આંતરરાષ્ટ્રીય ડ્રગ પેડલર રિતિક બજાજને દુબઈથી દિલ્હીમાં પરત લાવવામાં આવ્યો છે. દિલ્હી પોલીસ અને સીબીઆઈના આ સંયુક્ત ઓપરેશનને ગૃહ મંત્રાલય અને વિદેશ મંત્રાલયના સહયોગથી અંઝામ આપવામાં આવ્યો છે. રિતિક બજાજ પર નાર્કોટિક્સ પદાર્થોની તસ્કરી અને સપ્લાય સાથે જોડાયેલો ગંભીર આરોપ છે. દિલ્હી પોલીસે કેસ દાખલ કર્યા બાદ તે દેશ છોડીને ફરાર થઈ ગયો હતો.
NCB બેન્કોકે CBIને સૂચના આપી
ત્યારબાદ CBIના અનુરોધ પર 9 ઓક્ટોબરે ઈન્ટરપોલે તેની વિરૂદ્ધ રેડ નોટિસ જાહેર કરી હતી. રેડ નોટિસ જાહેર થયા બાદ જ દુનિયાભરના કાયદા લાગુ કરનારી એજન્સી એલર્ટ થઈ ગઈ. આ દરમિયાન NCB બેન્કોકએ CBIને સૂચના આપી કે રિતિક બજાજ યુએઈ તરફ જઈ રહ્યો છે. ત્યારબાદ CBIએ NCB બેન્કોક અને NCB અબૂ ધાબીની સાથે કોઓર્ડિશન કર્યું. આ દરમિયાન તેની લોકેશન ટ્રેક કરવામાં આવી. તપાસ એજન્સીઓની વચ્ચે તાલમેલના કારણે આરોપીની શોધખોળ કરવામાં સફળતા મળી. ત્યારબાદ દિલ્હી પોલીસની એક વિશેષ ટી રિતિક બજાજને ભારત લાવવા માટે UAE મોકલવામાં આવી. મંગળવારે આ ટીમ તેને દુબઈથી લઈને ભારત પહોંચી. રિતિક બજાજ એક મોટા ઈન્ટરનેશનલ ડ્રગ સિન્ડિકેટ સાથે જોડાયેલો હોવાનું કહેવામાં આવી રહ્યું છે.
CBI ઈન્ટરપોલની મદદથી અત્યાર સુધી 150થી વધારે ભાગેડુ ગુનેગારોને ભારત પરત લાવી ચૂકી છે
તપાસ એજન્સીઓ મુજબ રિતિક બજાજ લાંબા સમય સુધી બેન્કોકમાં રહ્યો છે. ત્યાંથી દુબઈ ફરાર થઈ ગયો હતો. તેની વિરૂદ્ધ દિલ્હી પોલીસની સાથે સાથે NCB પણ તેની શોધખોળ કરી રહી હતી. CBI ઈન્ટરપોલની મદદથી અત્યાર સુધી 150થી વધારે ભાગેડુ ગુનેગારોને ભારત પરત લાવી ચૂકી છે. રિતિક બજાજને પરત લાવવો એજન્સીઓની એક મોટી સફળતા માનવામાં આવી રહી છે. જણાવી દઈએ કે ગયા વર્ષે ઓક્ટોબરમાં દિલ્હી પોલીસે પણ ભારે માત્રામાં કોકેઈન ઝડપ્યું હતું. તેની આંતરરાષ્ટ્રીય બજારમાં 1,300 કરોડ રૂપિયા કિંમત હોવાનું જણાવવામાં આવી રહ્યું હતું. આ ઓપરેશન દરમિયાન પોલીસે 5 આરોપીઓને પણ પકડ્યા હતા. આ કેસની તપાસ બાદ પોલીસે 14 લોકોની વિરૂદ્ધ ચાર્જશીટ દાખલ કરી હતી. તેમાં રિતિક બજાજનું નામ લેવામાં આવ્યું હતું.
