જેતપુરના ફૂલવાડી ઢોરા પાસે ૪.૬૫ લાખના મુદ્દામાલ સાથે બે બુટલેગરો ઝડપાયા
૧૨૦૦ બોટલ પોલીસે જપ્ત કર્યા, કાર કબ્જે કરાઇ
અગ્ર ગુજરાત, રાજકોટ
રાજકોટ રેન્જ પોલીસે જેતપુરના કુખ્યાત બુટલેગર અનીલ ઉર્ફે ડબલીના બે સાગરીતોને ૧,૨૦૦ બોટલ ઇંગ્લીશ દારૂ સાથે રંગેહાથ ઝડપી પાડવામાં પોલીસને સફળતા મળી છે.
મળતી વિગત અનુસાર, રાજકોટ રેન્જના પોલીસ ઇન્સપેક્ટર અપ્પૂર્વ પટેલના માર્ગદર્શન હેઠળ, સ્ટાફ દ્વારા હ્યુમન સોર્સ અને ટેકનિકલ એનાલિસિસના કામગીરી દરમિયાન દિવ્યેશભાઇ સુવા, શિવરાજસિહ ઝાલા અને નિકુલભાઇ પંપાણીયાને મળેલી ચોક્કસ બાતમીના આધારે, પી.એસ.આઈ. બી.સી. મીયાત્રા અને પોલીસ કોન્સ્ટેબલ અનિરુદ્ધસિંહ જાડેજાની ટીમને બાતમી મેળવવામાં આવી હતી. આ બાતમીના આધારે જેતપુર ફૂલવાડી ઢોરા પાસે રોડ પર પોલીસે વોચ ગોઠવી હતી. ત્યાંથી હોન્ડા અમેઝ કારમાં દારૂની હેરાફેરી કરતા વસીમભાઇ ઇકબાલભાઇ સોલંકી અને વિશેષ ભુપેશભાઇ પરમારને ઝડપી પાડવામાં આવ્યા હતા.
પોલીસે આરોપીઓની કારમાંથી ભારતીય બનાવટની ઇંગ્લીશ દારૂની ૧,૨૦૦ બોટલ કિંમત રૂપિયા ૧,૫૦,૦૦૦ ની જપ્ત કરી છે. આ સાથે ઉપયોગમાં લેવાયેલી હોન્ડા અમેઝ કાર (કિંમત રૂ. ૩,૦૦,૦૦૦) અને બે મોબાઈલ ફોન (કિંમત રૂ. ૧૫,૦૦૦) મળીને કુલ રૂ. ૪,૬૫,૦૦૦ નો મુદ્દામાલ કબજે કરવામાં આવ્યો છે. આ જથ્થો સપ્લાય કરનાર મુખ્ય આરોપી અનીલ ઉર્ફે ડબલી મનસુખભાઇ બારૈયા વિરુદ્ધ પણ જેતપુર સિટી પોલીસ સ્ટેશનમાં ગુનો દાખલ કરી કાયદેસરની કાર્યવાહી હાથ ધરવામાં આવી છે.
તપાસ દરમિયાન આ દારૂનો જથ્થો સપ્લાય કરનાર જેતપુરના કુખ્યાત બુટલેગર અનીલ ઉર્ફે ડબલી મનસુખભાઈ બારૈયાનું નામ સામે આવ્યું છે. અનીલ ઉર્ફે ડબલીનો ગુનાહિત ઇતિહાસ ખૂબ જ લાંબો છે, જેમાં પ્રોહિબિશન, જુગારધારા અને આઈપીસીની વિવિધ કલમો હેઠળ ૬૮થી વધુ ગુના નોંધાયેલા છે. આ ઉપરાંત, તેની સામે અગાઉ પાસા અને હદપારી હેઠળ પણ કાર્યવાહી કરવામાં આવી છે. હાલ જેતપુર સિટી પોલીસ સ્ટેશન ખાતે તમામ આરોપીઓ વિરુદ્ધ ગુનો નોંધી કાયદેસરની કાર્યવાહી હાથ ધરવામાં આવી છે.
