ભારત પાકિસ્તાન તણાવને કારણે IPL 2025 એક અઠવાડિયા માટે સ્થગિત કરવામાં આવી હતી. જોકે, હવે ફરી એકવાર IPL 2025 ફરી શરૂ થઈ રહી છે જે 17 મેથી શરૂ થવા જઈ રહી છે. ભારત-પાકિસ્તાન તણાવને કારણે IPL સિવાય પાડોશી દેશમાં રમાઈ રહેલી પાકિસ્તાન સુપર લીગ પણ મુલતવી રાખવામાં આવી હતી. જોકે હવે IPL અને પાકિસ્તાન સુપર લીગ શરૂ કરવાનો નિર્ણય લેવામાં આવ્યો છે. આ દરમિયાન શ્રીલંકાના ખેલાડીએ PSL છોડીને IPL રમવાનો નિર્ણય લીધો છે.
PSL છોડીને IPL રમવાનો લીધો નિર્ણય
શ્રીલંકાના સ્ટાર બેટ્સમેન કુસલ મેન્ડિસે પાકિસ્તાન સુપર લીગ 2025 છોડીને IPL રમવાનો નિર્ણય લીધો છે. ભારત-પાકિસ્તાન તણાવ પહેલા કુસલ મેન્ડિસ પાકિસ્તાન સુપર લીગમાં રમી રહ્યો હતો. તે ક્વેટા ગ્લેડીયેટર્સ તરફથી રમી રહ્યો હતો. જોકે, હવે GTએ જોસ બટલરની જગ્યાએ તેને પોતાની ટીમનો ભાગ બનાવ્યો છે. જોસ બટલર 26 મેના રોજ જીટી કેમ્પ છોડી દેશે કારણ કે તેને વેસ્ટ ઈન્ડિઝ સામે ઈંગ્લેન્ડ માટે ODI અને T20 સીરીઝમાં ભાગ લેવાનો છે. જોસ બટલર ઇંગ્લેન્ડ ગયા પછી મેન્ડિસ જીટી માટે રમશે. જો મીડિયા રિપોર્ટ્સ પર વિશ્વાસ કરવામાં આવે તો, મેન્ડિસે સુરક્ષા કારણોસર પાકિસ્તાન જવાને બદલે ભારત આવવાનો નિર્ણય લીધો છે.
મેન્ડિસ શાનદાર ફોર્મમાં
મેન્ડિસ PSLમાં શાનદાર ફોર્મમાં હતો. તેણે 8 મેચની 5 ઇનિંગ્સમાં 168ના સ્ટ્રાઇક રેટથી 143 રન બનાવ્યા હતા. કુસલ પહેલીવાર IPL રમવા માટે તૈયાર છે. છેલ્લી પાંચ ઇનિંગ્સમાં મેન્ડિસે 32, 36, 12, 28 અને 35 અણનમ રન બનાવ્યા છે.
તમને જણાવી દઈએ કે, 30 વર્ષીય મેન્ડિસ લાંબા સમયથી શ્રીલંકાનું પ્રતિનિધિત્વ કરી રહ્યા છે. અત્યાર સુધી રમાયેલી 71 ટેસ્ટ મેચોમાં તેણે 36.75 ની સરેરાશથી 4668 રન બનાવ્યા છે. જ્યારે 143 ODI મેચોમાં આ ખેલાડીએ 34.60ની સરેરાશથી 4429 રન બનાવ્યા છે. 78 ટી-20 મેચોમાં તેના બેટે 25.60ની સરેરાશ સાથે 1920 રન બનાવ્યા છે.
