ફેસબુક મિત્રતાની આડમાં 79 લાખનું સાયબર ફ્રોડ કરનાર સૂત્રધાર ઝડપાયો
રૂરલ એલસીબીની કાર્યવાહી : વંથલીનો નયન ટીલવા ઉપલેટામાંથી દબોચાયો, BGC BRRICK એપથી રોકાણની લાલચ આપતો હતો
અગ્ર ગુજરાત, રાજકોટ
ઉપલેટાના વેપારી સાથે લાખો રૂપિયાની ઓનલાઈન ઠગાઈ આચરનાર સાયબર ફ્રોડના મુખ્ય સૂત્રધારને રાજકોટ રૂરલ એલસીબીની ટીમે ઝડપી લઈ કાયદેસરની કાર્યવાહી શરૂ કરી છે. આરોપીએ મહિલાના નામે ફેસબુક પર સંપર્ક સાધી પોતે કોસ્મેટિક્સનો મોલ ચલાવતો હોવાનું ખોટું ભાન કરાવી રોકાણના નામે મોટી રકમ પડાવી હોવાનું ખુલ્યું છે.
પ્રાપ્ત વિગતો મુજબ, ઉપલેટાના નાનીવાવડી ગામે રહેતા અને માર્કેટિંગ યાર્ડમાં કમિશન એજન્ટ તરીકે કાર્યરત સંજયભાઈ રમણીકભાઈ ડઢાણીયા (ઉ.વ. 45) સાથે આ સાયબર ઠગાઈ થઈ હતી. આરોપીએ ફેસબુક પર મહિલાના નામથી ફ્રેન્ડ રિક્વેસ્ટ મોકલી વિશ્વાસમાં લઈ વોટ્સએપ પર વાતચીત શરૂ કરી હતી. પોતે AARAV BOUTIQUE COSMETIC નામનો મોલ સંચાલિત કરતો હોવાનું ખોટું કહી, BGC BRRICK નામની એપમાં પૈસા રોકાણ કરવાથી ભારે નફો થતો હોવાનું સમજાવ્યું હતું.
આરોપીએ ફરિયાદીને એપમાં લોગિન કરવા માટે યુઝરનેમ અને પાસવર્ડ આપી અલગ અલગ તારીખે વિવિધ બેંક ખાતામાં રૂ. 38 લાખ ટ્રાન્સફર કરાવ્યા હતા. ત્યારબાદ નફાની રકમ ઉપાડવા ટેક્સ, કન્વર્ઝન ચાર્જ સહિતના બહાના આપી ફરીથી અલગ અલગ ખાતાઓમાં રૂ. 41.71 લાખ ટ્રાન્સફર કરાવ્યા હતા. આ રીતે કુલ રૂ. 79,71,068ની રકમ ફેસબુક અને વોટ્સએપ મારફતે સાયબર ઠગાઈ કરી પડાવવામાં આવી હતી. આ અંગે ઉપલેટા પોલીસ મથકમાં ગુનો નોંધાયો હતો.
ઘટનાની ગંભીરતા જોતા રાજકોટ રેન્જના આઈજી અશોકકુમાર યાદવ અને એસપી વિજયસિંહ ગુર્જરના માર્ગદર્શન હેઠળ નાસતા ફરતા આરોપીઓને પકડવા સૂચના આપવામાં આવી હતી. તે અનુસંધાને રૂરલ એલસીબી પીઆઈ વી.વી. ઓડેદરાની દેખરેખમાં પીએસઆઈ એચ.સી. ગોહીલ અને આર.વી. ભીમાણીની ટીમે પેટ્રોલિંગ દરમિયાન મળેલી ચોક્કસ બાતમીના આધારે કાર્યવાહી કરી હતી.
ટીમે સાયબર ફ્રોડના ગુનામાં છેલ્લા છ મહિનાથી ફરાર રહેલા નયન કાંતિ ટીલવા (ઉ.વ. 54, રહે. પટેલ ચોક, વંથલી) ને ઉપલેટા બસ સ્ટેન્ડ નજીકના ચોકમાંથી ઝડપી લઈ કસ્ટડીમાં લીધો હતો. હાલ આરોપી પાસેથી વધુ પૂછપરછ હાથ ધરવામાં આવી રહી છે તેમજ અન્ય સાગરીતો અને બેંક ખાતાઓ અંગે તપાસ ચાલુ છે.
