- ક્રાઈમ બ્રાંચે કરોડપતિ વાહન ચોરની ધરપકડ કરી
- અમદાવાદ-ગાંધીનગર વિસ્તારમાંથી કરતો ચોરી
- 41 વાહનો સહિત અને 4.70 લાખનો મુદ્દામાલ જપ્ત
કરોડપતિ ચોરની ધરપકડ
અમદાવાદ ક્રાઈમ બ્રાંચે મોજશોખ પૂરા કરવા વાહનચોરી કરનાર કરોડપતિ ચોરની ધરપકડ કરી છે. આરોપી પાસે અમદાવાદમાં કરોડોના બે ફ્લેટ છે, પરંતુ ફરવા માટે વાહન ન હોવાથી એક્ટિવા ચોરી કરતો અને પેટ્રોલ પૂરું થયા બાદ બિનવારસી છોડી દેતો હતો. અમદાવાદ ક્રાઈમ બ્રાન્ચે આરોપી પાસેથી આવા 41 ચોરીના વાહનો કબજે કરી 4.70 લાખનો મુદ્દામાલ કબજે કર્યો છે.
બિનવારસી જગ્યાએ છોડી દેતો વાહન
અમદાવાદ ક્રાઈમ બ્રાન્ચની કસ્ટડીમાં રહેલા આરોપીનું નામ હિતેષ જૈન છે. આ હિતેષ જૈન ફરવા માટે અને વાહન ચલાવવાનો શોખ પૂરો કરવા એકટીવા ચોરી કરતો હતો. આરોપીએ છેલ્લા આઠ વર્ષમાં 130થી વધુ વાહન ચોરી કર્યા છે. જેમાંથી અમદાવાદ અને તેની આસપાસના વિસ્તારમાંથી આરોપી વાહન ચોરી કરતો હતો અને વાહનમાંથી પેટ્રોલ પૂરું થાય ત્યાં સુધી વાપરી પોતાની પાસે રાખ્યા બાદ તેને બિનવારસી જગ્યાએ છોડી દેતો હતો.
અમદાવાદ-ગાંધીનગરમાં ચોરી કરતો
ક્રાઈમ બ્રાન્ચે આવા જ 4,70,000 ની કિંમતના 41 વાહનો કબજે કર્યા છે. મહત્વનું છે કે, આરોપી માત્ર બે થી ત્રણ મિનિટમાં એકટીવા વાહન ચોરી કરી ફરાર થઈ જતો હતો. જે અંગે અમદાવાદના સાબરમતી, બોડકદેવ, ચાંદખેડા, રાણીપ, સેટેલાઈટ અને ગાંધીનગરના સંખ્યાબંધ પોલીસ સ્ટેશનમાં ચોરીની ફરિયાદો દાખલ થઈ છે. આરોપીએ અમદાવાદના બગીચા, મોલ, બસ-સ્ટેશન અને રેલ્વે સ્ટેશન પાસેથી ચોરી કરી હોવાની કબુલાત કરી રહ્યો છે.
70 એક્ટિવા ચોરીની કબુલાત
પોલીસ તપાસમાં સામે આવ્યું કે, ઝડપાયેલ આરોપી હિતેષ જૈન ચોરી કર્યા બાદ વાહનને પીરાણા પાસેના ખુલ્લા પ્લોટમાં મૂકી રાખતો હતો. જ્યાંથી પોલીસે ૩૦ જેટલા વાહનો કબજે કર્યા છે. આરોપીને રૂપિયાની જરૂર પડતા વાહનની બેટરી અને અન્ય સામાન વેચી મોજ શોખ પૂરા કરતો હતો. ઉપરાંત 3 મહિનામાં જ આરોપી એ 70 એક્ટિવાની ચોરી કર્યા હોવાની કબુલાત કરી છે. આરોપી ખાસ કરીને જૂના વાહનો અને જે વાહનોના લોક ઘસાઈ ગયા હોય તેવા વાહનોને ટાર્ગેટ કરતો હોવાનુ સામે આવ્યુ છે.
કરોડોનો ફ્લેટ ભાડે આપ્યો
મહત્વનું છે કે, આરોપીની પૂછપરછ બાદ કરોડોની સંપત્તિ ધરાવતો યુવક આખરે કેમ ચોરીના રવાડે ચડ્યો. તેની પોલીસ તપાસ કરી રહી છે. આરોપી પાસે અમદાવાદમાં બે કરોડના બે ફ્લેટ છે. જેમાથી એક ફ્લેટ ભાડે આપ્યો છે અને આરોપી વિરુદ્ધ અમદાવાદના તમામ પોલીસ સ્ટેશનમાં ચોરીના ગુનાઓ નોંધાયેલા છે ઉપરાંત ગાંધીનગરના પણ ઘણા બધા પોલીસ મથકો માટેની ધરપકડ કરવામાં આવી છે. ત્યારે માત્ર મોજશોખ જવાબદાર છે કે પછી અન્ય કોઈ કારણ એ તે ચોરીઓ કરે છે. તે અંગે પોલીસે તપાસ શરૂ કરી.
