વુમન્સ પ્રીમિયર લીગ 2025ની ફાઈનલ મેચમાં મુંબઈ ઈન્ડિયન્સે પ્રથમ બૅટિંગ કરી 149 રન બનાવ્યા છે. WPL 2025માં બ્રેબોર્ન સ્ટેડિયમમાં કોઈપણ ટીમ દ્વારા અત્યાર સુધીનો આ સૌથી ઓછો સ્કોર છે. ફાઈનલમાં MIની બેટિંગ સંઘર્ષમય જોવા મળી હતી, પરંતુ કેપ્ટન હરમનપ્રીત કૌરે લાંબી લડાઈ લડી અને 66 રનની ઈનિંગ રમી. તેના સિવાય સિઝનના સૌથી વધુ રન બનાવનાર નેટ સાયવર-બ્રન્ટે પણ 30 રનનું યોગદાન આપ્યું હતું.
મુંબઈ ઈન્ડિયન્સે સૌથી ઓછો સ્કોર બનાવ્યો
WPL 2025માં બ્રેબોર્ન સ્ટેડિયમમાં અત્યાર સુધીનો સૌથી ઓછો સ્કોર 166 રન હતો, જે ગુજરાત જાયન્ટ્સે એલિમિનેટર મેચમાં મુંબઈ ઈન્ડિયન્સ સામે બનાવ્યો હતો. પરંતુ વર્તમાન સિઝનમાં મુંબઈ આ મેદાન પર સૌથી ઓછો સ્કોર કરનારી ટીમ બની ગઈ છે. અત્યાર સુધી WPLની કોઈ ફાઈનલ હાઈ સ્કોરિંગ નથી રહી. દિલ્હીની બોલિંગમાં નલ્લાપુરેડ્ડી, જેસ જોનાસન અને મેરિજને કેપે બે-બે વિકેટ લીધી હતી જ્યારે એનાબેલ સધરલેન્ડને એક વિકેટ મળી હતી.
નેટ સાયવર-બ્રન્ટે ઇતિહાસ રચ્યો
Nat Sciver-Brunt WPLના ઇતિહાસમાં એક જ સિઝનમાં 500 રનનો આંકડો પાર કરનારો પ્રથમ ખેલાડી બની છે. તેણે WPL 2025માં કુલ 523 રન બનાવ્યા છે, જેમાં પાંચ અડધી સદી સામેલ છે. આ પહેલા આ રેકોર્ડ RCBની એલિસ પેરીના નામે હતો જેણે WPL 2024માં 347 રન બનાવ્યા હતા. આ સિઝનમાં 523 રન બનાવવા ઉપરાંત બ્રન્ટે ફાઈનલ પહેલા 9 વિકેટ પણ લીધી છે. આવી સ્થિતિમાં, તે પ્લેયર ઓફ ધ ટૂર્નામેન્ટ તરીકે પસંદ થવાની સૌથી મોટી દાવેદાર લાગે છે. મુંબઈએ પ્રથમ 2 વિકેટ માત્ર 14 રનના સ્કોર પર ગુમાવી દીધી હતી. ચોથા ક્રમે બેટિંગ કરવા આવેલી કેપ્ટન હરમનપ્રીત કૌરે નેટ સાયવર-બ્રન્ટ સાથે 89 રનની મહત્વપૂર્ણ ભાગીદારી કરી હતી. ફાઇનલમાં મુંબઈના 9 ખેલાડીઓ બેટિંગ કરવા આવ્યા હતા, જેમાંથી 5 ખેલાડીઓ ડબલ ફિગર સુધી પણ પહોંચી શક્યા ન હતા.
