આર્થિક સંકટે લીધો માતા-પુત્રનો ભોગ ; ન્યારાની ખાણમાં ઝંપલાવી જીવન ટૂંકાવ્યું
એસિડ પીધા બાદ ખાણમાં પડતાં બંનેનાં સારવાર દરમિયાન મોત, જામનગર રોડના મારૂતિનગરમાં રહેતા પરિવારમાં શોક
અગ્ર ગુજરાત, રાજકોટ
રાજકોટ શહેરમાં માનવતાને ઝંઝોળી નાખે તેવી કરુણ ઘટના સામે આવી છે. આર્થિક ભીંસ અને દેવાના બોજથી કંટાળેલા માતા અને પુત્રએ જીવનથી નિરાશ થઈ એક સાથે આત્મઘાતી પગલું ભરતાં સમગ્ર સતવારા પરિવારમાં શોકનું મોજું ફરી વળ્યું છે. જામનગર રોડ પર રહેતા બંને ઘરેથી નીકળ્યા બાદ પડધરી તાલુકાના ન્યારા ગામના પાટીયા પાસે પહોંચ્યા હતા, જ્યાં તેમણે પહેલા એસિડ પીધું અને ત્યારબાદ નજીકની ખાણમાં ઝંપલાવી દીધું હતું. ગંભીર હાલતમાં બંનેને બહાર કાઢી રાજકોટ સિવિલ હોસ્પિટલમાં ખસેડવામાં આવ્યા હતા, પરંતુ સારવાર દરમિયાન માતા અને પુત્ર બંનેએ અંતિમ શ્વાસ લીધા હતા.
પોલીસમાંથી પ્રાપ્ત વિગતો મુજબ જામનગર રોડ પર બી.એ. ડાંગર કોલેજ પાછળ આવેલા મારૂતિનગર-2 વિસ્તારમાં રહેતા 50 વર્ષીય જયાબેન મનસુખભાઈ નકુમ અને તેમનો 28 વર્ષીય પુત્ર નિલેષભાઈ મનસુખભાઈ નકુમ ગત રોજ ઘરેથી નીકળ્યા બાદ સાંજના સમયે ન્યારા ગામના પાટીયા નજીક પહોંચ્યા હતા. પ્રાથમિક માહિતી અનુસાર બંનેએ સાથે મળીને એસિડ પી લીધું હતું અને ત્યારબાદ નજીક આવેલી ખાણમાં કૂદી પડ્યા હતા.
ઘટનાની જાણ થતાં સ્થાનિક લોકો દોડી આવ્યા હતા અને તરત જ પોલીસ તેમજ ફાયર બ્રિગેડને જાણ કરવામાં આવી હતી. પડધરી પોલીસ અને બચાવ ટીમે સ્થાનિકોની મદદથી બંનેને ખાણમાંથી બહાર કાઢી તાત્કાલિક રાજકોટ સિવિલ હોસ્પિટલમાં સારવાર માટે ખસેડ્યા હતા. જોકે બંનેની સ્થિતિ અત્યંત ગંભીર હોવાથી ડોક્ટરોએ તમામ પ્રયાસો કર્યા છતાં પહેલા જયાબેન અને થોડા સમય બાદ તેમના પુત્ર નિલેષભાઈનું સારવાર દરમિયાન મોત થયું હતું. હોસ્પિટલ ચોકીના સ્ટાફે બનાવ અંગે પડધરી પોલીસને જાણ કરતાં કાયદેસરની કાર્યવાહી હાથ ધરવામાં આવી હતી. બંનેના મૃતદેહનું પોસ્ટમોર્ટમ કરાવી પરિવારજનોને સોંપવામાં આવ્યું હતું. માતા અને પુત્રની એકસાથે અંતિમયાત્રા નીકળતાં સમગ્ર વિસ્તારમાં ગમગીની છવાઈ ગઈ હતી અને અંતિમ દર્શન માટે મોટી સંખ્યામાં લોકો ઉમટી પડ્યા હતા.
પોલીસની પ્રાથમિક તપાસમાં સામે આવ્યું છે કે પરિવાર છેલ્લા કેટલાક સમયથી આર્થિક મુશ્કેલીઓનો સામનો કરી રહ્યો હતો. નિલેષભાઈ પ્લમ્બિંગનું કામ કરીને પરિવારનું ગુજરાન ચલાવતા હતા, પરંતુ આવક ઓછી અને ખર્ચ વધુ હોવાના કારણે તેમણે સગા-સંબંધીઓ પાસેથી ઉછીના નાણા લીધા હોવાનું જાણવા મળ્યું છે. આ રકમ સમયસર પરત ન કરી શકતાં તેઓ સતત માનસિક તણાવમાં રહેતા હતા. આ જ સંજોગોમાં માતા અને પુત્રએ જીવનનો અંત લાવવાનો નિર્ણય લીધો હોવાનું પોલીસ માની રહી છે.
જયાબેનને બે પુત્રો હોવાનું જાણવા મળ્યું છે, જેમાં નિલેષભાઈ સૌથી નાના અને અપરિણીત હતા. પરિવારના અન્ય સભ્યો માટે આ ઘટના અસહ્ય આઘાત સમાન બની છે. એક જ દિવસે માતા અને પુત્રને ગુમાવવાના દુઃખથી પરિવારજનો ભાંગી પડ્યા છે.
પડધરી પોલીસે સમગ્ર ઘટનાની વિવિધ પાસાઓથી તપાસ શરૂ કરી છે. આત્મહત્યાનું ચોક્કસ કારણ, આર્થિક વ્યવહારો અને અન્ય સંજોગોની માહિતી એકત્રિત કરવામાં આવી રહી છે. પોલીસનું કહેવું છે કે તપાસ પૂર્ણ થયા બાદ જ સમગ્ર ઘટનાનું સાચું કારણ સ્પષ્ટ થઈ શકશે. આ દુઃખદ ઘટનાએ ફરી એકવાર આર્થિક સંકટ અને માનસિક તણાવ જેવી સમસ્યાઓની ગંભીરતા સામે લાવી છે. સતત વધતા આર્થિક દબાણ વચ્ચે કેટલાક લોકો નિરાશાના એવા તબક્કે પહોંચી જાય છે જ્યાં તેઓ જીવવાનું જ છોડી દેવાનો નિર્ણય લઈ બેસે છે. માતા અને પુત્રના એકસાથે થયેલા મોતથી માત્ર પરિવાર જ નહીં પરંતુ સમગ્ર વિસ્તાર શોકમાં ગરકાવ થઈ ગયો છે.
