ધોરાજીમાં નબળા રોડની કામગીરીની પોલ છતી થઈ જતા તંત્રની સૂચનાથી ફરી રોડ ખોદવામાં આવ્યો…
કોંગ્રેસ અને સામાન્ય જનતાની ફરિયાદો અને અખબારી અહેવાલોને ધ્યાનમાં લઇ માર્ગ અને મકાન વિભાગ દ્વારા ક્ષતિગ્રસ્ત રોડ ને ખોદી નવેસરથી રોડ નું કામ શરૂ કરવા કોન્ટ્રાક્ટરને સુચના…
જુનાગઢ રોડ પર થોડા સમય પૂર્વે કોન્ટ્રાક્ટર દ્વારા લોટ પાણીને લાકડા જેવો રોડ બનાવતા વર્તમાન ધારાસભ્ય એ કોન્ટ્રાક્ટરને બ્લેક લિસ્ટ કરવામાં આવશે તેવી વાત જણાવેલ જેને બ્લેક લસ્ટ કરવાની બદલે નવા રોડનું કામ સોંપવામાં આવ્યું ત્યારે વર્તમાન ધારાસભ્ય શા માટે કોન્ટ્રાક્ટર ની છાવરી રહ્યા છે ? લલિત વસોયા પૂર્વ ધારાસભ્ય
ધોરાજીમાં તાજેતરમાં નવો બનેલો ગેલેક્સી ચોક થી જમનાવડ રોડ તરફ જતો સિમેન્ટ રોડ નવો નકોર રોડ તૂટી જતા અને તિરાડો દેખાવા લાગતા નબળા કામગીરીની પોલ જનતા સમક્ષ ખુલવા પામી હતી. જેને લઇ જાગૃત નાગરિકો અને અખબારો દ્વારા નબળી કામગીરી ઉજાગર કરવામાં આવી હતી આ ઉપરાંત ધોરાજીના પૂર્વ ધારાસભ્ય લલિત વસોયા એ પણ નબળી કામગીરી ની પોલ છતી કરી ફરીથી કામ નવેસરથી કરવામાં નહીં આવે તો કાયદો હાથમાં લઇ જાતે જ રોડ ખોદી નાખવા ની ચીમકી આપી હતી.
ગેલેક્સી ચોક, પોસ્ટ ઓફિસ ચોક અને જમનાવડ રોડ પર બનાવેલા નવા સિમેન્ટ રોડ માં તિરાડો પડવા લાગતા રોડની કામગીરીમાં લોટ પાણીને લાકડા અને ભ્રષ્ટાચાર થયો હોય તેવો લોકોનો આક્ષેપ તંત્ર સામે સ્પષ્ટપણે થઈ રહ્યો છે અખબારોમાં નબળા રોડના અહેવાલો પ્રસિદ્ધ થતા તેમજ વિપક્ષના નેતાની ચીમકી ને લઈ માર્ગ મકાન વિભાગ દ્વારા કોન્ટ્રાક્ટરને ક્ષતિ ગ્રસ્ત રોડ ખોદીને ફરીથી બનાવવાની સૂચના આપવામાં આવતા કોન્ટ્રાક્ટર દ્વારા જેસીબી દ્વારા રોડને ખોદવાની કામગીરી શરૂ કરવામાં આવી છે.
આ અંગે માર્ગ અને મકાન વિભાગના અધિકારી બરનવાલ એ મીડિયા ને જણાવ્યું હતું કે હોસ્પિટલ પાસે ન 182 મીટર નો સિમેન્ટ રોડ લોકાર્પણ થાય તે પૂર્વે રાહદારીઓએ વાપરવાનું શરૂ કરતાં રોડ ડેમેજ થવા પામ્યો છે. જેથી 182 મીટર નો રોડ જે અંદાજે આઠ લાખના ખર્ચે બનેલો છે તેને ફરીથી બનાવવા માટે અમારા વિભાગ દ્વારા કોન્ટ્રાક્ટરને સુચના અપાયેલ છે.
બીજી તરફ પૂર્વ ધારાસભ્ય લલિત વસોયા એ જણાવેલ હતું કે આખો રોડ નબળો બનાવવામાં આવ્યો છે જેમાં ભ્રષ્ટાચાર થયો હોવાનું સ્પષ્ટ દેખાઈ રહ્યું છે આ અગાઉ પણ જુનાગઢ રોડ પર ડામર રોડની નબળી કામગીરીની પોલ છતી થતા વર્તમાન ધારાસભ્ય મીડિયા સમક્ષ જણાવેલ કે કોન્ટ્રાક્ટરને બ્લેક લિસ્ટ કરવામાં આવશે જોકે કોન્ટ્રાક્ટરને બ્લેકલિસ્ટ કરવાની બદલે ધોરાજી શહેરમાંથી પસાર થતાં નવા સિમેન્ટ રોડ નું કામ પણ ફરી એ જ કોન્ટ્રાક્ટરને આપવામાં આવ્યું છે અને તેમણે જૂનાગઢ રોડ બાદ ફરી બીજી વખત શહેરની વચ્ચે બનતા સિમેન્ટ રોડમાં પણ નબળી કામગીરી કરી છે ત્યારે શાસક પક્ષ અને વર્તમાન ધારાસભ્ય આવા કોન્ટ્રાક્ટરને શા માટે છાવરે છે તે સવાલ ઉભો થઈ રહ્યો છે.
ધોરાજીમાં રોડ રસ્તા ને લઇ હમેશા વિવાદો ઉઠતા રહે છે અગાઉ જેતપુર રોડમાં પણ રોડ રસ્તાની નબળી કામગીરી થઈ હોય ફરેણી રોડ પર સ્થાનિકોએ રોડ રસ્તા ને લઇ આક્રોશ વ્યક્ત કર્યો હતો ત્યારબાદ જૂનાગઢ રોડ અને હવે ધોરાજી શહેરમાંથી પસાર થતાં સિમેન્ટ રોડ પર નબળી કામગીરીની પોલ છતી થતા ફરી રોડને ખોદી નવો રોડ કરવાની તજવીજ હાથ ધરાઈ છે ત્યારે એટલું સમજી શકાય કે રોડ રસ્તા મામલે તંત્ર દ્વારા ચોક્કસ દેખરેખ રાખવામાં આવતી નથી જેને લઇ પ્રજામાં રોડ રસ્તા મામલે આક્રોશ દેખાઈ રહ્યો છે.
તસવીર વિમલ સોંદરવા ધોરાજી
