ગુજરાતમાં EV ક્રાંતિની તૈયારી
ઈલેક્ટ્રિક વાહનો પર RTO ટેક્સ થઈ શકે છે શૂન્ય
નવી EV પોલિસીથી ખરીદદારોને મળશે વધુ સબસિડી, ચાર્જિંગ સ્ટેશનનું જાળું વિસ્તરશે અને રાજ્ય બનશે EV મેન્યુફેક્ચરિંગ હબ
અગ્ર ગુજરાત, ગાંધીનગર
પેટ્રોલ-ડીઝલના વધતા ખર્ચ, વૈશ્વિક સ્તરે ઊભી થતી ઈંધણ સંકટની સ્થિતિ અને પર્યાવરણને અનુકૂળ પરિવહનને પ્રોત્સાહન આપવા માટે ગુજરાત સરકાર નવી અને વ્યાપક ઈલેક્ટ્રિક વ્હીકલ (EV) પોલિસી લાવવાની તૈયારીમાં છે. રાજ્ય સરકાર દ્વારા તૈયાર કરવામાં આવી રહેલી આ નવી નીતિનો મુખ્ય હેતુ ઈલેક્ટ્રિક વાહનોના ઉપયોગમાં વધારો કરવો, ચાર્જિંગ ઈન્ફ્રાસ્ટ્રક્ચરને મજબૂત બનાવવું અને ગુજરાતને EV ઉત્પાદનનું અગત્યનું કેન્દ્ર બનાવવાનો છે.
સરકારના પ્રાથમિક વિચાર મુજબ નવી નીતિ હેઠળ ટૂ-વ્હીલર, થ્રી-વ્હીલર, કાર, બસ તેમજ ભારે કોમર્શિયલ વાહનો સહિત તમામ પ્રકારના ઈલેક્ટ્રિક વાહનોને આવરી લેવામાં આવશે. ખાસ કરીને સામાન્ય ગ્રાહકોને ઈલેક્ટ્રિક વાહનો ખરીદવા પ્રોત્સાહન મળે તે માટે આકર્ષક લાભો અને રાહતો જાહેર કરવામાં આવશે. હાલમાં પેટ્રોલ અને ડીઝલ વાહનો પર આશરે 6 ટકા RTO ટેક્સ વસૂલવામાં આવે છે, જ્યારે ઈલેક્ટ્રિક વાહનો પર માત્ર 1 ટકા ટેક્સ લાગુ છે. નવી નીતિમાં આ 1 ટકા RTO ટેક્સને પણ સંપૂર્ણપણે નાબૂદ કરીને શૂન્ય કરવાની દરખાસ્ત પર ગંભીરતાથી વિચારણા થઈ રહી છે. જો આ નિર્ણય અમલમાં આવશે તો EV ખરીદદારોને સીધો આર્થિક લાભ મળશે અને વાહનોની કિંમતમાં નોંધપાત્ર ઘટાડો જોવા મળી શકે છે.
સરકાર EV સબસિડીમાં પણ મોટો વધારો કરવાની તૈયારીમાં છે. હાલમાં અમુક કેટેગરીના વાહનોને જ મળતી સહાયને વિસ્તૃત કરીને તમામ પ્રકારના ઈલેક્ટ્રિક વાહનો માટે લાગુ કરવાની યોજના છે. સાથે જ સબસિડીની રકમને બમણી કરવાની પણ ચર્ચા ચાલી રહી છે. આ પગલાંથી રાજ્યમાં EV અપનાવવાનો દર વધુ ઝડપથી વધી શકે છે. ચાર્જિંગ ઈન્ફ્રાસ્ટ્રક્ચરનો અભાવ EV ક્ષેત્રની સૌથી મોટી સમસ્યા માનવામાં આવે છે. તેને દૂર કરવા માટે સરકાર પબ્લિક-પ્રાઇવેટ પાર્ટનરશિપ (PPP) મોડલ અપનાવશે. ખાનગી ઓપરેટરોને ચાર્જિંગ સ્ટેશન સ્થાપવા માટે વીજળી સબસિડી અને અન્ય પ્રોત્સાહનો આપવામાં આવશે. ઉપરાંત, નવા બિલ્ડિંગ નિયમોમાં ફેરફાર કરીને તમામ નવી રહેણાંક અને કોમર્શિયલ ઇમારતોમાં EV ચાર્જિંગની સુવિધા ફરજિયાત બનાવવાની યોજના પણ વિચારાધીન છે.
