અમરેલી જિલ્લા પંચાયતના સદસ્ય અને નાયબ મામલતદાર વિરૂદ્ધ જમીન દબાણની ફરિયાદ
સુરત કલેક્ટર સમક્ષ રજૂઆત: અધિકારીને સસ્પેન્ડ કરી તપાસ કરવા માંગ
અગ્ર ગુજરાત, સુરત
સરકારી જમીનોનું રક્ષણ કરવાની જેમના શિરે મુખ્ય જવાબદારી હોય છે, તેવા જ એક ઉચ્ચ મહેસૂલી અધિકારી પોતે સરકારી જમીન દબાવીને બેઠા હોવાનો ચોંકાવનારો મામલો પ્રકાશમાં આવ્યો છે. કામરેજ (સુરત) ખાતે નાયબ મામલતદાર તરીકે ફરજ બજાવતા હસમુખભાઈ હિંમતભાઈ પાનસુરીયા અને તેમના સગા ભાઈ, જેઓ અમરેલી જિલ્લા પંચાયતના સભ્ય છે, તેમની સામે સરકારી જમીન પર ગેરકાયદેસર કબજો જમાવી રાખવાની ગંભીર ફરિયાદ અમરેલી જિલ્લા કલેક્ટર અને નાયબ મામલતદાર વિરુદ્ધ સુરત જિલ્લા કલેક્ટર સમક્ષ લેખિત અરજી દાખલ કરવામાં આવી છે. આ મામલે કાયદાના રક્ષક એવા અધિકારીને તાત્કાલિક અસરથી સસ્પેન્ડ કરીને તટસ્થ તપાસ કરવાની માંગ પ્રબળ બની છે.
અરજદાર વિનોદભાઈ દેવશીભાઈ બગડા (રહે. વાંશિયાળી, તા. સાવરકુંડલા) દ્વારા સત્તાવાર પુરાવા સાથે કરવામાં આવેલી લેખિત રજૂઆત મુજબ, અમરેલી જિલ્લાના સાવરકુંડલા તાલુકાના વાંશિયાળી ગામે આવેલી ‘શ્રી સરકાર’ જમીન સર્વે નંબર ૨૬૫ પૈકી ૨ ને કાનૂની પ્રક્રિયાના અંતે ગત તારીખ ૧૬/૦૬/૨૦૨૩ ના રોજ સત્તાવાર હુકમ કરીને સરકાર હસ્તક (ખાલસા) કરવામાં આવી હતી.
આશ્ચર્યની વાત એ છે કે, સરકારનો આદેશ હોવા છતાં નાયબ મામલતદાર અને તેમના પદાધિકારી ભાઈએ સત્તાના જોરે આ જમીન ખાલી કરી નથી. આજદિન સુધી આ કિંમતી જમીન પર ગેરકાયદેસર રીતે કબજો જમાવી રાખીને સરકારના જ ખાલસા હુકમનો સરેઆમ અનાદર કરવામાં આવી રહ્યો હોવાનો અરજીમાં ઉલ્લેખ છે.
આ કેસમાં સૌથી ગંભીર વળાંક એ છે કે, નાયબ મામલતદાર શ્રી હસમુખભાઈ પાનસુરીયા અગાઉ સાવરકુંડલા ખાતે જ મહેસૂલ વિભાગમાં ફરજ બજાવતા હતા. એ સમયે તેમણે પોતાના સત્તાવાર સરકારી હોદ્દા અને પ્રભાવનો દુરુપયોગ કરીને આ સમગ્ર ગેરરીતિ આચરી હોવાની પાકી આશંકા સેવાઈ રહી છે. એક જવાબદાર વહીવટી અધિકારી પોતે જ કાયદાકીય આદેશોનું ઉલ્લંઘન કરે તે ગુજરાત મુલ્કી સેવા (વર્તણૂક) નિયમોનો પણ ગંભીર ભંગ ગણાય.
પ્રાપ્ત વિગતો અનુસાર, આ કર્મચારી વિરુદ્ધ હાલમાં માનનીય જિલ્લા કલેક્ટરશ્રી, અમરેલી દ્વારા ગંભીર પ્રકારની વહીવટી તપાસ ચલાવવામાં આવી રહી છે. અરજદારે સુરત કલેક્ટરને નમ્ર અપીલ કરી છે કે જ્યાં સુધી આ કેસમાં દૂધનું દૂધ અને પાણીનું પાણી ન થાય (સંપૂર્ણ સત્ય સામે ન આવે), ત્યાં સુધી નાયબ મામલતદારને તાત્કાલિક અસરથી સસ્પેન્ડ કરવામાં આવે, જેથી તેઓ વગ વાપરીને તપાસને પ્રભાવિત ન કરી શકે.
આ મામલાની ગંભીરતાને જોતાં આ અરજીની નકલ ગાંધીનગર ખાતે મહેસૂલ વિભાગના અગ્ર સચિવશ્રીને પણ મોકલી આપવામાં આવી છે. પુરાવા તરીકે જમીનના નકશા, કબજાના ફોટોગ્રાફ્સ અને અગાઉના અખબારી અહેવાલો પણ બિડાણ સ્વરૂપે રજૂ કરાયા છે, જેના કારણે મહેસૂલ વિભાગમાં ભારે ફફડાટ વ્યાપી ગયો છે.
