ICC દ્વારા લેટેસ્ટ રેન્કિંગ જાહેર કરવામાં આવ્યું છે. ICC ODI રેન્કિંગમાં મોટા ફેરફારો જોવા મળ્યા છે. તાજેતરમાં વેસ્ટ ઈન્ડિઝ અને આયર્લેન્ડ વચ્ચે એક વનડે સિરીઝ રમાઈ હતી. આ 3 મેચની સિરીઝ 1-1 થી બરાબર રહી.
આયર્લેન્ડે એક મેચ જીતી હતી જ્યારે વેસ્ટ ઈન્ડિઝે બીજી મેચ જીતી હતી. એક મેચ વરસાદને કારણે રદ્દ કરવામાં આવી હતી. આ સિરીઝ પછી, ICC ODI રેન્કિંગ અપડેટ કરવામાં આવ્યું છે, જેમાં ઘણી ઉથલપાથલ જોવા મળી છે.
ચાર બોલરોએ એકસાથે એક-એક સ્થાનનો કૂદકો માર્યો છે, જેમાં ભારત અને ન્યુઝીલેન્ડના એક-એક બોલર અને ઓસ્ટ્રેલિયાના બે બોલરનો સમાવેશ થાય છે. ભારતીય સ્પિનર રવિન્દ્ર જાડેજા એક સ્થાનના ફાયદા સાથે 8મા સ્થાને પહોંચી ગયો છે. જાડેજા સિવાય ન્યુઝીલેન્ડના મેટ હેનરીને પણ એક સ્થાનનો ફાયદો થયો છે અને હવે તે 7મા સ્થાને પહોંચી ગયો છે.
ઓસ્ટ્રેલિયાના એડમ ઝામ્પા અને જોશ હેઝલવુડ અનુક્રમે 9મા અને 10મા સ્થાને પહોંચી ગયા છે. બંનેએ એક-એક સ્થાન આગળ આવ્યા છે. પરંતુ વેસ્ટ ઈન્ડિઝનો ગુડાકેશ મોતી ચાર સ્થાન ગુમાવ્યા બાદ ટોપ 10ના લિસ્ટમાંથી બહાર થઈ ગયો છે. ટોપ 10 વનડે બોલરોમાં ભારતના બે બોલરો છે.
ODI રેન્કિંગમાં ટોપ-6 માં નથી થયો કોઈ ફેરફાર
બોલરો માટે ODI રેન્કિંગમાં ટોપ-6 માં કોઈ ફેરફાર થયો નથી. શ્રીલંકાના મહેશ થિક્ષાના ટોપ પર યથાવત છે. તેના 680 રેટિંગ પોઈન્ટ છે. ભારતનો કુલદીપ યાદવ બીજા સ્થાને અને દક્ષિણ આફ્રિકાનો કેશવ મહારાજ ત્રીજા સ્થાને છે. નામિબિયાનો બર્નાર્ડ સ્કોલ્ટ્ઝ ચોથા અને અફઘાનિસ્તાનના સ્પિનર રાશિદ ખાન પાંચમા ક્રમે છે. ન્યુઝીલેન્ડનો મિચેલ સેન્ટનર છઠ્ઠા સ્થાને યથાવત છે.
બેટિંગ રેન્કિંગમાં ગિલનો દબદબો
જો આપણે બેટ્સમેનોના ODI રેન્કિંગની વાત કરીએ તો, ભારતીય ટેસ્ટ કેપ્ટન શુભમન ગિલ ટોપના સ્થાને યથાવત છે. ગિલ 784 રેટિંગ પોઈન્ટ સાથે નંબર-1 વનડે બેટ્સમેન બન્યો છે. ભારતના ત્રણ શક્તિશાળી બેટ્સમેનોનો ટોપના 10 બેટ્સમેનોમાં સમાવેશ થાય છે. રોહિત શર્મા ત્રીજા સ્થાને છે અને વિરાટ કોહલી પાંચમા સ્થાને છે. બંને બેટ્સમેનોએ તાજેતરમાં જ ટેસ્ટ ક્રિકેટને અલવિદા કહ્યું હતું. હવે રોહિત અને વિરાટ ફક્ત વનડે રમતો જોવા મળશે. ટોપ10માં ત્રીજા ભારતીય શ્રેયસ ઐયર છે, જે 8મા ક્રમે યથાવત છે.