સરકાર પોતાના વાહન કાફલામાં પણ મોટા ફેરફાર કરશે. સરકારી વિભાગો, કોર્પોરેશનો અને જાહેર પરિવહન સેવાઓમાં તબક્કાવાર રીતે ઈલેક્ટ્રિક વાહનોનો સમાવેશ કરવામાં આવશે. આ નિર્ણયથી માત્ર પ્રદૂષણમાં ઘટાડો જ નહીં, પરંતુ ઈંધણ ખર્ચમાં પણ બચત થશે.
ઉદ્યોગ ક્ષેત્રને ધ્યાનમાં રાખીને રાજ્યમાં EV અને બેટરી ઉત્પાદનને પ્રોત્સાહન આપવા વિશેષ પેકેજ જાહેર થઈ શકે છે. રોકાણકારોને જમીન, વીજળી અને કર સંબંધિત રાહતો આપી ગુજરાતને EV મેન્યુફેક્ચરિંગ હબ તરીકે વિકસાવવાનો રોડમેપ તૈયાર થઈ રહ્યો છે. રાજ્ય સરકાર ભવિષ્યમાં પેટ્રોલ અને ડીઝલ વાહનોના વેચાણ પર મર્યાદાઓ મૂકવા જેવા પગલાં પર પણ વિચાર કરી રહી છે. વર્ષ 2028 બાદ ગ્રીન મોબિલિટીને વધુ વેગ આપવા માટે કડક નિર્ણયો લેવામાં આવી શકે છે.
EV ખરીદદારોને શું મળશે?
ઈલેક્ટ્રિક વાહનો પર RTO ટેક્સ શૂન્ય કરવાની વિચારણા
સબસિડીમાં બમણો વધારો શક્ય
તમામ કેટેગરીના EVને લાભ
વાહન ખરીદીનો કુલ ખર્ચ ઘટશે
ચાર્જિંગ સ્ટેશનનું જાળું વિસ્તરશે
PPP મોડલ હેઠળ નવા ચાર્જિંગ સ્ટેશન
ઓપરેટરોને વીજળી સબસિડી
શહેર અને હાઈવે પર ઝડપી સુવિધા
ચાર્જિંગ અંગેની ચિંતા ઘટશે
નવી ઇમારતો માટે ફરજિયાત નિયમ
તમામ નવી બિલ્ડિંગમાં EV ચાર્જિંગ પોઇન્ટ
રહેણાંક અને કોમર્શિયલ પ્રોજેક્ટમાં અમલ
ભવિષ્યની જરૂરિયાતોને ધ્યાનમાં રાખતો નિર્ણય
ગ્રીન ઇન્ફ્રાસ્ટ્રક્ચરને પ્રોત્સાહન
સરકારી વાહનો પણ બનશે ઈલેક્ટ્રિક
સરકારી વિભાગોમાં EVનો ઉપયોગ વધશે
જાહેર પરિવહનમાં ઇલેક્ટ્રિક બસોને પ્રાધાન્ય
ઈંધણ ખર્ચમાં ઘટાડો
કાર્બન ઉત્સર્જન ઓછું થશે
ગુજરાત બનશે EV મેન્યુફેક્ચરિંગ હબ
EV અને બેટરી ઉદ્યોગોને વિશેષ પ્રોત્સાહન
નવા રોકાણો અને રોજગારીની તકો
ઉત્પાદન ક્ષમતામાં વધારો
ગ્રીન ઇન્ડસ્ટ્રીયલ વિકાસને વેગ મળશે
