અમેરિકાના ન્યુ મેક્સિકો રાજ્યના લાસ ક્રુસેસ શહેરના એક પાર્કમાં ફાયરિંગના કારણે હંગામો મચી ગયો છે. આ ઘટનામાં ઓછામાં ઓછા 3 લોકોના મોત થયા છે જ્યારે 15 લોકો ઘાયલ થયા છે. પોલીસના જણાવ્યા અનુસાર, આ ઘટના શુક્રવારે રાત્રે લગભગ 10 વાગ્યાની આસપાસ યંગ પાર્કમાં બની હતી, જે સંગીત અને મનોરંજનનું સ્થળ છે. હાલ પોલીસે આ મામલે તપાસ શરૂ કરી છે. પોલીસે સામાન્ય લોકોને આ ઘટનાના વીડિયો અને અન્ય પુરાવા શેર કરવાની અપીલ કરી છે.
ઘટના બાદ પોલીસ હુમલાખોરોને શોધી રહી છે. ફાયરિંગની ઘટનામાં ઘાયલ થયેલા તમામ લોકોને લાસ ક્રુસેસની ત્રણ સ્થાનિક હોસ્પિટલો અને અલ પાસોની યુનિવર્સિટી મેડિકલ સેન્ટર (પ્રાદેશિક ટ્રોમા સેન્ટર)માં દાખલ કરવામાં આવ્યા છે, જ્યાં તેમની સારવાર કરવામાં આવી રહી છે. મેમોરિયલ મેડિકલ સેન્ટરના પ્રવક્તા એન્ડ્ર્યુ કમિન્સના જણાવ્યા અનુસાર, ઘાયલોમાંથી છને એમ્બ્યુલન્સ અને ખાનગી કાર દ્વારા લાસ ક્રુસેસના મેમોરિયલ મેડિકલ સેન્ટરમાં લાવવામાં આવ્યા હતા, જેમાંથી પાંચને અલ પાસો લઈ જવામાં આવ્યા હતા.
શહેરના કાઉન્સિલરે શોક વ્યક્ત કર્યો
લાસ ક્રુસેસ સિટી કાઉન્સિલર અને મેયર પ્રો ટેમ જોહાન્ના બેનકોમોએ આ ઘટના પર શોક વ્યક્ત કર્યો હતો. તેણે સોશિયલ મીડિયા પર એક પોસ્ટ શેર કરી છે જેમાં તેણે લખ્યું છે, ‘મેં ક્યારેય વિચાર્યું ન હતું કે અમારા શહેરમાં આવી ઘટનાઓ બનશે. પરંતુ હવે આ ડરામણું સત્ય બની ગયું છે. દરેક ક્ષણે આવી દુર્ઘટના થવાની સંભાવના છે, અને અમે પ્રાર્થના કરીએ છીએ કે તે ન બને.
પોલીસ ઘટનાની તપાસમાં લાગી
લાસ ક્રુસેસ પોલીસની સાથે ન્યૂ મેક્સિકો સ્ટેટ પોલીસ, ડોના અના કાઉન્ટી શેરિફ ઓફિસ, એફબીઆઈ અને એટીએફ એજન્સી આ ઘટનાની તપાસ કરી રહી છે. પોલીસ ઘટનાસ્થળે હાજર છે અને પાર્કની આસપાસનો વિસ્તાર બંધ કરી દેવામાં આવ્યો છે. આ સાથે પોલીસે લોકોને અપીલ કરી છે કે જો તેમની પાસે આ ઘટના સંબંધિત કોઈ માહિતી હોય તો તરત જ પોલીસનો સંપર્ક કરીને જણાવો.
પાર્કની આસપાસનો વિસ્તારમાં પ્રતિબંધ
લાસ ક્રુસેસ પોલીસે ફેસબુક પર પોસ્ટ કરેલા નિવેદનમાં જણાવ્યું હતું કે યંગ પાર્કમાં ગોળીબારના સમાચાર મળતાં જ પોલીસ અધિકારીઓ તાત્કાલિક ઘટનાસ્થળે પહોંચી ગયા હતા અને ઘટનાની તપાસ શરૂ કરી હતી. દરમિયાન, પાર્કની આસપાસનો વિસ્તાર વાહનવ્યવહાર માટે બંધ કરી દેવામાં આવ્યો છે. લાસ ક્રુસેસ શહેર ચિહુઆહુઆન રણની ધાર પર અને રિયો ગ્રાન્ડે નદીની નજીક આવેલું છે. તે યુએસ-મેક્સિકો બોર્ડરથી લગભગ 66 કિલોમીટર ઉત્તરમાં છે.
