શાપર (વે)માં ગેરકાયદેસર હથિયાર સાથે યુવાન ઝડપાયો
ગંગાગેટ મફતીયાપરા વિસ્તારમાં દરોડો; દેશી બનાવટની પિસ્તોલ જપ્ત
અગ્ર ગુજરાત, રાજકોટ
રાજકોટ ગ્રામ્ય પોલીસ દ્વારા ગેરકાયદેસર હથિયારો સામે ચલાવવામાં આવી રહેલી કડક ઝુંબેશ અંતર્ગત શાપર (વેરાવળ) પોલીસે મહત્વપૂર્ણ સફળતા હાંસલ કરી છે. ચોક્કસ બાતમીના આધારે કાર્યવાહી કરતાં પોલીસે એક યુવાનને દેશી બનાવટની પિસ્તોલ સાથે ઝડપી પાડી તેની વિરુદ્ધ કાયદેસરની કાર્યવાહી શરૂ કરી છે.
પોલીસ સૂત્રોના જણાવ્યા મુજબ, રાજકોટ રેન્જના નાયબ પોલીસ મહાનિરીક્ષક નિર્લિપ્ત રાય અને જિલ્લા પોલીસ અધિક્ષક વિજયસિંહ ગુર્જરના માર્ગદર્શન હેઠળ જિલ્લામાં ગેરકાયદેસર હથિયારો રાખતા અને તેનું વેપાર કરતા તત્વો પર કડક નજર રાખવામાં આવી રહી છે. આ જ અભિયાનના ભાગરૂપે શાપર (વેરાવળ) પોલીસ સ્ટેશનનો સર્વેલન્સ સ્ટાફ વિસ્તારમાં પેટ્રોલિંગમાં હતો.
આ દરમિયાન પોલીસને બાતમી મળી હતી કે ગંગાગેટ મફતીયાપરા વિસ્તારમાં એક શખ્સ ગેરકાયદેસર હથિયાર સાથે ફરી રહ્યો છે. બાતમીના આધારે એએસઆઈ ડી.આર. સરવૈયા અને પોલીસ કોન્સ્ટેબલ રાજદીપસિંહ જાડેજાએ તાત્કાલિક કાર્યવાહી કરી સ્થળ પર દરોડો પાડ્યો હતો.
દરોડા દરમિયાન શંકાસ્પદ વ્યક્તિને અટકાવી તેની તલાશી લેવામાં આવી હતી. તપાસ દરમિયાન તેની પાસેથી લાયસન્સ વગરની દેશી બનાવટની પિસ્તોલ તથા મેગેઝીન મળી આવી હતી. પોલીસે અંદાજે રૂ.10 હજારની કિંમતનું આ હથિયાર જપ્ત કરી આરોપીને કસ્ટડીમાં લીધો હતો. પકડાયેલા આરોપીની ઓળખ સુમીત સુગ્રીવભાઈ સિંહ (ઉંમર 22) તરીકે થઈ છે, જે હાલમાં શાપર વિસ્તારમાં રહે છે અને મૂળ બિહાર રાજ્યનો વતની હોવાનું સામે આવ્યું છે. પ્રાથમિક તપાસમાં ખુલ્યું છે કે આ હથિયાર તે ઉત્તર પ્રદેશના પ્રયાગરાજ વિસ્તારમાંથી લાવ્યો હતો. પોલીસ રેકોર્ડ મુજબ, આરોપી અગાઉ પણ શાપર પોલીસ સ્ટેશનમાં ગુનાહિત પ્રવૃત્તિમાં સંડોવાયેલો રહ્યો છે. તેની સામે અગાઉ જાહેર શાંતિ ભંગ સંબંધિત કાયદા હેઠળ કેસ નોંધાયો હતો.
આ સમગ્ર મામલે પોલીસે આરોપી વિરુદ્ધ આર્મ્સ એક્ટની સંબંધિત કલમ હેઠળ ગુનો નોંધી વધુ તપાસ હાથ ધરી છે. હથિયાર ક્યાંથી અને કયા હેતુસર લાવવામાં આવ્યું હતું તે દિશામાં પણ તપાસ ચાલુ છે. આ કામગીરી શાપર (વેરાવળ) પોલીસ સ્ટેશનના પીઆઈ આર.બી. રાણા ના માર્ગદર્શન હેઠળ સફળતાપૂર્વક પાર પાડવામાં આવી હતી.
