કર્મચારીઓ માટે એક સારા સમાચાર છે. દરેક જોબ કરનાર એમ્પ્લોય પોતાના અઠવાડિયાના રજાની રાહ જુએ છે. ઘણા કર્મચારીઓને 1 દિવસની રજા મળે છે, કોઈને 2 દિવસની રજા મળે છે. રજા ભલે 1 કે બે અઠવાડિયાની હોય પણ ક્યારે પુરી થઈ જાય તે અંગે ખબર રહેતી નથી. વ્યક્તિને આરામ કરવા માટે આ પૂરતું નથી. આવી સ્થિતિમાં, જાપાન, જે અત્યાર સુધી તેના સ્ટ્રીક્ટ વર્ક અને ઓવરટાઇમ માટે જાણીતું હતું, હવે એક મોટો ફેરફાર કરવા જઈ રહ્યું છે. ટોક્યો મેટ્રોપોલિટન સરકારે તેના કર્મચારીઓ માટે 4 દિવસનો વર્કવીક લાગુ કરવાનો નિર્ણય લીધો છે. આનો અર્થ એ થયો કે હવે સરકારી કર્મચારીઓ અઠવાડિયામાં ફક્ત 4 દિવસ કામ કરશે અને 3 દિવસ આરામ કરશે અથવા તમે કહી શકો કે જાપાન પણ હવે તે દેશોમાં જોડાવા માંગે છે જે સૌથી ખુશ દેશોની યાદીમાં ટોચ પર છે.
આ કારણે જાપાને લીધો નિર્ણય
જણાવી દઈએ કે ટોક્યો મેટ્રોપોલિટન સરકારે દેશના ઘટતા જન્મ દરને ધ્યાનમાં રાખીને આ નિર્ણય લીધો છે, જેથી અહીં વસ્તી વધી શકે. જાપાન આ મહિનાથી જ સરકારી કર્મચારીઓ માટે ચાર દિવસનો વર્કવીક લાગુ કરશે. ટોક્યોના ગવર્નર યુરિકો કોઈકે જણાવ્યું હતું કે આ પહેલ મહિલાઓને કારકિર્દી અને પરિવારનું સંતુલન જાળવવામાં મદદ કરશે. આ યોજના કર્મચારીઓને અઠવાડિયામાં એક વધારાનો દિવસ રજા આપશે, જેનાથી તેઓ તેમની વ્યક્તિગત અને પારિવારિક જવાબદારીઓ વધુ સારી રીતે નિભાવી શકશે.
આઇસલેન્ડે 2015-2019 દરમિયાન 4 દિવસના વર્કવીકનો પ્રયોગ કર્યો. 2022 માં બેલ્જિયમ યુરોપનો પ્રથમ દેશ બન્યો જેણે કાયદેસર રીતે 4 દિવસના વર્કવીક અમલ કર્યો. અહીં કર્મચારીઓ તેમની 40 કલાકની વીકલી ડ્યૂટી 4 દિવસમાં પૂરી કરી શકે છે, તે પણ કોઈપણ પગાર કાપ વિના. વધુમાં “રાઇટ ટુ ડિસ્કનેક્ટ” પણ લાગુ કરવામાં આવ્યો હતો, જેથી મોટી સંસ્થાઓના કર્મચારીઓ ઓફિસ સમય પછી ઇમેઇલ્સ અથવા સંદેશાઓનો જવાબ આપવા માટે બંધાયેલા ન રહે. જર્મનીમાં પણ 73% કંપનીઓમાં આ જ ફોર્મેટ લાગુ પડે છે. આ ઉપરાંત ડેનમાર્ક પહેલાથી જ વિશ્વના સૌથી ખુશ દેશોમાં સામેલ છે. અહીં કાર્ય-જીવન સંતુલનને સૌથી વધુ પ્રાધાન્ય આપવામાં આવે છે. ઘણી સંસ્થાઓ 30-35 કલાકનો વીક ફોલો કરે છે, જે લોકોને પરિવાર, સ્વાસ્થ્ય અને વ્યક્તિગત સમય માટે પૂરતો સમય આપે છે.
