ધોલેરાના નિર્માણધિન ગ્રીનફિલ્ડ એરપોર્ટ પર VT CNS એરક્રાફટનું સફળ ટેસ્ટિંગ
બે ફાયર ટેન્ડરો દ્વારા પાણીની કમાન સર્જી વિમાનનું સ્વાગત : વિકાસ, રોકાણ, વેપારને વેગ મળશે
અગ્ર ગુજરાત, ધોલેરા
ધોલેરા સ્પેશિયલ ઇન્વેસ્ટમેન્ટ રિજન (SIR) વિસ્તારમાં પીપળી નજીક નિર્માણાધીન ગ્રીનફિલ્ડ એરપોર્ટ પર પ્રથમ વિમાનનું સફળ લેન્ડિંગ થયું છે. એરપોર્ટ ઓથોરિટી ઓફ ઇન્ડિયા દ્વારા VT CNS એરક્રાફ્ટનું ટેસ્ટિંગ સફળ રહ્યું હતું. આ ઘટનાને ધોલેરાના ઇન્ફ્રાસ્ટ્રક્ચર વિકાસમાં એક મહત્વપૂર્ણ સીમાચિહ્ન માનવામાં આવે છે.
વિમાનના સુરક્ષિત લેન્ડિંગ બાદ એરપોર્ટ ઓથોરિટી દ્વારા પરંપરાગત વોટર કેનન સલામી આપવામાં આવી હતી. બે ફાયર ટેન્ડરોએ પાણીની કમાન સર્જીને વિમાનનું સ્વાગત કર્યું હતું. આ પ્રારંભિક ઓપરેશન હવાઈ ઉડ્ડયન ક્ષેત્રમાં નવા એરપોર્ટના શુભારંભનું પ્રતિક છે.
ધોલેરા એરપોર્ટ ભવિષ્યમાં ગુજરાતના મહત્વપૂર્ણ હવાઈ કેન્દ્રોમાં સ્થાન મેળવશે તેવી અપેક્ષા છે. આ એરપોર્ટ ધોલેરા SIRમાં ઔદ્યોગિક વિકાસ, રોકાણ, વેપાર, પ્રવાસન અને રોજગારીની નવી તકોને વેગ આપશે. તેના કાર્યરત થવાથી અમદાવાદ સહિત રાજ્યના અન્ય વિસ્તારો પરનો હવાઈ ટ્રાફિકનો ભાર ઘટશે અને આંતરરાષ્ટ્રીય કનેક્ટિવિટી મજબૂત બનશે.
સફળ ટેસ્ટિંગ બાદ હવે એરપોર્ટના આગામી તબક્કાની કામગીરીને વેગ મળશે. નિષ્ણાતોના મતે, ધોલેરા એરપોર્ટ કાર્યરત થવાથી ભાલ પંથક અને આસપાસના વિસ્તારોના આર્થિક વિકાસને નવી દિશા મળશે. આનાથી ધોલેરા વૈશ્વિક રોકાણકારો માટે વધુ આકર્ષક સ્થળ બનશે.
પ્રથમ વિમાનના સફળ લેન્ડિંગને સ્થાનિકો અને ઉદ્યોગજગતના પ્રતિનિધિઓએ ધોલેરાના વિકાસના સપનાને વધુ એક પાંખ મળવા સમાન ગણાવ્યું હતું.
જાણો, શું હશે ધોલેરા એરપોર્ટમાં? ધોલેરા ઇન્ટરનેશનલ કાર્ગો એરપોર્ટમાં 3.2 કિ.મી.નો રન-વે બનાવવામાં આવી રહ્યો છે . 12 એરક્રાફ્ટ માટેનું પાર્કિંગ સ્ટેન્ડ, 10,700 સ્કે.ફૂટનું એર કાર્ગો ટર્મિનલ બનાવવામાં આવી રહ્યું છે, જેમાં આંતરરાષ્ટ્રીય કાર્ગો બિલ્ટઅપ એરિયા 2,450 ચોરસ મીટર (માત્ર ગ્રાઉન્ડ ફ્લોર), પેવ્ડ એરિયા 8,800 ચોરસ મીટર અને કાર્ગો હેન્ડલિંગ માટે 4260 ચોરસ મીટર એરસાઇડ રેમ્પ એરિયાનો સમાવેશ કરવામાં આવ્યો છે. આયાત અને નિકાસ માટે અલગ અલગ વિભાગ રાખવામાં આવ્યા છે.
