પેટ કમિન્સે એક એવી સિદ્ધિ હાંસિલ કરી છે, જે IPLના ઈતિહાસમાં ક્યારેય બન્યું નથી. રાજીવ ગાંધી ક્રિકેટ સ્ટેડિયમમાં કમિન્સે પોતાની ઘાતક બોલિંગથી ઈતિહાસ રચ્યો. પેટ કમિન્સે મેચના પહેલા જ બોલ પર કરુણ નાયરને પેવેલિયન મોકલી દીધો.
આ પછી, સનરાઈઝર્સ હૈદરાબાદના કેપ્ટને આગળની ઓવર એ જ રીતે શરૂ કરી અને ફાફ ડુ પ્લેસિસને પણ આઉટ કર્યો. પેટ કમિન્સે ફરી એકવાર પોતાની ત્રીજી ઓવરમાં પોતાનો જાદુ બતાવ્યો અને પહેલા જ બોલ પર અભિષેક પોરેલને આઉટ કર્યો. કમિન્સે પાવરપ્લેમાં ત્રણેય વિકેટ લીધી અને એક એવું કારનામું કર્યું જે આ લીગના ઈતિહાસમાં ક્યારેય બન્યું ન હતું.
પેટ કમિન્સે રચ્યો ઈતિહાસ
પેટ કમિન્સ ઈન્ડિયન પ્રીમિયર લીગમાં પાવરપ્લેની અંદર ત્રણ વિકેટ લેનાર પ્રથમ કેપ્ટન બન્યો છે. કમિન્સ પહેલા કોઈ પણ કેપ્ટન પહેલી છ ઓવરમાં ત્રણ વિકેટ લઈ શક્યો નથી. IPLની આ સિઝનમાં અક્ષર પટેલે પાવરપ્લેમાં 2 વિકેટ લીધી હતી. કમિન્સે પહેલી 6 ઓવરમાં દિલ્હી કેપિટલ્સના બેટ્સમેન પર ધૂમ મચાવી હતી.
હૈદરાબાદના કેપ્ટને કરુણ નાયરને ગોલ્ડન ડક પર પેવેલિયન મોકલ્યો. આ પછી, ફાફ અને અભિષેક પોરેલે પણ કમિન્સ સમક્ષ આત્મસમર્પણ કર્યું. કમિન્સે શાનદાર બોલિંગ કરી અને ચાર ઓવરના સ્પેલમાં માત્ર 19 રન આપીને 3 વિકેટ ઝડપી.
દિલ્હીનો બેટિંગ ક્રમ ગયો નિષ્ફળ
સનરાઇઝર્સ હૈદરાબાદ સામે રમાયેલી મેચમાં દિલ્હી કેપિટલ્સનો બેટિંગ ઓર્ડર ખરાબ રીતે ફ્લોપ થયો. કરુણ નાયર ખાતું ખોલાવ્યા વિના આઉટ થઈ ગયો હતો, જ્યારે ફાફ ડુ પ્લેસિસ માત્ર 3 રન બનાવીને આઉટ થઈ ગયો હતો. અભિષેક પણ 10 બોલનો સામનો કરીને અને માત્ર 8 રન બનાવીને આઉટ થયો.
કેએલ રાહુલ પણ ફ્લોપ રહ્યો અને 10 રન બનાવીને જયદેવ ઉનડકટનો શિકાર બન્યો. કેપ્ટન અક્ષર પટેલનું બેટ પણ શાંત રહ્યું અને તે ફક્ત 6 રન જ બનાવી શક્યો. અંતિમ ઓવરોમાં, ટ્રિસ્ટન સ્ટબ્સે 36 બોલમાં 41 રન બનાવ્યા જ્યારે આશુતોષ શર્માએ 26 બોલમાં 41 રન બનાવીને દિલ્હીનો સ્કોર 133 સુધી પહોંચાડ્યો.
