કૌભાંડમાં ઉધના એસઆઇટીને મોટી સફળતા મળી
સુરતના ચકચારી ૧૫૧૮ કરોડના સાયબર ફ્રોડનો માસ્ટર માઇન્ડ ઝડપાયો
અગ્ર ગુજરાત, સુરત
સુરતના ચકચારી 1500 કરોડથી વધુના સાયબર ફ્રોડ અને બેંક એકાઉન્ટ ભાડે આપવાના કૌભાંડમાં ઉધના SITને મોટી સફળતા મળી છે. છેલ્લા 8 મહિનાથી ધરપકડ ટાળવા માટે દુબઈમાં આશરો લઈ રહેલા મુખ્ય આરોપી દિવ્યેશ જીતેન્દ્રભાઈ ચક્રાણીને સુરત એરપોર્ટ પરથી દબોચી લેવામાં આવ્યો છે. આરોપી વિરુદ્ધ અગાઉ લુક-આઉટ નોટિસ જારી કરવામાં આવી હતી, જેના આધારે તે શારજાહથી સુરત પરત ફરતા જ સુરત એરપોર્ટ પર ઝડપાઈ ગયો હતો.
આ કૌભાંડમાં આરોપીઓની કામ કરવાની પદ્ધતિ અત્યંત વ્યવસ્થિત અને ગુનાહિત કાવતરાથી ભરેલી હતી. આરોપીઓ આર્થિક રીતે નબળા અથવા સામાન્ય નાગરિકોને રૂપિયાની લાલચ આપી હતી. આ લોકો પાસેથી તેમના અસલ પાનકાર્ડ અને આધારકાર્ડ મેળવી લેવામાં આવતા હતા. દસ્તાવેજોના આધારે ખોટી દુકાનો કે વ્યવસાયના સેટઅપ બતાવીને બેંકોમાં ‘કરંટ એકાઉન્ટ’ ખોલાવવામાં આવતા હતા.
એકવાર બેંક એકાઉન્ટ ખૂલી જાય એટલે તેની વેલકમ કિટ, ચેકબુક, ડેબિટ કાર્ડ અને બેંકમાં રજિસ્ટર્ડ થયેલું મોબાઈલ સીમકાર્ડ આરોપીઓ પોતાની પાસે રાખી લેતા હતા. આ એકાઉન્ટ્સના યુઝરનેમ અને પાસવર્ડ બદલીને, ખોટા ઇલેક્ટ્રોનિક દસ્તાવેજો ઉભા કરી આ સંપૂર્ણ કિટ્સ સાયબર ફ્રોડ આચરતી આંતરરાષ્ટ્રીય ચાઈનીઝ ગેંગને ઊંચા કમિશનથી વેચી દેવામાં આવતી હતી.
આ સમગ્ર કૌભાંડનો પર્દાફાશ 21 મે 2025 ના રોજ ઉધના વિસ્તારમાં વાહન ચેકિંગ દરમિયાન થયો હતો. એક શંકાસ્પદ એક્ટિવા ચાલક (રજીસ્ટર નં- GJ-05 TD-7745) ની પૂછપરછમાં બેંક એકાઉન્ટ્સનો આ મોટો ખેલ સામે આવ્યો હતો. પોલીસની તપાસમાં જાણવા મળ્યું છે કે, આ ભાડે આપેલા એકાઉન્ટ્સ દ્વારા અત્યાર સુધીમાં અંદાજે રૂપિયા 1518,05,13,682નું સાયબર ફ્રોડ ટ્રાન્ઝેક્શન થયેલું હોવાનું જાણવા મળ્યું છે. આ નાણાં ઇન્ટરનેશનલ ગેંગ દ્વારા વિવિધ સાયબર ગુનાઓ આચરીને આ એકાઉન્ટ્સમાં ટ્રાન્સફર કરવામાં આવ્યા હતા.
પોલીસ પકડથી બચવા આઠ મહિનાથી દુબઇ નાસી ગયો હતો
મુખ્ય આરોપી દિવ્યેશ જીતેન્દ્રભાઈ ચક્રાણી (ઉ.વ. 26, ધંધો- ટેક્સટાઈલ્સ, રહે- 13, લક્ષ્મીનગર સોસાયટી, એ.કે.રોડ, સુરત; મૂળ દેવળીયા, અમરેલી) આ ગુનામાં પોલીસની પકડથી બચવા છેલ્લા 8 મહિનાથી દુબઈ નાસી ગયો હતો. સુરત પોલીસે તેની સામે લુક-આઉટ સર્ક્યુલર જારી કર્યો હતો. જેવો દિવ્યેશ શારજાહની ફ્લાઈટ પકડી સુરત એરપોર્ટ પર ઉતર્યો, કે તુરંત જ ઈમિગ્રેશન અને ઉધના SIT ની ટીમે તેની અટકાયત કરી લીધી હતી.
