મવડી પોલીસ હેડક્વાર્ટરમાં પોલીસમેનના ભત્રીજાનો ગળેફાંસો ખાઈ આપઘાત
ગોંડલના સતાપર ગામનો 23 વર્ષીય સતિષ કાકાના ઘરે એકલો હતો ત્યારે બાલ્કનીમાં ચુંદડી બાંધી જીવન ટૂંકાવ્યું; માતાના અવસાન બાદ એકના એક પુત્રના મોતથી પરિવારમાં માતમ
અગ્ર ગુજરાત, રાજકોટ
રાજકોટના મવડી પોલીસ હેડક્વાર્ટરમાં આવેલા રહેણાંક બ્લોકમાં એક યુવાને ગળેફાંસો ખાઈ જીવન ટૂંકાવી લેતા ચકચાર મચી ગઈ છે. મૂળ ગોંડલ તાલુકાના સતાપર ગામનો અને રાજકોટમાં ખાનગી કંપનીમાં નોકરી કરતો 23 વર્ષીય યુવાન કાકાના ઘરે રોકાયો હતો. રાત્રિના સમયે ઘરમાં એકલો હતો ત્યારે તેણે આઠમા માળે આવેલા મકાનની બાલ્કનીમાં લોખંડના હુક સાથે ચુંદડી બાંધી ગળેફાંસો ખાઈ લીધો હતો. યુવાનના આપઘાત પાછળનું કારણ હજુ અકબંધ છે. માલવિયાનગર પોલીસે મૃતદેહને પોસ્ટમોર્ટમ માટે સિવિલ હોસ્પિટલ ખસેડી તપાસ હાથ ધરી છે.
મળતી વિગતો મુજબ, સતાપર ગામના કલ્પેશભાઈ ધ્રાંગાના 23 વર્ષીય પુત્ર સતિષ છેલ્લા કેટલાક સમયથી રાજકોટમાં રહેતો હતો. તે મવડી પોલીસ હેડક્વાર્ટરના આઠમા માળે આવેલા બ્લોક નંબર બી-12માં રહેતા તેના કાકા અનિલભાઈના ઘરે રોકાતો હતો અને ખાનગી કંપનીમાં નોકરી કરી પરિવારને આર્થિક રીતે મદદરૂપ થતો હતો. ગઈકાલે રાત્રે સતિષના કાકા અનિલભાઈ પોતાની ફરજ પર ગયા હતા, જ્યારે કાકી પણ બહારગામ હોવાથી ઘરમાં સતિષ એકલો હતો. આ દરમિયાન કોઈ અગમ્ય કારણોસર તેણે ઘરની બાલ્કનીમાં આવેલા લોખંડના હુક સાથે ચુંદડી બાંધી ગળેફાંસો ખાઈ લીધો હતો. બનાવની જાણ થતાં આસપાસના લોકો દોડી આવ્યા હતા અને પોલીસને જાણ કરવામાં આવી હતી.
માલવિયાનગર પોલીસનો સ્ટાફ ઘટનાસ્થળે પહોંચ્યો હતો અને યુવાનના મૃતદેહને નીચે ઉતારી પોસ્ટમોર્ટમ માટે સિવિલ હોસ્પિટલ ખસેડ્યો હતો. સતિષે કયા કારણોસર આત્યંતિક પગલું ભર્યું તે અંગે પરિવારજનોને પણ કોઈ જાણ ન હોવાથી પોલીસે આપઘાત પાછળના કારણોની તપાસ શરૂ કરી છે.
આ બનાવમાં સૌથી કરુણ બાબત એ છે કે સતિષ માતા-પિતાનો એકનો એક પુત્ર હતો. થોડા સમય પહેલાં જ તેની માતાનું અવસાન થયું હતું. પિતા કલ્પેશભાઈ વતન સતાપર ગામે ખેતીકામ કરીને પરિવારનું ગુજરાન ચલાવે છે. માતાના અવસાન બાદ હવે એકના એક પુત્રના પણ અચાનક મોતથી પરિવાર પર આભ તૂટી પડ્યું છે. યુવાનના અકાળે અવસાનથી વતન સતાપર ગામમાં પણ શોકની લાગણી પ્રસરી ગઈ છે.


