ભાવનગરના બુધેલમાં રૂ.૯.૪૦ કરોડનો એંબરગ્રીસનો જથ્થો ઝડપી લેતી SMC
આંતરરાષ્ટ્રીય રેકેટમાં સામેલ આઠ શખ્સો સામે ગુનો નોંધી જેલ ભેગા કરાયા
અગ્ર ગુજરાત, ભાવનગર
ભાવનગર જિલ્લામાંથી પ્રતિબંધિત વન્યજીવ સામગ્રીની તસ્કરીનું એક મસમોટું નેટવર્ક ઝડપાયું છે. સ્ટેટ મોનીટરીંગ સેલ (SMC) અને વન વિભાગ દ્વારા કરવામાં આવેલી બેક-ટુ-બેક કાર્યવાહીમાં બુધેલ ગામમાંથી કરોડો રૂપિયાની કિંમતનું ગેરકાયદેસર ‘એંબરગ્રીસ’ (સ્પર્મ વ્હેલ માછલીની ઉલ્ટી) ઝડપી પાડવામાં આવ્યું છે. તંત્રે કુલ રૂપિયા 9.40 કરોડનો પ્રતિબંધિત એમ્બરગ્રીસનો જથ્થો તથા અન્ય મુદ્દામાલ જપ્ત કરીને આ આંતરરાષ્ટ્રીય કાળાબજારના રેકેટમાં સામેલ આઠ શખ્સો સામે વન્યપ્રાણી સંરક્ષણ અધિનિયમ હેઠળ ગુનો નોંધી જેલભેગા કર્યા છે.
બનાવની વિગત મુજબ, ગુજરાત સ્ટેટ મોનીટરીંગ સેલના પોલીસ ઇન્સ્પેક્ટર આર.કે. કરમટા અને તેમની ટીમને મળેલી ચોક્કસ માહિતીના આધારે ગત તા. 10 જુલાઈના રોજ ભાવનગર નજીક વરતેજ પોલીસ મથકની હદમાં આવેલા બુધેલ ગામની બ્લ્યુ સ્કાય સોસાયટી પાસે રેઇડ કરી હતી. આ દરોડા દરમિયાન પોલીસે સ્થળ પરથી ઇમરાન રહીમભાઈ પરમાર, સાજીદખાન અયુબ ખાન પઠાણ, ફૈજાન તાલિબાભાઈ મધરા અને શબિરશા ફારૂખભાઈ સૈયદને ઝડપી લીધા હતા.
આ શખ્સો પાસેથી અલગ-અલગ સાઇઝના સફેદ-ક્રીમ અને ગોલ્ડન બ્રાઉન રંગના ઘન પદાર્થના ટુકડાઓ મળી આવ્યા હતા. ફોરેસ્ટ વિભાગ અને એફએસએલ (FSL) અધિકારીઓની હાજરીમાં તપાસ કરાવતા આ જથ્થો અતિ કિંમતી ‘એંબરગ્રીસ’ હોવાનું સ્પષ્ટ થયું હતું. પોલીસે સ્થળ પરથી 4 કિલો 306 ગ્રામ એંબરગ્રીસ કિંમત રૂપિયા 4,30,60,000 તેમજ અન્ય વાહનો-મોબાઈલ મળી કુલ રૂપિયા 4,31,60,100 નો મુદ્દામાલ જપ્ત કર્યો હતો.
એસએમસી (SMC) ની પૂછપરછમાં પકડાયેલા આરોપી ઇમરાન અને સાજીદખાને કબૂલાત કરી હતી કે, ભાવનગરના અભિષેક રાઠોડ અને ભરત નામના બે શખ્સોએ આ કરોડોની કિંમતનો માલ તેમને સાચવવા માટે આપ્યો હતો. આ જથ્થો બજારમાં વહેંચાઈ જશે ત્યારે મોટું કમિશન આપવાની લાલચ અપાતા ઇમરાને આ પ્રતિબંધિત જથ્થો પોતાની પાસે છુપાવી રાખ્યો હતો. આ ચારેય આરોપીઓ બુધેલ ગામ પાસેના ખાર વિસ્તારમાં ગ્રાહક શોધવાની પેરવીમાં હતા તે જ સમયે સ્ટેટ મોનીટરીંગ સેલની ટીમે તેમને રંગેહાથ ઝડપી પાડી આગળની કાયદેસરની કાર્યવાહી માટે વરતેજ પોલીસ મથકે સોંપ્યા હતા.
