મેપીંગ નહી કરાવનાર 2.25 લાખ મતદારોને નોટીસ 4 અને 5મીએ તંત્ર દ્વારા સ્પેશ્યલ કેમ્પ યોજાશે
રાજકોટ શહેર-જિલ્લામાં મતદારયાદી સુધારણા કાર્યક્રમ (SIR) બાદ ચૂંટણીપંચની ગાઈડલાઈન અંતર્ગત 8 વિધાનસભા મત વિસ્તારના 2512 મતદાન બુથો પર ગત શનિ અને રવિવાર એમ બે દિવસ દરમિયાન ખાસ ઝુંબેશ હાથ ધરવામાં આવી હતી. આ દરમિયાન મતદાર યાદીમાં નામ ઉમેરવા, નામ કમી કરવા, સરનામામાં સુધારા-વધારા, સ્થળાંતર સહિત હકક-દાવાની 28368 અરજીઓ મળી હતી, તેમજ મતદારો દ્વારા આ બાબતે 30392 ડોકયુમેન્ટ જમા કરાવવામાં આવ્યા હતાં
68 રાજકોટ પૂર્વના 304 મતદાન બુથો પર 4661, 69 રાજકોટ પશ્ર્ચિમના 343 મતદાન બુથો પર 4447, 70 રાજકોટ દક્ષિણના 254 મતદાન બુથો પર 2421, 71 રાજકોટ ગ્રામ્યના 440 મતદાન બુથો પર 6089, 72 જસદણના 296 મતદાન બુથો પર 3211, 73 ગોંડલના 256 મતદાન બુથો પર 2056, 74 જેતપુરના 323 મતદાન બુથો પર 2837, 75 ધોરાજીના 296 મતદાન બુથો પર 2646 હકકદાવા અરજીઓ મળી જિલ્લાના કુલ 2512 મતદાન બુથો પર 28368, વાંધા અરજીઓ મતદારો દ્વારા બીએલઓને આપવામાં આવી હતી. તેની સાથો 30392 ડોકયુમેન્ટ પણ મતદારો દ્વારા જમા કરાવવામાં આવ્યા હતા.
આ અંગે વધુમાં જાણવા મળતી વિગત મુજબ રાજકોટ જિલ્લામાં હજુ 2.25 લાખ મતદારોએ મેપીંગ કરાવ્યુ નથી. જેઓને નોટીસ આપવામાં આવી છે જેના પગલે અત્યાર સુધીમાં 30,392 મતદારોએ પોતાના પુરાવા રજૂ કરી મેપીંગની પ્રક્રિયા પૂર્ણ કરી છે. જેમાં રાજકોટ પશ્ચિમ વિસ્તારમાં સૌથી વધુ 10,038 મતદારોએ ડોકયુમેન્ટ રજૂ કરી મેપીંગ કરાવેલ છે.
આગામી 4 અને 5 જાન્યુઆરી દરમિયાન મતદાર યાદી સુધારણા કાર્યક્રમ અંતર્ગત બીજા તબકકાની ખાસ ઝુંબેશ યોજાશે. આ બીજા તબકકાની ખાસ ઝુંબેશમાં સવારના 10થી સાંજના 5 વાગ્યા સુધી બીએલઓ બેસી મતદાર યાદીમાં નામ નોંધાવવા અને નામ- સરનામામાં સુધારા-વધારા માટે ડોકયુમેન્ટ સાથે ફોર્મ તેમજ હકક દાવા અરજીઓ સ્વીકારશે.
