શકી.
ગુજરાતની અડધી ટીમ 70 રનના સ્કોર પર આઉટ થઈ ગઈ, પરંતુ ભારતી ફૂલમાલીની 61 રનની તોફાની ઈનિંગ્સે મેચમાં જોશ તો ભરી દીધો, પરંતુ ટીમને વિજય તરફ દોરી ન શકી.
છેલ્લી મેચમાં હારી ગયું ગુજરાત
WPL 2025 ના લીગ તબક્કામાં ગુજરાત જાયન્ટ્સની આ છેલ્લી મેચ હતી. મુંબઈને હરાવીને, તેમના માટે સીધા ફાઈનલમાં જવાના દરવાજા ખુલી શક્યા હોત, પરંતુ છેલ્લી 2 ઓવરમાં, MI બોલરોએ આખી મેચ પલટી નાખી. હકીકતમાં, મેચ ત્યાંથી જ પલટાઈ ગઈ જ્યારે એમેલિયા કેરે 17મી ઓવરમાં ભારતી ફૂલમાલીની વિકેટ લીધી. ત્યારબાદ, ગુજરાતના નીચલા ક્રમના બેટ્સમેન દબાણમાં પડી ગયા.
ફૂલમાલીનું તોફાની ઈનિંગ
180 રનના લક્ષ્યાંકનો પીછો કરતા ગુજરાત જાયન્ટ્સે 70 રનના સ્કોરે 5 વિકેટ ગુમાવી દીધી. અહીંથી, ભારતી ફૂલમાલી નામના તોફાનમાં મુંબઈના બોલરો ઉડતા જોવા મળ્યા. તેણે માત્ર 22 બોલમાં પોતાની ફિફ્ટી પૂરી કરી અને 61 રનની તોફાની ઈનિંગથી મેચમાં ધૂમ મચાવી દીધી. ભારતીએ આ ઈનિંગમાં 8 ચોગ્ગા અને 4 જબરદસ્ત છગ્ગા પણ ફટકાર્યા. એક સમયે, તેણે મેચમાં થોડો જીવ ઉમેર્યો હતો, પરંતુ જ્યારે ટીમને જીતવા માટે 38 રનની જરૂર હતી, ત્યારે ભારતી ધીમા બોલથી છેતરાઈ ગઈ અને આઉટ થઈ ગઈ.
કેપ્ટન હરમનપ્રીત કૌરે મચાવી ધૂમ
7મી ઓવરના છેલ્લા બોલ પર હેલી મેથ્યુઝ 27 રન બનાવીને આઉટ થયા બાદ કેપ્ટન હરમનપ્રીત કૌર બેટિંગ કરવા આવી. હરમનપ્રીતે પહેલા 10 બોલમાં ખૂબ જ ધીમે ધીમે રન બનાવ્યા, પરંતુ ઈનિંગની 11મી ઓવર શરૂ થતાં જ તેણે ઝડપી શોટ મારવાનું શરૂ કરી દીધું. હરમનપ્રીતે 31 બોલમાં પોતાની ફિફ્ટી પૂરી કરી અને તેની ઈનિંગ 33 બોલમાં ૫૪ રનના સ્કોર પર આઉટ થઈ.
નેટ સાયવર-બ્રન્ટે તોડ્યો રેકોર્ડ
મુંબઈ ઈન્ડિયન્સના નેટ સાયવર બ્રન્ટ હવે WPLની એક જ સિઝનમાં સૌથી વધુ રન બનાવનાર ખેલાડી બની ગઈ છે. તેણે WPL 2025 માં અત્યાર સુધીમાં 347 રન બનાવ્યા છે. ગયા સિઝનમાં RCB તરફથી રમતી વખતે એલિસ પેરીએ પણ એટલા જ રન બનાવ્યા હતા. હવે જો બ્રન્ટ આગામી મેચમાં વધુ એક રન બનાવે છે, તો તે મહિલા પ્રીમિયર લીગની એક સિઝનમાં સૌથી વધુ રન બનાવનાર ખેલાડી બની જશે.
