ડિફેન્સ-એરોસ્પેસ પોલીસી પૂર્ણ થતા રાજકોટના ૨૫૦ ઉદ્યોગો મુશ્કેલીમાં
નવી પોલીસી જાહેર ન થવાના કારણે નવા ઓર્ડર મેળવવા અને પ્રોજેકટ શરૂ કરવા માટે પડકારોનો સામનો કરતા ઉદ્યોગપતિઓ : પોલીસીની પુન: રચના કરવા રાજકોટ ચેમ્બરની માંગ
અગ્ર ગુજરાત, રાજકોટ
ગુજરાત રાજયની ડિફેન્સ અને એરોસ્પેસ પોલીસી ૩૧ ડિસેમ્બર ૨૦૨૫ ના રોજ પુર્ણ થઈ ગયેલ છે. ત્યારથી આજ દિન સુધી આ પોલીસીની પુનઃ રચના અથવા નવી પોલીસી અંગે કોઈપણ નિર્ણય થયેલ નથી. જેના કારણે ઉદ્યોગકારોને પારાવાર મુશ્કેલીઓ પડી રહી છે. તેમજ આ ઝડપી વિકાસ પામી રહેલા ડિફેન્સ અને એરોસ્પેસ ઉદ્યોગો માટે આ એક ચિન્તાનો વિષય બની ગયેલ છે. રાજકોટ તથા તેની આસપાસ આશરે ૨૫૦ થી પણ વધારે ડિફેન્સ અને એરોસ્પેસના ઉદ્યોગો કાર્યરત છે. જે DRDO, HAL, BEL, BHEL, ISRO ઓર્ડનન્સ ફેકટરીઓ, હેવી વ્હીકલ ફેકટરી, રાઈફલ ફેકટરી અને ભારતીય સશસ્ત્ર દળોને પણ સપ્લાય કરે છે. નવી પોલીસી જાહેર ન થવાના કારણે તેમને નવા ઓર્ડર મેળવવા અને નવા પ્રોજેકટ શરૂ કરવા માટે અનેક પડકારોનો સામનો કરવો પડી રહયો છે. પરિણામે આવા ઉદ્યોગો ના છુટકે બીજા રાજયોમાં પ્રસ્થાપીત થવા લાગ્યા છે. જે ગુજરાત રાજય માટે ખુબ જ નુકશાન કારક છે.
વધુમાં આ પોલીસીની પુનઃ રચના અથવા નવી પોલીસી જાહેર ન થવાથી વડાપ્રધાન નરેન્દ્રભાઈ મોદીજી ના “આત્મનિર્ભર ભારત” તથા “વિકસીત ભારત@2047” ના વિઝનને વિપરીત અરસ કરી રહયું છે. જે ડિફેન્સ અને એરોસ્પેસના સાધનોની આયાત ઘટાડવા અને સ્થાનિક ઉત્પાદન ક્ષમતામાં વધારો કરવા ઉપર ભાર મુકે છે. આમ રાજકોટ ચેમ્બર ઓફ કોમર્સ એન્ડ ઈન્ડસ્ટ્રીના પ્રમુખ વી.પી. વૈષ્ણવ દ્વારા રાજયના માનનીય મુખ્યમંત્રી ભુપેન્દ્રભાઈ પટેલ તથા નાયબ મુખ્યમંત્રી હર્ષભાઈ સંઘવીજી સમક્ષ ડિફેન્સ અને એરોસ્પેસ પોલીસીની પુનઃરચના કરી તાત્કાલીક નવી પોલીસી અમલમાં મુકવા અંગે રજુઆત કરવામાં આવેલ છે.
વધુમાં રાજકોટ ચેમ્બર ઓફ કોમર્સ એન્ડ ઈન્ડસ્ટ્રી દ્વારા છેલ્લા ૪ થી પ વર્ષોથી રજુઆત કરવામાં આવી રહી છે કે, રાજકોટ એ ડિફેન્સ અને એરોસ્પેસના ઘણા બધા પાર્ટસનું ઉત્પાદન કરી રહયું છે અને હબ ગણાય છે. ત્યારે સૌરાષ્ટ્ર રીજીઓનનો ડિફેન્સ એન્ડ એરોસ્પેસ પોલીસીમાં સમાવેશ કરી જંત્રીના ૨૫% દરે જમીન ફાળવવી. જેથી કરીને આવા ઉદ્યોગોને વેગ મળે. તેમજ ભારત સરકારની ડિફેન્સ અને એરોસ્પેસના સાધનો એકસપોર્ટ કરવાની જે નેમ છે એ નેમને સાર્થક કરવામાં રાજકોટ-સૌરાષ્ટ્ર સહભાગી બની રહેશે.
સાથો સાથ રાજકોટમાં આશરે એક હજારથી પણ વધુ ફોજીંગ અને કાસ્ટીંગના યુનીટો આવેલા હોય કે જેઓ ડિફેન્સ અને એરોસ્પેસના પાર્ટસમાં પ્રત્યેક્ષ કે પરોક્ષ રીતે જોડાયેલા છે. ત્યારે સરકારી સુવિધા માટે રાજકોટ ખાતે ડિફેન્સ અને એરોસ્પેસ માટેનું કલ્સ્ટર ડેવલોપ કરવું ખુબ જ જરૂરી છે. જેથી કરીને આવા ઉદ્યોગને વધુ વેગ મળે. આમ આ માંગણી ખાસ ધ્યાને લઈને રાજકોટ સૌરાષ્ટ્રને આ પોલીસીમાં સમાવી તાત્કાલીક પોલીસીની પુનઃ રચના કરી ઘટતું કરવું. જેથી સૌરાષ્ટ્ર ડિફેન્સ અને એરોસ્પેસના હબ તરીકે વિકસીત થઈ શકશે. તેમાં કોઈ શંકા ને સ્થાન નથી. તેમ રાજકોટ ચેમ્બરની અખબારી યાદીમાં જણાવેલ છે.
