યુદ્ધ વચ્ચે ગાઝાની કમલ અડવાન હોસ્પિટલના ડાયરેક્ટરનો દાવો છે કે ઈઝરાયેલની સેનાએ આ હોસ્પિટલનો કબજો લઈ લીધો છે. આટલું જ નહીં, IDF સૈનિકોએ હોસ્પિટલના ઘણા કર્મચારીઓની અટકાયત કરી છે અને હોસ્પિટલને ખાલી કરાવી છે.
ગાઝામાં કમલ અડવાન હોસ્પિટલ પર ઈઝરાયેલી સેનાએ કબજો જમાવ્યો હોવાના સમાચાર છે. હોસ્પિટલના ડાયરેક્ટરનો દાવો છે કે ઇઝરાયલી સૈનિકોએ બળજબરીથી હોસ્પિટલ ખાલી કરાવી છે. આ હોસ્પિટલ ઉત્તરી ગાઝા પટ્ટીમાં છેલ્લી બાકી રહેલી તબીબી સુવિધાઓમાંની એક હોવાનું કહેવાય છે. કમલ અડવાન હોસ્પિટલના ડિરેક્ટરે જણાવ્યું હતું કે, શુક્રવારે ઇઝરાયલી સૈનિકોએ કેટલાક તબીબી કર્મચારીઓને હોસ્પિટલ ખાલી કરવાનો આદેશ આપ્યો હતો અને કેટલાકની અટકાયત કરી હતી. બાદમાં હોસ્પિટલની સુવિધાઓના ઘણા ભાગોમાં આગ લગાવી દેવામાં આવી હતી.
ઈઝરાયેલ લાંબા સમયથી કહે છે કે કમલ અદવાન હમાસનો ગઢ છે જ્યાં આતંકવાદીઓ સક્રિય છે. આઇડીએફએ એક નિવેદનમાં જણાવ્યું હતું કે, “ઇઝરાયેલી સૈનિકો આ વિસ્તારમાં લક્ષ્યાંકિત ઓપરેશન ચલાવી રહ્યા છે, જ્યારે તેમાં સામેલ ન હોય તેવા નાગરિકો, દર્દીઓ અને તબીબી કર્મચારીઓને નુકસાન ઓછું કરી રહ્યું છે.” એક અલગ નિવેદનમાં IDF એ સ્વીકાર્યું કે “હોસ્પિટલની અંદર એક ખાલી બિલ્ડિંગમાં લાગેલી નાની આગ કાબૂમાં છે.” પરંતુ સેનાએ આ દાવાને સંપૂર્ણપણે ફગાવી દીધો છે કે આગ IDF ફાયરિંગને કારણે લાગી હતી.
ગાઝા આરોગ્ય મંત્રાલયનો અલગ દાવો
ઇઝરાયેલી સૈન્યના જવાબમાં, ગાઝાના આરોગ્ય મંત્રાલયે શુક્રવારે એક પ્રેસ કોન્ફરન્સમાં જણાવ્યું હતું કે હોસ્પિટલની અંદર હજુ પણ આગ સળગી રહી છે. કમલ અડવાન હોસ્પિટલ ગાઝાની ઉત્તરે છેલ્લી કાર્યરત તબીબી સુવિધાઓમાંની એક છે, જે મહિનાઓથી ઇઝરાયેલી હવાઈ અને જમીની હુમલા હેઠળ છે. હોસ્પિટલના ડિરેક્ટર હુસમ અબુ સફિયાએ જણાવ્યું હતું કે શુક્રવારે, IDFએ સમગ્ર તબીબી સ્ટાફ અને વિસ્થાપિત લોકોને બહાર કાઢ્યા હતા. આ પછી, તેઓએ હોસ્પિટલના તમામ ઓપરેટિંગ વિભાગોને સળગાવવાનું શરૂ કર્યું.
