કલીન અપ રાજકોટ ગ્રુપ દ્વારા પર્યાવરણીય જાગૃતિ રેલી યોજાઇ
વિશ્વ પર્યાવરણ દિવસની ભવ્ય ઉજવણી કરાઇ
અગ્ર ગુજરાત, રાજકોટ
વિશ્વ પર્યાવરણ દિવસ નિમિત્તે “ક્લીન અપ રાજકોટ” ગ્રુપ દ્વારા શહેરમાં પર્યાવરણ પ્રત્યે જાગૃતિ ફેલાવવા ભવ્ય રેલીનું આયોજન કરવામાં આવ્યું હતું. આ રેલીમાં આશરે 300 જેટલા શહેરવાસીઓએ ઉત્સાહભેર ભાગ લીધો અને પર્યાવરણને બચાવવાનો સંકલ્પ લીધો હતો.
આ રેલીની શરૂઆત સવારે સાત વાગ્યે બાલભવન, રેસકોર્સ ખાતે થઈ હતી, જ્યાં હાજર તમામ લોકોએ રાષ્ટ્રગીત સાથે કાર્યક્રમની શરૂઆત કરી હતી. સાથે જ તણસો જેટલા લોકોએ પ્લાસ્ટિકનો ઉપયોગ ન કરવાની પ્રતિજ્ઞા પણ લીધી હતી.
આ રેલી બાલભવન, રેસકોર્સ ખાતે શરૂ થઈ અને સમગ્ર રેસકોર્સ વિસ્તારમાં ફરી હતી. રેલી દરમિયાન “મારો કચરો મારી જવાબદારી”, “પર્યાવરણ બચાવો – જીવન બચાવો”, “વૃક્ષ વાવો – વરસાદ લાવો” જેવા જાગૃતિસભર નારાઓ સાથે શહેરવાસીઓને સંદેશ આપવામાં આવ્યો હતો.
આ રેલી ની વધુ માહિતી આપતા ક્લીનઅપ ગ્રુપ ના વોલંટિયર સંજયભાઈ કાકડીયા જણાવ્યું કે આ રેલીનો મુખ્ય હેતુ લોકોને પર્યાવરણ સાથે જોડવા તેમજ લોકો દ્વારા પર્યાવરણને થતું નુકસાન અટકાવવું તેમજ રાજકોટ શહેર પ્લાસ્ટિક ફ્રી બને એ હેતુ હતો. ક્લીન અપ રાજકોટ ગ્રુપનો મુખ્ય ઉદ્દેશ છે કે ભારત દેશમાં રાજકોટ શહેર સ્વચ્છતાની બાબતમાં પ્રથમ સ્થાન પર આવે, અને તે માટે ગ્રુપ સતત કાર્યરત છે. આવી પ્રવૃત્તિઓ શહેરમાં પર્યાવરણ પ્રત્યે જાગૃતિ વધારવામાં મહત્વપૂર્ણ સાબિત થાય છે અને ભવિષ્યમાં પણ આવા કાર્યક્રમો વધુ મોટા સ્તરે યોજવામાં આવશે તેવો વિશ્વાસ વ્યક્ત કરવામાં આવ્યો હતો.
