દેશમાં મોંઘવારી સતત વધી રહી છે, ત્યારે મધ્યમવર્ગને ‘એક સાંધે ત્યાં તેર તુટે’ તેવી સ્થિતિ સર્જાઈ છે. આવતીકાલે 30 એપ્રિલ સવારથી રાજધાની દિલ્હી સહિત દેશભરમાં મધર ડેરીના દૂધના ભાવમાં વધારો થવાનો છે. મધર ડેરીના જણાવ્યા મુજબ દૂધના ભાવમાં પ્રતિ લિટરે 2 રૂપિયાનો વધારો ઝીંકવામાં આવ્યો છે, જે 30 એપ્રિલથી દેશભરમાં લાગુ કરવામાં આવશે. દૂધના ભાવમાં વધારાને કારણે લોકોના ખિસ્સા પર બોજ વધવાનો છે.
શું હશે દૂધના નવા ભાવ?
દિલ્હી-એનસીઆરમાં મધર ડેરીના ટોન્ડ (બલ્ક વેન્ડ) દૂધનો ભાવ પ્રતિ લિટર 54 રૂપિયાથી વધીને 56 રૂપિયા પ્રતિ લિટર થઈ જશે. ફુલ ક્રીમ દૂધનો ભાવ પ્રતિ લિટર 68 રૂપિયાથી વધીને 69 રૂપિયા થશે. આ સાથે, ટોન્ડ દૂધ (પાઉચ) ની કિંમત 56 રૂપિયા પ્રતિ લિટરથી વધારીને 57 રૂપિયા પ્રતિ લિટર કરવામાં આવી છે. જ્યારે ડબલ ટોન્ડ દૂધનો ભાવ પ્રતિ લિટર 49 રૂપિયાથી વધારીને 51 રૂપિયા કરવામાં આવ્યો છે. ગાયના દૂધનો ભાવ પ્રતિ લિટર 57 રૂપિયાથી વધારીને 59 રૂપિયા કરવામાં આવ્યો છે.
મધર ડેરી દરરોજ લગભગ 35 લાખ લિટર દૂધ વેચે છે
મધર ડેરીના અધિકારીએ જણાવ્યું હતું કે ખરીદી ખર્ચ સતત વધી રહ્યો છે. છેલ્લા કેટલાક મહિનામાં ભાવમાં પ્રતિ લિટર 4-5 રૂપિયાનો વધારો થયો છે. મધર ડેરી દિલ્હી-એનસીઆર બજારમાં તેના પોતાના આઉટલેટ્સ, સામાન્ય વેપાર અને ઈ-કોમર્સ પ્લેટફોર્મ દ્વારા દરરોજ લગભગ 35 લાખ લિટર દૂધ વેચે છે. તેમણે કહ્યું કે, અમે અમારા ખેડૂતોની આજીવિકાને ટેકો આપતી વખતે ગ્રાહકોને ગુણવત્તાયુક્ત દૂધની સતત ઉપલબ્ધતા સુનિશ્ચિત કરવા માટે પ્રતિબદ્ધ છીએ. મધર ડેરીએ ભાવ વધારા માટે ડેરી ખેડૂતો પાસેથી કાચા દૂધની ખરીદી કિંમતમાં વધારો જવાબદાર ગણાવ્યો હતો. મધર ડેરીએ કહ્યું છે કે છેલ્લા કેટલાક મહિનામાં દૂધ ખરીદવા માટે ઊંચા ભાવ ચૂકવવા છતાં અમે ભાવમાં વધારો કર્યો નથી. ત્યારે દેશભરમાં ગરમીને કારણે દૂધ ઉત્પાદન પર વધુ અસર થવાની શક્યતા છે.
