જેતપુરમાં એજ્યુકેશન લોનના નામે લાખોની ઠગાઈ: કીર્ગીસ્તાનમાં ભણતા વિદ્યાર્થીના પિતા સાથે ₹૧૦ લાખનો વિશ્વાસઘાત

જેતપુરમાં એજ્યુકેશન લોનના નામે લાખોની ઠગાઈ: કીર્ગીસ્તાનમાં ભણતા વિદ્યાર્થીના પિતા સાથે ₹૧૦ લાખનો વિશ્વાસઘાત

‘એપેક્સ ફ્લાય કન્સલ્ટન્સી’ના લોન એજન્ટ જયદીપ રામાણી સામે જેતપુર પોલીસ સ્ટેશનમાં ગુનો દાખલ

અગ્ર ગુજરાત, જેતપુર

રાજકોટ ગ્રામ્ય જિલ્લાના જેતપુર શહેરથી એક મોટા સમાચાર સામે આવી રહ્યા છે, જ્યાં એજ્યુકેશન લોન અપાવવાના બહાને એક વેપારી સાથે રૂપિયા ૧૦ લાખની છેતરપિંડી અને વિશ્વાસઘાત આચરવામાં આવ્યા હોવાની ગંભીર ઘટના બની છે. આ મા અંગે જેતપુર સિટી પોલીસ સ્ટેશનમાં સત્તાવાર રીતે એફ.આઈ.આર. (FIR) નોંધવામાં આવી છે.

પોલીસ ચોપડે નોંધાયેલી વિગતો મુજબ, જેતપુરના અમરનગર રોડ રાજેશ્વરી સોસાયટી વિસ્તારમાં રહેતા અને ધોરાજી રોડ પર હનુમાન ધારા નામનું સિલિકેટનું કારખાનું ચલાવીને પોતાના પરિવારનું ગુજરાન ચલાવતા દિનેશભાઈ સાર્દુલભાઈ જાદવ (ઉંમર વર્ષ ૫૪) દ્વારા આ ફરિયાદ નોંધાવવામાં આવી છે. ફરિયાદી દિનેશભાઈના સંતાનમાં બે દીકરાઓ છે, જેમાંથી મોટો દીકરો સની (ઉંમર ૨૬) અને નાનો દીકરો પિયુષ (ઉંમર ૨૦) બંને કીર્ગીસ્તાન ખાતે એમ.બી.બી.એસ. (MBBS) નો અભ્યાસ કરી રહ્યા છે. બાળકોના વિદેશ અભ્યાસ માટે એજ્યુકેશન લોનની જરૂર હોવાથી દિનેશભાઈ લોનની તપાસ કરી રહ્યા હતા.

આ દરમિયાન આશરે બે મહિના અગાઉ જેતપુરના વિશાલભાઈ કાપડિયા નામના વ્યક્તિએ તેમને એજ્યુકેશન લોન માટે એક એજન્ટનો સંપર્ક કરાવ્યો હતો. થોડા દિવસો પછી ‘એપેકસ ફ્લાય કન્સલ્ટન્સી પ્રાઈવેટ લિમિટેડ’ રાજકોટના લોન એજન્ટ તરીકે પોતાની ઓળખ આપનાર જયદીપભાઈ મહેશભાઈ રામાણી (રહે. ધર્મનંદન બંગ્લો, કામરેજ, સુરત) નો ફોન આવ્યો હતો. ગત ૨૯ મે ૨૦૨૬ ના રોજ આ આરોપી જયદીપભાઈ રામાણી દિનેશભાઈના ઘરે આવ્યા હતા અને રૂપિયા ૫૦ લાખની એજ્યુકેશન લોન કરાવી આપવાની વાત કરી હતી. લોન માટે જેના નામે લોન લેવાની હોય તેના નામે ૧૦ લાખ રૂપિયાની એફ.ડી. (Fixed Deposit) કરાવવી પડશે તેમ કહી વિશ્વાસમાં લીધા હતા.

આરોપીએ લોનની પ્રોસેસના બહાને દિનેશભાઈના કારખાનાની પેઢીના એચ.ડી.એફ.સી. બેંકના રૂપિયા ૧૦ લાખની રકમ અને સહીવાળા ચેક ઉપરાંત દીકરા પિયુષની કેનેરા બેંકની ચેક બુકમાંથી પાંચ કોરા ચેક, ૪ થી ૫ કોરા કાગળો તથા અન્ય ફોર્મ્સમાં સહીઓ કરાવી લીધી હતી. ત્યારબાદ તા ૧૧ જૂન ૨૦૨૬ ના રોજ બેંક સ્ટેટમેન્ટ આપવા માટે દિનેશભાઈ અને તેમના દીકરા પિયુષ રાજકોટ સ્થિત એજન્ટની ઓફિસે પણ ગયા હતા.

તે જ દિવસે બપોરે જયદીપ રામાણીએ ફોન કરીને પેઢીનો સ્ટેમ્પ મંગાવ્યો હતો અને જેતપુરની એચ.ડી.એફ.સી. બેંકમાંથી આર.ટી.જી.એસ. કરાવવાની કાર્યવાહી કરી હતી. થોડીવારમાં જ દિનેશભાઈના એચ.ડી.એફ.સી. બેંક ખાતામાંથી રૂપિયા ૧૦,૦૦,૦૦૦/- સીધા આરોપી જયદીપ રામાણીના આઈ.સી.આઈ.સી.આઈ. બેંક ખાતામાં જમા થઈ ગયા હોવાનો મેસેજ આવ્યો હતો. જ્યારે દિનેશભાઈએ આ અંગે પૂછપરછ કરી ત્યારે આરોપીએ બે-ત્રણ દિવસમાં રકમ દીકરાના ખાતામાં જમા થઈ જશે તેમ કહીને વિશ્વાસમાં લીધા હતા

તા. ૧૬/૦૭/૨૦૨૬ના રોજ શ્યામ એન્ટરપ્રાઈઝના શૈલેષભાઈ નામના શખ્સે પુત્ર પીયૂષને ફોન કરીને પૂછ્યું કે તમે જયદીપ રામાણીને કોઈ નાણાં આપ્યા છે કે કેમ? ત્યારે સમગ્ર ભાંડો ફૂટ્યો હતો. શૈલેષભાઈએ જણાવ્યું હતું કે જયદીપ રામાણી અમારો માણસ છે, જે ફ્રોડ કરીને ભાગી ગયો છે. બેંકે જઈને તપાસ કરતા ખબર પડી કે કેનેરા બેંક ખાતામાં શ્યામ એન્ટરપ્રાઈઝ દ્વારા રૂ. ૧૦ લાખની એફ.ડી. બનાવીને તેના આધારે રૂ. ૯,૦૦,૦૦૦/- ની ઓવરડ્રાફ્ટ (OD) લોન લઈને તે પણ ક્લોઝ કરી દેવામાં આવી છે.

આ બનાવ અંગે જેતપુર સિટી પોલીસ સ્ટેશનમાં ફરિયાદ નોંધાવવામાં આવતાં પોલીસે લોન એજન્ટ જયદીપભાઈ મહેશભાઈ રામાણી વિરુદ્ધ ભારતીય ન્યાય સંહિતા (BNS) ૨૦૨૩ ની કલમ ૩૧૬(૫) હેઠળ ગુનો દાખલ કરવામાં આવ્યો છે. અને આગળની કાયદેસરની કાર્યવાહી હાથ ધરી છે.