સ્ટાફમાં વધારો થતા કામગીરી એકદમ સરળ બની : એક અઠવાડીયામાં જ પ્રક્રિયા પૂર્ણ કરાતી હોવાનો દાવો
અગ્ર ગુજરાત, રાજકોટ
રાજકોટ મહાનગરપાલિકાના ફાયર વિભાગ દ્વારા નવા વર્ષથી કામગીરીમાં અભૂતપૂર્વ ઝડપ લાવવામાં આવી છે. શહેરમાં ફાયર સેફ્ટીના નિયમોનું પાલન સુનિશ્ચિત કરવાની સાથે સાથે નાગરિકો અને બિલ્ડરોને હાલાકી ન પડે તે માટે હવે ફાયર NOC આપવાની પ્રક્રિયા અત્યંત સરળ અને ઝડપી બનાવી દેવામાં આવી છે. ઓનલાઈન કામગીરી તેમજ સ્ટાફ વધતા કામગીરી પહેલા કરતા ખૂબ ઝડપી બની છે. છેલ્લા 21 દિવસમાં 12 ટેમ્પરરી સહિત 33 ફાયર NOC ઇશ્યુ કરવામાં આવી ચુક્યા છે. હાલ માત્ર 3 અરજીઓ પેન્ડિંગ છે, જેનો આગામી 3-4 દિવસમાં નિકાલ કરવામાં આવશે.
ઇન્ચાર્જ ચીફ ફાયર ઓફિસર અમિત દવેએ જણાવ્યું હતું કે, જે પ્રક્રિયા માટે સામાન્ય રીતે 21 દિવસનો સમય નિર્ધારિત હોય છે, તે હવે મનપા દ્વારા માત્ર 1 સપ્તાહ કે તેનાથી પણ ઓછા સમયમાં પૂર્ણ કરવામાં આવી રહી છે. રાજકોટ મનપાના ફાયર વિભાગમાં તાજેતરમાં સ્ટાફની સંખ્યામાં વધારો કરવામાં આવ્યો છે, જેના સીધા પરિણામો હવે જોવા મળી રહ્યા છે. સ્ટાફ વધવાને કારણે અરજીઓની ચકાસણી, સ્થળ તપાસ અને ડોક્યુમેન્ટેશનની કામગીરીમાં જે વિલંબ થતો હતો તે દૂર થયો છે.
અમિત દવેના જણાવ્યા અનુસાર, ઓનલાઇન પોર્ટલના માધ્યમથી અરજીઓનું સતત નિરીક્ષણ કરવામાં આવે છે અને જો તમામ ટેકનિકલ માપદંડો સંતોષાયેલા હોય તો 5 દિવસની અંદર જ NOC ઇશ્યૂ કરી દેવામાં આવે છે. છેલ્લા 21 દિવસના આંકડાઓ પર નજર કરીએ તો ફાયર વિભાગે કુલ 33 જેટલી વિવિધ પ્રકારની ફાયર NOC મંજૂર કરી છે. જેમાં પ્રપોઝ ફાયર NOC અંગેની કુલ 22 અરજીઓ ઓનલાઇન મળી હતી, જેમાંથી 21 અરજીઓને મંજૂરી આપી દેવામાં આવી છે. માત્ર 1 અરજી હાલ પ્રક્રિયા હેઠળ છે. જ્યારે ફાઈનલ NOCની કુલ 14 અરજીઓ આવી હતી, જેમાંથી 12 NOC ઇશ્યૂ કરી દેવામાં આવી છે અને માત્ર 2 અરજીઓ પેન્ડિંગ છે.
સરકારના નવા પરિપત્ર મુજબ, 20 માળ કે 70 મીટરથી વધુ ઊંચાઈ ધરાવતી ઇમારતોમાં સુરક્ષાના ભાગરૂપે 24 કલાક ફાયર ઓપરેટર રાખવા ફરજિયાત કરવામાં આવ્યા છે. આ નિયમનો અમલ થાય તે માટે પણ ફાયર વિભાગ સતર્ક છે. ઓનલાઇન પોર્ટલ દ્વારા પારદર્શિતા આવતા ભ્રષ્ટાચારની શક્યતાઓ ઘટી છે, અરજદારોને પણ ઓનલાઈન માધ્યમ દ્વારા પોતાના કામની સ્થિતિ જાણવામાં સરળતા રહે છે.
