ધ્રોલમાં બાઈક પર આવેલા બે શખ્સો ૫ વર્ષની બાળકીને ઉઠાવી ગયા
ખેતમજૂરી કરતા પરિવાર પર વજ્રઘાત, સીસીટીવી અને ટેકનિકલ સોર્સિસના આધારે પોલીસ ટીમોની કાર્યવાહી
અગ્ર ગુજરાત, જામનગર
જામનગર જિલ્લાના ધ્રોલ તાલુકામાં એક હચમચાવી નાખે તેવી અપહરણની ઘટના સામે આવતા સમગ્ર વિસ્તારમાં ભય અને ચકચાર ફેલાઈ ગઈ છે. ગરેડીયા રોડ નજીક આવેલી એક વાડીમાં મજૂરી કામ કરતા પરિવારની માત્ર ૫ વર્ષની બાળકીનું મોટરસાયકલ પર આવેલા બે શખ્સોએ અપહરણ કરી લેતાં પરિવારે ભાંગી પડવાનો વારો આવ્યો છે.
પ્રાપ્ત વિગતો મુજબ, મૂળ મધ્યપ્રદેશના અલીરાજપુર જિલ્લાના વતની માંગુભાઈ સુંદરિયા પચાયા આદિવાસી હાલ ધ્રોલ ખાતે સંજયભાઈ જેન્તીભાઈ પરમારની વાડીમાં પરિવાર સાથે રહી ખેતમજૂરી કરે છે. ગત તા. ૨૮ જાન્યુઆરી ૨૦૨૬ના રોજ બપોરના પોણા બે થી અઢી વાગ્યાના સમયગાળા દરમિયાન પરિવાર વાડીના કામમાં વ્યસ્ત હતો, ત્યારે મોટરસાયકલ પર આવેલા બે શખ્સોએ તેમની ૫ વર્ષ અને ૨૭ દિવસની દીકરી તારીકા ઉર્ફે નાનીને લલચાવી ફોસલાવીને સાથે લઈ ગયા હતા.
બાળકી અચાનક નજરમાંથી ગાયબ થતાં પરિવારમાં હાહાકાર મચી ગયો હતો. આજુબાજુ શોધખોળ બાદ પણ કોઈ પત્તો ન લાગતાં અંતે ધ્રોલ પોલીસ મથકમાં ફરિયાદ નોંધાવવામાં આવી હતી. ફરિયાદના આધારે ધ્રોલ પોલીસ મથકના પોલીસ ઇન્સ્પેક્ટર એચ.વી. રાઠોડે તાત્કાલિક કાર્યવાહી શરૂ કરી છે.
પોલીસે પુંજારા ફળિયા (મધ્યપ્રદેશ)ના વતની કાજુ હટુ બુદેડીયા અને એક અજાણ્યા શખ્સ સામે બી.એન.એસ. કલમ ૧૩૭(૨) તથા ૫૪ હેઠળ ગુનો નોંધી તપાસનો દોર આગળ ધપાવ્યો છે. હાલ પોલીસ સીસીટીવી ફૂટેજ, ટેકનિકલ સાધનો તેમજ હ્યુમન ઇન્ટેલિજન્સની મદદથી બાળકીની શોધખોળમાં તનતોડ મહેનત કરી રહી છે. નાની ઉંમરની બાળકીના અપહરણની ઘટનાએ ધ્રોલ પંથકમાં માતા–પિતાઓમાં ચિંતાનો માહોલ ઉભો કર્યો છે અને લોકો દ્વારા ઝડપથી બાળકીને શોધી કાઢવાની માંગ ઉઠી રહી છે.
