સર્વોત્તમ ડેરી દ્વારા ૨૫મી વાર્ષિક સાધારણ સભા યોજાઇ : પશુપાલકો માટે મહત્વપૂર્ણ જાહેરાતો
૧૫% ડિવિડન્ડની ઘોષણા, બાયોગેસ પ્લાન્ટ અને આઈસ્ક્રીમ પ્લાન્ટ સાથે દૂધ ઉત્પાદકોની સમૃદ્ધિ તરફ નવું કદમ
અગ્ર ગુજરાત, ભાવનગર
શ્રી ભાવનગર જિલ્લા સહકારી દૂધ ઉત્પાદક સંઘ લી. (સર્વોત્તમ ડેરી) ની ૨૫મી વાર્ષિક સાધારણ સભા તા. ૧૩/૦૮/૨૦૨૬ ના રોજ ડેરી પરિસરમાં વિશાળ સભાસદોની ઉપસ્થિતિમાં ઉત્સાહભેર યોજાઈ ગઈ હતી. સંઘના સ્થાપક ચેરમેનશ્રી મહેન્દ્રભાઈ પનોતના અધ્યક્ષ સ્થાને યોજાયેલી આ સભામાં સ્થાપક અને મેનેજિંગ ડીરેક્ટરશ્રી એચ.આર.જોષી, બોર્ડ ઓફ ડિરેક્ટર્સ તેમજ વિવિધ દૂધ મંડળીઓના પ્રતિનિધિઓ મોટી સંખ્યામાં હાજર રહ્યા હતા. સભામાં એજન્ડા મુજબની તમામ કામગીરી સર્વાનુમતે પસાર કરવામાં આવી હતી.
દર વર્ષની પરંપરાને જાળવી રાખીને આ વર્ષે પણ સભાસદો માટે ૧૫ ટકા ડિવિડન્ડ આપવાની જાહેરાત કરવામાં આવી હતી, જેનાથી હાજર રહેલા મંડળીના પ્રતિનિધિઓમાં ખુશીની લહેર ફરી વળી હતી.
સંઘ દ્વારા ટૂંક સમયમાં બાયોગેસ પ્લાન્ટ શરૂ કરવામાં આવશે, જેનાથી પશુપાલકોને ગોબર (છાણ) માંથી પણ વધારાની આવક પ્રાપ્ત થશે. ડેરીના વિકાસને નવી ઊંચાઈએ લઈ જવા માટે ટૂંક સમયમાં આઈસ્ક્રીમ પ્લાન્ટ પણ કાર્યરત કરવામાં આવશે. ચાલુ વર્ષને ‘સંવર્ધન વર્ષ’ તરીકે ઉજવવામાં આવી રહ્યું છે. સેક્સ સીમેન ડોઝના ઉપયોગથી જો માદા પશુ (વાછરડી કે પાડી) નો જન્મ થશે, તો પશુપાલક પાસેથી લેવાયેલા ₹૩૦૦ પણ પરત (તદ્દન મફત) કરી દેવામાં આવશે.
સ્થાપક ચેરમેનએ વિગત આપતા જણાવ્યું હતું કે, આગામી સમયમાં સંઘનું દૂધ ઉત્પાદન ૧૦ લાખ લીટર સુધી વધારવાનું લક્ષ્યાંક છે. ઓછા પશુએ વધુ દૂધ ઉત્પાદન મેળવવા અને આર્થિક રીતે સમૃદ્ધ થવા માટે સર્વોત્તમ દાણનો વપરાશ કરવા પર ભાર મૂકવામાં આવ્યો હતો. વડાપ્રધાન નરેન્દ્રભાઈ મોદીના વિઝન અને કેન્દ્રીય ગૃહ તથા સહકારિતા મંત્રી અમિતભાઈ શાહના નેતૃત્વ હેઠળ સહકારી ક્ષેત્રે થયેલા ૧૫૦થી વધુ ઐતિહાસિક સુધારાઓ તેમજ નવી રાષ્ટ્રીય સહકારી નીતિ-૨૦૨૫ અને નવી સહકારી સંસ્થાઓની સ્થાપના અંગે વિગતવાર માહિતી આપવામાં આવી હતી.
કાર્યક્રમના પ્રારંભમાં સંઘના ડિરેક્ટર મૂળરાજસિંહ પરમારે સ્વાગત પ્રવચન કર્યું હતું. સમગ્ર સભાનું સફળ અને સુચારુ સંચાલન ચીફ જનરલ મેનેજર વાય.એચ.જોષી દ્વારા કરવામાં આવ્યું હતું, જ્યારે કાર્યક્રમના અંતે ડિરેક્ટર માવજીભાઈ ભાલીયાએ ઉપસ્થિત સૌનો આભાર વ્યક્ત કર્યો હતો.
