એન્થોની અલ્બેનીઝ ફરી એક વખત ઓસ્ટ્રેલિયાના વડાપ્રધાન તરીકે ચૂંટાયા છે. ત્યારે વડાપ્રધાન નરેન્દ્ર મોદીએ તેમને અભિનંદન પાઠવ્યા છે. એન્થોની અલ્બેનીઝ છેલ્લા 21 વર્ષમાં આટલી જીત મેળવનારા પ્રથમ ઓસ્ટ્રેલિયન વડાપ્રધાન પણ બન્યા છે. અલ્બેનીઝને તેમની જીત બદલ અભિનંદન પાઠવતા વડાપ્રધાન મોદીએ કહ્યું કે આ મજબૂત જનાદેશ ઓસ્ટ્રેલિયન લોકોના તમારા નેતૃત્વમાં અવિશ્વસનીય વિશ્વાસને પ્રતિબિંબિત કરે છે. તેમણે કહ્યું કે ભારત ઓસ્ટ્રેલિયા સાથે મળીને કામ કરવા આતુર છે.
ભારત ઓસ્ટ્રેલિયાના સંબંધો બનશે વધુ ગાઢ
પીએમ મોદીએ ઈન્સ્ટાગ્રામ પર પોસ્ટ કરતા લખ્યું, ‘ઓસ્ટ્રેલિયાના વડાપ્રધાન તરીકે તમારી જબરદસ્ત જીત અને ફરીથી ચૂંટાઈ આવવા બદલ એન્થોની અલ્બેનીઝને અભિનંદન!’ આ પ્રચંડ જનાદેશ ઓસ્ટ્રેલિયન લોકોના તમારા નેતૃત્વમાં રહેલા વિશ્વાસને પ્રતિબિંબિત કરે છે. હું ભારત-ઓસ્ટ્રેલિયા વ્યાપક વ્યૂહાત્મક ભાગીદારીને વધુ ગાઢ બનાવવા અને ઇન્ડો-પેસિફિકમાં શાંતિ, સ્થિરતા અને સમૃદ્ધિ માટેના આપણા સહિયારા દ્રષ્ટિકોણને આગળ વધારવા માટે સાથે મળીને કામ કરવા આતુર છું.
પ્રચાર દરમિયાન અમે સારું પ્રદર્શન કર્યું નથી: પીટર ડટન
તમને જણાવી દઈએ કે એન્થોની અલ્બેનીઝ સતત બીજી વખત ઓસ્ટ્રેલિયાના વડાપ્રધાન તરીકે ચૂંટાયા છે. તેમનો આગામી કાર્યકાળ 3 વર્ષનો રહેશે. શનિવારની ચૂંટણીમાં વિપક્ષી લિબરલ પાર્ટીના નેતા પીટર ડટને હાર સ્વીકારતા કહ્યું, “આ (ચૂંટણી) પ્રચાર દરમિયાન અમે સારું પ્રદર્શન કર્યું નથી, આ આજે રાત્રે સ્પષ્ટ થઈ ગયું છે અને હું આની સંપૂર્ણ જવાબદારી સ્વીકારું છું.” અગાઉ, તેમણે અલ્બેનીઝને તેમની સફળતા બદલ અભિનંદન પણ આપ્યા હતા.
અલ્બેનીઝે તેમના વિજય ભાષણમાં શું કહ્યું?
ઉલ્લેખનીય છે કે સિડનીમાં પ્રચંડ જીત બાદ પોતાના ભાષણમાં લેબર પાર્ટીના નેતા અલ્બેનીઝે કહ્યું, ‘ઓસ્ટ્રેલિયનોએ ઓસ્ટ્રેલિયન રીતે વૈશ્વિક પડકારોનો સામનો કરવાનો નિર્ણય લીધો છે, ભવિષ્યનું નિર્માણ કરતી વખતે એકબીજાની સંભાળ રાખીને, આપણે બીજે ક્યાંયથી ભીખ માગવાની, ઉધાર લેવાની કે નકલ કરવાની જરૂર નથી.’ આપણે આપણી પ્રેરણા વિદેશમાંથી લેતા નથી. આપણને તે આપણા મૂલ્યો અને આપણા લોકોમાં જ મળે છે.
