ઉત્તરપ્રદેશના હાથરસ જિલ્લામાં બુધવારે એક મોટો અકસ્માત સર્જાયો છે. સાસની સ્ટેશન વિસ્તારના ગામ સમામઈની પાસે રોડવેઝ બસ અને દૂધનું ટેન્કર આમને-સામને ટકરાયું છે. ટક્કર એટલી ભયાનક હતી કે બસની આગળનો ભાગ પુરી રીતે તુટી ગયો છે અને ઘણા મુસાફરો તેની અંદર ફસાયેલા છે.
લોકોએ બુમાબુમ કરી અને ભારે નાસભાગ મચી ગઈ
અકસ્માતમાં 14 વર્ષના એક બાળક સહિત 3 લોકોના ઘટનાસ્થળે જ મોત થયા છે, જ્યારે 17 મુસાફરો ગંભીર રીતે ઘાયલ થયા છે. દુર્ઘટના બાદ ઘટનાસ્થળ પર લોકોએ બુમાબુમ કરી અને ભારે નાસભાગ મચી ગઈ છે. સ્થાનિક લોકોએ તરત જ પોલીસને જાણ કરી અને પોલીસ તાત્કાલિક ઘટનાસ્થળ પર પહોંચી અને રેસ્ક્યુ ઓપરેશન શરૂ કર્યું. કેટલાક લોકો ટેન્કરની નીચે પણ ફસાયેલા જોવા મળ્યા, જેમને પોલીસ અને ગામના લોકોની મદદથી બહાર કાઢવામાં આવ્યા.
બસે કાબૂ ગુમાવ્યો અને ટેન્કર સાથે ટકરાઈ ગઈ
તમામ ઘાયલોને સાસનીના CHC અને જિલ્લા હોસ્પિટલમાં સારવાર માટે મોકલવામાં આવ્યા છે. ડોક્ટરે જણાવ્યું કે 8 મુસાફરોની હાલત ગંભીર છે અને તેમને વધુ સરવાર માટે આગ્રા રિફર કરવામાં આવ્યા છે. જિલ્લાધિકારીએ અકસ્માતની પુષ્ટી કરતા જણાવ્યું કે દુર્ઘટના એક બાઈકને બચાવવા દરમિયાન થઈ છે, જેનાથી બસે કાબૂ ગુમાવ્યો અને ટેન્કર સાથે ટકરાઈ ગઈ. તંત્ર દ્વારા મૃતકોના પરિવારજનોને દરેક પ્રકારની સહાય આપવાનું આશ્વાન આપ્યું છે. હાલમાં પોલીસે બંને વાહનોને કબજે કરી લીધા છે અને તપાસ શરૂ કરી દીધી છે. આ દર્દનાક દુર્ઘટના બાદ વિસ્તારમાં શોકનો માહોલ છે.
