વાહનચાલકોની સલામતી અને ગુણવત્તાને ઘ્યાનમાં રાખી સરકારનો નિર્ણય
નવા હાઈ-વેના લોકાર્પણ પહેલા લેવાશે ત્રણ માસ ફિટનેશ ટેસ્ટ
ટેસ્ટીંગ સમય દરમ્યાન વાહન ચાલકો પાસેથી નહીં લેવાય ટોલટેક્સ: ૯૦ દિવસમાં ખામી દેખાશે તો કોન્ટ્રાક્ટર અને સલાહકારની જવાબદારી કરાશે ફીક્સ: ક્ષતિઓ સંપૂર્ણ સુધારી લેવાયાના સંતોષકારક રિપોર્ટ બાદ જ ઉદ્ઘાટનને મંજૂરી અપાશે
અગ્ર ગુજરાત, રાજકોટ
દેશભરમાં ઝડપથી વિસ્તરી રહેલા એક્સપ્રેસવે અને નેશનલ હાઇવેના નેટવર્ક વચ્ચે કેન્દ્ર સરકારના માર્ગ પરિવહન અને રાજમાર્ગ મંત્રાલય દ્વારા એક અત્યંત મહત્વપૂર્ણ અને જનહિતકારી નિર્ણય લેવામાં આવ્યો છે. નવી નીતિ મુજબ, હવેથી દેશમાં કોઈપણ નવા બનેલા હાઇવે કે એક્સપ્રેસવેને ઉતાવળમાં વાહનવ્યવહાર માટે ખુલ્લો મૂકવામાં આવશે નહીં.
સત્તાવાર ઉદ્ઘાટન અને ટોલ વસૂલાત શરૂ કરતા પહેલાં તે રસ્તાને ૨ થી ૩ મહિનાના સખત ‘ફિટનેસ ટેસ્ટ’ અથવા ટ્રાયલ રનમાંથી પસાર થવું પડશે. સૌથી ખાસ વાત એ છે કે આ ટ્રાયલ સમયગાળા દરમિયાન વાહનચાલકો પાસેથી કોઈ પણ પ્રકારનો ટોલ ટેક્સ વસૂલવામાં આવશે નહીં.
છેલ્લા કેટલાક સમયથી દેશના વિવિધ ભાગોમાં એવા અહેવાલો સામે આવ્યા હતા કે હાઇવેનું ધામધૂમથી ઉદ્ઘાટન થયાના થોડા જ દિવસોમાં રસ્તાઓ પર મોટા ખાડા પડી જવા, પાણી ભરાઈ જવા કે ડામર ઉખડી જવાની ગંભીર સમસ્યાઓ સર્જાતી હતી. આ પરિસ્થિતિને ગંભીરતાથી લેતાં સરકારે સ્પષ્ટ કર્યું છે કે રસ્તાની ગુણવત્તા સાથે કોઈ પણ પ્રકારનું સમઝૌતું કરવામાં આવશે નહીં અને તમામ ખામીઓ સંપૂર્ણપણે દૂર કર્યા બાદ જ રસ્તાને જનતા માટે વિધિવત ખુલ્લો મુકાશે.
તાજેતરના ભૂતકાળમાં લખનૌ-કાનપુર એક્સપ્રેસવે અને દેહરાદૂન એક્સપ્રેસવે જેવા અનેક મહત્વાકાંક્ષી અને મોટા પ્રોજેક્ટ્સમાં ઉદ્ઘાટન થતાંની સાથે જ રસ્તાની ગુણવત્તા સામે ગંભીર પ્રશ્નો ઊભા થયા હતા. ચોમાસા દરમિયાન અથવા સામાન્ય વાહનવ્યવહાર શરૂ થતાં જ રસ્તાઓ ધોવાઈ જવા અને ખાડા પડવાના કારણે મુસાફરોને ભારે મુશ્કેલીઓનો સામનો કરવો પડ્યો હતો.
સરકારનું સ્પષ્ટ માનવું છે કે જ્યારે જનતા પાસેથી ભારે રકમનો ટોલ ટેક્સ વસૂલવામાં આવતો હોય, ત્યારે તેમને ખરાબ અને જોખમી રસ્તાઓ પર મુસાફરી કરવા મજબૂર કરવા સંપૂર્ણપણે અન્યાયી છે. ઉદ્ઘાટન પછી રસ્તાની ખામીઓ છતી થાય અને લોકો હેરાન થાય તે સ્થિતિ બદલવા માટે જ આ ૩ મહિનાના ફ્રી ટ્રાયલ રનની યોજના ઘડી કાઢવામાં આવી છે.
નવી વ્યવસ્થા હેઠળ, ૨ થી ૩ મહિનાના ટ્રાયલ રન દરમિયાન રસ્તા પરથી ભારે અને હળવા વાહનો પસાર થશે, જેનાથી રસ્તાની વાસ્તવિક મજબૂતી, ડ્રેનેજ સિસ્ટમ (પાણીના નિકાલની વ્યવસ્થા) અને વળાંકોની સુરક્ષાનું નિરીક્ષણ કરી શકાશે. આ ગાળા દરમિયાન જે પણ ટેકનિકલ ખામીઓ કે ક્ષતિઓ ધ્યાને આવશે, તેને તાત્કાલિક સુધારવાની જવાબદારી સંબંધિત કોન્ટ્રાક્ટરો અને એન્જિનિયરિંગ કન્સલ્ટન્ટ્સની રહેશે.
જો નિર્ધારિત સમયમાં ખામીઓ સુધારવામાં નહીં આવે તો કોન્ટ્રાક્ટરો સામે કડક કાર્યવાહી અને દંડની જોગવાઈ પણ કરવામાં આવશે. તમામ ક્ષતિઓ પૂર્ણપણે સુધારી લેવાયાના સંતોષકારક રિપોર્ટ બાદ જ મંત્રાલય દ્વારા ટોલ પ્લાઝા શરૂ કરવાની અને સત્તાવાર ઉદ્ઘાટન કરવાની મંજૂરી આપવામાં આવશે.
સરકારના આ નિર્ણયથી સામાન્ય વાહનચાલકોને બેવડો લાભ થશે. પ્રથમ, નવા હાઇવે પર શરૂઆતના ૨ થી ૩ મહિના સુધી કોઈ ટોલ ટેક્સ ચૂકવવો નહીં પડે, જેનાથી આર્થિક બચત થશે. બીજું અને સૌથી મહત્વનું, જ્યારે ટોલ વસૂલાત સત્તાવાર રીતે શરૂ થશે ત્યારે ગ્રાહકોને એક સુરક્ષિત, ખાડા મુક્ત અને ઉચ્ચ ગુણવત્તાવાળો રસ્તો મળશે. આ નિર્ણયથી દેશમાં માર્ગ નિર્માણની ગુણવત્તામાં સુધારો થશે અને માર્ગ અકસ્માતોમાં પણ નોંધપાત્ર ઘટાડો જોવા મળશે.
