વેરાવળના આદ્રીમાં ચૂંટણી સભામાં પ્રદેશ ભાજપ પ્રમુખએ કોંગી ધારાસભ્ય પર કર્યા આકરા પ્રહાર
“સોમનાથના કોંગ્રેસના ધારાસભ્ય વિધાનસભામાં માત્ર ચૂપ બેસે છે, વિકાસ માટે કોઈ રજૂઆત કરતા નથી” : પ્રદેશ પ્રમુખ જગદીશ વિશ્વકર્મા
“વિધાનસભા લાઈવ થાય તો ખબર પડે હું કેટલા સવાલો પૂછું છું” : ધારાસભ્ય વિમલ ચુડાસમા
અગ્ર ગુજરાત, ગીર સોમનાથ
સ્થાનિક સ્વરાજ્યની ચૂંટણી પહેલા ગીર સોમનાથ જીલ્લામાં પ્રચારનો દોર આગળ ધપી રહ્યો છે તેમ રાજકીય માહોલમાં પણ ગરમાવો વધતો જોવા મળી રહ્યો છે. ત્યારે વેરાવળના આદ્રી વાવડી ગામે ભાજપ દ્વારા વિકાસ સંકલ્પ સભાનું આયોજન કરવામાં આવ્યું હતુ. જેમાં ખાસ ઉપસ્થિત રહેલ ભાજપ પ્રદેશ પ્રમુખ જગદીશ વિશ્વકર્માએ કોંગ્રેસ અને કોંગી ધારાસભ્ય વિમલ ચુડાસમા પર આક્રમક પ્રહાર કર્યા હતા. જગદીશ વિશ્વકર્માએ સભાને સંબોધતા સોમનાથના કોંગ્રેસી ધારાસભ્ય વિમલ ચુડાસમા ઉપર નિશાન સાધતા કહેલ કે, તમારા ધારાસભ્ય વિધાનસભામાં માત્ર હાજરી આપી ચુપ બેસે છે. સત્ર દરમ્યાન ચુપચાપ બેન્ચમાં બેસીને સોમનાથ વિસ્તારના પ્રશ્નો કે વિકાસ માટે ક્યારેય સશક્ત અવાજ ઉઠાવતા નથી. જો તમારા ધારાસભ્ય તમારા દરવાજે આવે તો તેમને જરૂર પૂછજો કે વિધાનસભામાં સોમનાથ માટે કેટલા પ્રશ્નો પૂછ્યા અને વિસ્તાર માટે કેટલી રજૂઆત કરી. આ સાથે તેમણે દાવો કર્યો કે, સોમનાથ જિલ્લામાં થતા રોડ-રસ્તા, ઈન્ફ્રાસ્ટ્રક્ચર અને વિકાસના મોટાભાગના કામ ભાજપના સાંસદ અને જિલ્લા નેતૃત્વની સતત રજૂઆત અને પ્રયત્નોથી શક્ય બન્યા છે. સભામાં હાજર કાર્યકર્તાઓ અને સ્થાનિક લોકોમાં ભાજપના પક્ષમાં ભારે ઉત્સાહ જોવા મળ્યો હતો અને ચૂંટણી પહેલા આ પ્રકારની સભાઓ દ્વારા ભાજપ પોતાનો પ્રચાર વધુ મજબૂત બનાવવાનો પ્રયાસ કરી રહ્યું છે.
જો કે આ તમામ આક્ષેપોને લઈને સોમનાથના ધારાસભ્ય વિમલ ચુડાસમાએ પત્રકારોને પ્રતિક્રિયા આપતા કહેલ કે, ભાજપ સરકાર વિધાનસભાની કાર્યવાહી લાઈવ કરાવે તો જનતાને ખબર પડે કે હું કેટલા સવાલો પૂછું છું…મારા સવાલોના જવાબ ભાજપના મંત્રીઓ પણ આપી શકતા નથી. ભાજપના ધારાસભ્યોને તો દિલ્હી અથવા કમલમમાંથી ચિઠ્ઠી આવે એટલું જ બોલી શકે છે. સોમનાથમાં જિલ્લા પંચાયતની બેઠક માટે પ્રદેશ અધ્યક્ષને આવવું પડે એ જ મારી તાકાત છે.
આ રીતે ભાજપ અને કોંગ્રેસ વચ્ચે આક્ષેપ-પ્રતિઆક્ષેપનો દોર વધુ તીખો બન્યો છે, અને ચૂંટણી પહેલા જિલ્લામાં રાજકીય માહોલ ગરમાયો છે.
