RCB એ પોતાની છેલ્લી લીગ મેચમાં લખનૌ સુપર જાયન્ટ્સને હરાવીને ટોપ-2 માં પોતાનું સ્થાન સુરક્ષિત કર્યું. આ સાથે, RCB ક્વોલિફાયર 1 માં પંજાબ કિંગ્સ સામે રમશે. RCB 9 વર્ષ પછી ક્વોલિફાયર 1 માં સ્થાન મેળવ્યું છે.
આ મેચમાં, વિકેટકીપર બેટ્સમેન જીતેશ શર્મા, જે RCBનું નેતૃત્વ કરી રહ્યો હતો, તેને શાનદાર બેટિંગ કરીને RCBની જીતમાં મહત્વપૂર્ણ ભૂમિકા ભજવી હતી. આ મેચમાં જીતેશ શર્માએ એમએસ ધોનીને હરાવીને ઈતિહાસ રચ્યો છે.
જીતેશ શર્માએ રચ્યો ઈતિહાસ
આ મેચમાં, જીતેશ શર્માએ બેટિંગ કરતા માત્ર 33 બોલમાં 85 રનની અણનમ ઈનિંગ રમી હતી. જેમાં તેના બેટમાંથી 8 ચોગ્ગા અને 6 છગ્ગા આવ્યા હતા. આ સાથે, જીતેશે એક ખાસ સિદ્ધિ હાંસલ કરી. IPL રન ચેઝમાં છઠ્ઠા કે નીચલા ક્રમના બેટ્સમેન દ્વારા જીતેશનો આ સૌથી વધુ સ્કોર હતો. આ પહેલા આ રેકોર્ડ CSKના કેપ્ટન એમએસ ધોનીના નામે હતો, જેને IPL 2018માં RCB સામે 34 બોલમાં 70 રન બનાવ્યા હતા.
IPLમાં સફળ રન ચેઝમાં પીછો કરતી વખતે 6 અથવા તેનાથી નીચેના ક્રમ પર બનાવેલો સર્વોચ્ચ સ્કોર
| ક્રમાંક | ખેલાડીનું નામ | સ્કોર | બોલ | ટીમ | વિરોધી ટીમ | સ્થળ | વર્ષ |
| 1 | જીતેશ શર્મા | 85* | 33 | RCB | LSG | લખનૌ | 2025 |
| 2 | એમએસ ધોની | 70* | 34 | CSK | RCB | બેંગ્લોર | 2018 |
| 3 | આન્દ્રે રસેલ | 70* | 31 | KKR | PBKS | મુંબઈ | 2022 |
| 4 | કાયરન પોલાર્ડ | 70* | 47 | MI | RCB | બેંગ્લોર | 2017 |
| 5 | ડ્વેન બ્રાવો | 68 | 30 | CSK | MI | મુંબઈ | 2018 |
મયંક અને જીતેશ વચ્ચે 107 રનની થઈ મહત્વપૂર્ણ પાર્ટનરશિપ
આ મેચમાં મયંક અગ્રવાલે પણ જીતેશ શર્માને સારો સાથ આપ્યો. બંને વચ્ચે 107 રનની મેચ-વિનિંગ પાર્ટનરશિપ થઈ. જીતેશે 85 રનની અણનમ ઈનિંગ રમી હતી, જ્યારે મયંક અગ્રવાલે 23 બોલમાં 41 રનની અણનમ ઈનિંગ રમી હતી જેમાં તેને 5 ચોગ્ગા ફટકાર્યા હતા.
પંજાબ કિંગ્સ અને આરસીબી વચ્ચે રમાશે ક્વોલિફાયર 1
RCB માટે LSG ને હરાવવું ખૂબ જ મહત્વપૂર્ણ હતું કારણ કે ટીમને ક્વોલિફાયર 1 માં પોતાનું સ્થાન સુરક્ષિત કરવાનું હતું અને તે થયું. હવે RCB અને પંજાબ કિંગ્સ વચ્ચે ક્વોલિફાયર 1 29 મેના રોજ રમાશે. આ મેચ હારનારી ટીમે એલિમિનેટર જીતનારી ટીમ સાથે ક્વોલિફાયર 2 રમવું પડશે.
